ਨਵੀਂ ਦਿੱਲੀ: ਕੇਂਦਰੀ ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਨੇ ਰਾਜ ਸਭਾ ਵਿੱਚ ਕੇਂਦਰੀ ਬਜਟ 2022 ‘ਤੇ ਚਰਚਾ ਦਾ ਜਵਾਬ ਦਿੱਤਾ। ਚਰਚਾ ਦੌਰਾਨ ਵਿੱਤ ਮੰਤਰੀ ਨੇ ਕਿਹਾ ਕਿ ਇਹ ਬਜਟ ਨਿਰੰਤਰਤਾ ਲਿਆਵੇਗਾ ਤੇ ਇਹ ਬਜਟ ਆਰਥਿਕਤਾ ਵਿੱਚ ਸਥਿਰਤਾ ਲਿਆਏਗਾ। ਨਿਰਮਲਾ ਨੇ ਅੱਗੇ ਕਿਹਾ ਕਿ ਭਾਰਤ ਵਿੱਚ ਸਟਾਰਟਅੱਪ ਲਈ ਬਿਹਤਰ ਸੁਵਿਧਾਵਾਂ ਹਨ। ਉਨ੍ਹਾਂ ਕਿਹਾ ਕਿ ਵਿਕਾਸ ਲਈ 25 ਸਾਲ ਦਾ ਰੋਡਮੈਪ ਜ਼ਰੂਰੀ ਹੈ। ਸਾਡਾ ਪੂਰਾ ਜ਼ੋਰ ਆਰਥਿਕ ਵਿਕਾਸ ‘ਤੇ ਹੈ। ਉਨ੍ਹਾਂ ਕਿਹਾ ਕਿ ਦੇਸ਼ ਵਿੱਚ 20 ਤੋਂ ਵੱਧ ਸਟਾਰਟਅੱਪ ਯੂਨੀਕੋਰਨ ਬਣਾਏ ਗਏ ਹਨ।
ਵਿੱਤ ਮੰਤਰੀ ਨੇ ਦੱਸਿਆ ਕਿ ਹਰ ਸਾਲ ਇਕ ਹੀ ਦੇਸ਼ ਤੋਂ 2.5 ਕਰੋੜ ਛਤਰੀਆਂ ਦਰਾਮਦ ਕੀਤੀਆਂ ਜਾਂਦੀਆਂ ਹਨ। ਚੀਨ ਵੱਲ ਇਸ਼ਾਰਾ ਕਰਦੇ ਹੋਏ ਉਨ੍ਹਾਂ ਕਿਹਾ ਕਿ ਇਸ ਦੇ ਮੱਦੇਨਜ਼ਰ ਬਜਟ ‘ਚ ਛੱਤਰੀਆਂ ਦੀ ਦਰਾਮਦ ‘ਤੇ 10 ਫੀਸਦੀ ਡਿਊਟੀ ਘਟਾ ਕੇ 20 ਫੀਸਦੀ ਕਰ ਦਿੱਤੀ ਗਈ ਹੈ। ਉਨ੍ਹਾਂ ਕਿਹਾ ਕਿ ਘਰੇਲੂ ਛੱਤਰੀ ਨਿਰਮਾਤਾ ਐੱਮਐੱਸਐੱਮਈ ਕੰਪਨੀਆਂ ਨੇ ਸ਼ਿਕਾਇਤ ਕੀਤੀ ਸੀ ਕਿ ਘੱਟ ਡਿਊਟੀ ਕਾਰਨ ਚੀਨ ਤੋਂ ਛਤਰੀਆਂ ਦੀ ਦਰਾਮਦ ਦੇਸ਼ ‘ਚ ਲਗਾਤਾਰ ਵਧ ਰਹੀ ਹੈ। ਦਰਾਮਦ ਡਿਊਟੀ ਵਧਣ ਨਾਲ ਘਰੇਲੂ ਛੋਟੇ ਉੱਦਮੀਆਂ ਨੂੰ ਨਿਰਮਾਣ ਦਾ ਮੌਕਾ ਮਿਲੇਗਾ।
