ਪ੍ਰੋਗਰੈਸਿਵ ਡੈਮੋਕ੍ਰੇਟਿਕ ਆਗੂ ਆਇਸ਼ਾ ਵਹਾਬ ਨੇ ਅਮਰੀਕੀ ਸਿਆਸਤ ਵਿੱਚ ਵੱਡਾ ਮੁਕਾਮ ਹਾਸਲ ਕੀਤਾ ਹੈ। 39 ਸਾਲਾ ਆਇਸ਼ਾ ਨੇ ਕੈਲੀਫ਼ੋਰਨੀਆ ਵਿੱਚ ਹੋਈ ਵਿਸ਼ੇਸ਼ ਉਪ-ਚੋਣ ਜਿੱਤ ਕੇ ਅਮਰੀਕੀ ਕਾਂਗਰਸ ਦੀ ਪਹਿਲੀ ਅਫ਼ਗਾਨ-ਅਮਰੀਕੀ ਮੈਂਬਰ ਬਣਨ ਦਾ ਇਤਿਹਾਸ ਰਚਿਆ ਹੈ। 21 ਅਗਸਤ ਨੂੰ ਐਲਾਨੇ ਨਤੀਜਿਆਂ ਮੁਤਾਬਕ ਉਨ੍ਹਾਂ ਨੂੰ 53.1 ਫ਼ੀਸਦੀ ਵੋਟਾਂ ਮਿਲੀਆਂ ਅਤੇ ਉਨ੍ਹਾਂ ਨੇ ਆਪਣੀ ਹੀ ਪਾਰਟੀ ਦੀ ਵਿਰੋਧੀ ਉਮੀਦਵਾਰ ਮੇਲਿਸਾ ਹਰਨਾਂਡੇਜ਼ ਨੂੰ ਹਰਾਇਆ।
ਇਹ ਸੀਟ ਸਾਬਕਾ ਕਾਂਗਰਸਮੈਨ ਐਰਿਕ ਸਵੈਲਵੈੱਲ ਦੇ ਅਸਤੀਫ਼ੇ ਤੋਂ ਬਾਅਦ ਖਾਲੀ ਹੋਈ ਸੀ। ਆਇਸ਼ਾ ਵਹਾਬ ਜਨਵਰੀ ਤੱਕ ਇਸ ਅਹੁਦੇ ’ਤੇ ਸੇਵਾਵਾਂ ਨਿਭਾਉਣਗੇ।
ਬਚਪਨ ਵਿੱਚ ਹੀ ਉੱਠ ਗਿਆ ਮਾਪਿਆਂ ਦਾ ਸਾਇਆ
ਆਇਸ਼ਾ ਵਹਾਬ ਦਾ ਜੀਵਨ ਸੰਘਰਸ਼ਾਂ ਨਾਲ ਭਰਿਆ ਰਿਹਾ ਹੈ। ਨਿਊਯਾਰਕ ਦੇ ਕੁਈਨਜ਼ ਵਿੱਚ ਜਨਮੀ ਆਇਸ਼ਾ ਨੇ ਬਚਪਨ ਵਿੱਚ ਹੀ ਆਪਣੇ ਮਾਤਾ-ਪਿਤਾ ਨੂੰ ਗੁਆ ਦਿੱਤਾ। ਪਹਿਲਾਂ ਉਨ੍ਹਾਂ ਦੇ ਪਿਤਾ ਦੀ ਹੱਤਿਆ ਹੋਈ ਅਤੇ ਕੁਝ ਸਮੇਂ ਬਾਅਦ ਮਾਤਾ ਦਾ ਵੀ ਦਿਹਾਂਤ ਹੋ ਗਿਆ। ਇਸ ਤੋਂ ਬਾਅਦ ਕੈਲੀਫ਼ੋਰਨੀਆ ਦੇ ਬੇਅ ਏਰੀਆ ਦੇ ਇੱਕ ਦੰਪਤੀ ਨੇ ਉਨ੍ਹਾਂ ਨੂੰ ਗੋਦ ਲਿਆ।
