ਨਵੀਂ ਦਿੱਲੀ : – ਕਰਨਾਟਕ ਤੋਂ ਪੈਦਾ ਹੋਏ ‘ਹਿਜਾਬ’ ਵਿਵਾਦ ਦੀ ਚਰਚਾ ਦੇਸ਼ ਦੇ ਨਾਲ-ਨਾਲ ਦੁਨੀਆ ਭਰ ਵਿੱਚ ਵੀ ਹੋ ਰਹੀ ਹੈ। ਇਸ ਪੂਰੇ ਵਿਵਾਦ ਨੂੰ ਲੈ ਕੇ ਲੋਕਾਂ ਦੀ ਵੱਖੋ-ਵੱਖ ਰਾਏ ਹੈ। ਇਸੇ ਕੜੀ ‘ਚ ਹੁਣ ਮਸ਼ਹੂਰ ਲੇਖਿਕਾ ਤਸਲੀਮਾ ਨਸਰੀਨ ਨੇ ਵੀ ਆਪਣੀ ਰਾਏ ਜ਼ਾਹਰ ਕੀਤੀ ਹੈ। ਤਸਲੀਮਾ ਔਰਤਾਂ ਦੇ ਮੁੱਦਿਆਂ ‘ਤੇ ਆਪਣੀ ਸਪੱਸ਼ਟ ਰਾਏ ਲਈ ਜਾਣੀ ਜਾਂਦੀ ਹੈ। ਤਸਲੀਮਾ ਦਾ ਕਹਿਣਾ ਹੈ ਕਿ ‘ਹਿਜਾਬ’ ਇੱਕ ਅਜਿਹਾ ਕੱਪੜਾ ਹੈ ਜੋ ਔਰਤਾਂ ਨੂੰ ਸੈਕਸ ਆਬਜੈਕਟ ਬਣਾਉਂਦਾ ਹੈ। ਇਸ ਦੇ ਨਾਲ ਹੀ ਤਸਲੀਮਾ ਨੇ ਯੂਨੀਫਾਰਮ ਸਿਵਲ ਕੋਡ ਦੀ ਵੀ ਵਕਾਲਤ ਕੀਤੀ।
ਅੰਗਰੇਜ਼ੀ ਵੈੱਬਸਾਈਟ Firstpost.com ਨੂੰ ਦਿੱਤੇ ਇੰਟਰਵਿਊ ‘ਚ ਤਸਲੀਮਾ ਨਸਰੀਨ ਨੇ ਕਿਹਾ, ”ਮੇਰਾ ਮੰਨਣਾ ਹੈ ਕਿ ਧਰਮ ਨਿਰਪੱਖ ਦੇਸ਼ ‘ਚ ਸਿੱਖਿਆ ਸੰਸਥਾਨ ਨੂੰ ਆਪਣੇ ਵਿਦਿਆਰਥੀਆਂ ਲਈ ਧਰਮ ਨਿਰਪੱਖ ਡਰੈੱਸ ਕੋਡ ਨੂੰ ਲਾਜ਼ਮੀ ਬਣਾਉਣ ਦਾ ਅਧਿਕਾਰ ਹੈ। ਉਨ੍ਹਾਂ ਕਿਹਾ ਕਿ ਇਸ ਵਿੱਚ ਕੁਝ ਵੀ ਗਲਤ ਨਹੀਂ ਹੈ ਕਿ ਸਕੂਲ ਅਤੇ ਕਾਲਜ ਵਿਦਿਆਰਥੀਆਂ ਨੂੰ ਆਪਣੀ ਧਾਰਮਿਕ ਪਛਾਣ ਘਰ ਵਿੱਚ ਰੱਖਣ ਲਈ ਕਹਿੰਦੇ ਹਨ। ਸਕੂਲਾਂ ਵਿੱਚ ਧਾਰਮਿਕ ਕੱਟੜਤਾ, ਕੱਟੜਵਾਦ ਅਤੇ ਅੰਧਵਿਸ਼ਵਾਸ ਲਈ ਕੋਈ ਥਾਂ ਨਹੀਂ ਹੋ ਸਕਦੀ। ਸਕੂਲਾਂ ਵਿੱਚ ਵਿਅਕਤੀਗਤ ਆਜ਼ਾਦੀ, ਲਿੰਗ ਸਮਾਨਤਾ, ਉਦਾਰਵਾਦ, ਮਾਨਵਵਾਦ ਅਤੇ ਵਿਗਿਆਨਕ ਸਿਧਾਂਤ ਪੜ੍ਹਾਏ ਜਾਣੇ ਚਾਹੀਦੇ ਹਨ।
ਤਸਲੀਮਾ ਨੇ ‘ਹਿਜਾਬ’ ਵਿਵਾਦ ‘ਤੇ ਸਪੱਸ਼ਟ ਕਿਹਾ ਕਿ ਹਿਜਾਬ, ਨਕਾਬ ਅਤੇ ਬੁਰਕੇ ਦਾ ਇੱਕੋ ਇੱਕ ਮਕਸਦ ਔਰਤਾਂ ਨੂੰ ਸੈਕਸ ਆਬਜੈਕਟ ਵਿੱਚ ਤਬਦੀਲ ਕਰਨਾ ਹੈ। ਉਨ੍ਹਾਂ ਕਿਹਾ ਕਿ ਅਸਲੀਅਤ ਇਹ ਹੈ ਕਿ ਔਰਤਾਂ ਨੂੰ ਉਨ੍ਹਾਂ ਮਰਦਾਂ ਤੋਂ ਛੁਪਾਉਣ ਦੀ ਲੋੜ ਹੁੰਦੀ ਹੈ ਜੋ ਉਨ੍ਹਾਂ ਨੂੰ ਦੇਖ ਕੇ ਲਾਰ ਸਿੱਟਦੇ ਹਨ। ਤਸਲੀਮਾ ਨੇ ਕਿਹਾ ਕਿ ਇਹ ਬਹੁਤ ਹੀ ਅਪਮਾਨਜਨਕ ਹੈ। ਇਸ ਪ੍ਰਥਾ ਨੂੰ ਜਲਦੀ ਤੋਂ ਜਲਦੀ ਬੰਦ ਕੀਤਾ ਜਾਣਾ ਚਾਹੀਦਾ ਹੈ।