ਮੁਸ਼ਕਲਾਂ ਦੇ ਬਾਵਜੂਦ ਆਇਸ਼ਾ ਨੇ ਪੜ੍ਹਾਈ ਜਾਰੀ ਰੱਖੀ। ਉਨ੍ਹਾਂ ਨੇ ਰਾਜਨੀਤੀ ਵਿਗਿਆਨ ਵਿੱਚ ਡਿਗਰੀ ਤੋਂ ਬਾਅਦ ਐੱਮ.ਬੀ.ਏ. ਅਤੇ ਸਮਾਜਿਕ ਕੰਮ ਵਿੱਚ ਡਾਕਟਰੇਟ ਦੀ ਪੜ੍ਹਾਈ ਪੂਰੀ ਕੀਤੀ।
ਆਰਥਿਕ ਸੰਕਟ ਨੇ ਬਦਲੀ ਜ਼ਿੰਦਗੀ
2011 ਦੀ ਆਰਥਿਕ ਮੰਦੀ ਦੌਰਾਨ ਆਇਸ਼ਾ ਦੇ ਪਰਿਵਾਰ ਨੂੰ ਮੁੜ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਪਰਿਵਾਰ ਦਾ ਘਰ ਜ਼ਬਤ ਹੋ ਗਿਆ, ਕਾਰੋਬਾਰ ਠੱਪ ਹੋ ਗਿਆ, ਗੋਦ ਲੈਣ ਵਾਲੇ ਪਿਤਾ ਦੀ ਸਿਹਤ ਵਿਗੜ ਗਈ ਅਤੇ ਇਸੇ ਦੌਰਾਨ ਆਇਸ਼ਾ ਦੀ ਨੌਕਰੀ ਵੀ ਚਲੀ ਗਈ। ਹਾਲਾਤਾਂ ਕਾਰਨ ਉਨ੍ਹਾਂ ਨੂੰ ਆਪਣਾ ਇਲਾਕਾ ਛੱਡ ਕੇ ਹੇਵਰਡ ਜਾਣਾ ਪਿਆ।
ਹੇਵਰਡ ਵਿੱਚ ਉਨ੍ਹਾਂ ਨੇ ਸਥਾਨਕ ਕੌਂਸਲ ਮੀਟਿੰਗਾਂ ਵਿੱਚ ਹਿੱਸਾ ਲੈਣਾ ਸ਼ੁਰੂ ਕੀਤਾ ਅਤੇ ਕਿਫ਼ਾਇਤੀ ਰਿਹਾਇਸ਼ ਦੇ ਮੁੱਦੇ ਨੂੰ ਜ਼ੋਰਦਾਰ ਢੰਗ ਨਾਲ ਉਠਾਇਆ। ਇਸੇ ਸਰਗਰਮੀ ਦਾ ਨਤੀਜਾ ਸੀ ਕਿ 2018 ਵਿੱਚ ਉਹ ਹੇਵਰਡ ਸਿਟੀ ਕੌਂਸਲ ਲਈ ਚੁਣੀ ਗਈ।
ਇਸ ਤੋਂ ਬਾਅਦ 2022 ਵਿੱਚ ਆਇਸ਼ਾ ਵਹਾਬ ਕੈਲੀਫ਼ੋਰਨੀਆ ਸਟੇਟ ਲੈਜਿਸਲੇਚਰ ਲਈ ਚੁਣੀ ਗਈ। ਉਹ ਕੈਲੀਫ਼ੋਰਨੀਆ ਦੀ ਪਹਿਲੀ ਅਫ਼ਗਾਨ-ਅਮਰੀਕੀ ਅਤੇ ਪਹਿਲੀ ਮੁਸਲਿਮ ਮਹਿਲਾ ਬਣੀ ਜਿਸ ਨੇ ਇਹ ਮੁਕਾਮ ਹਾਸਲ ਕੀਤਾ।
