ਸਰਦੀਆਂ ਵਿੱਚ ਕੂਹਣੀਆਂ ਦੀ ਚਮੜੀ ਜ਼ਿਆਦਾ ਖੁਸ਼ਕ, ਕਾਲੀ ਅਤੇ ਸਖ਼ਤ ਹੋ ਜਾਂਦੀ ਹੈ। ਅਜਿਹੇ ‘ਚ ਕੂਹਣੀਆਂ ਨੂੰ ਖਾਸ ਦੇਖਭਾਲ ਦੀ ਲੋੜ ਹੁੰਦੀ ਹੈ। ਹਾਲਾਂਕਿ ਚਮੜੀ ਨੂੰ ਨਰਮ ਅਤੇ ਸੁੰਦਰ ਰੱਖਣ ਲਈ ਬਾਜ਼ਾਰ ਵਿਚ ਕਈ ਤਰ੍ਹਾਂ ਦੀਆਂ ਕਰੀਮਾਂ, ਲੋਸ਼ਨ ਅਤੇ ਤੇਲ ਉਪਲਬਧ ਹਨ ਜਿਨ੍ਹਾਂ ਨੂੰ ਤੁਸੀਂ ਆਪਣੀ ਚਮੜੀ ਦੀ ਕਿਸਮ ਦੇ ਅਨੁਸਾਰ ਚੁਣ ਸਕਦੇ ਹੋ ਪਰ ਕੁਝ ਘਰੇਲੂ ਨੁਸਖੇ ਵੀ ਕਾਲੀਆ ਹੋਈਆਂ ਕੂਹਣੀਆਂ ਨੂੰ ਖੂਬਸੂਰਤ ਬਣਾਉਣ ਚ ਮਦਦਗਾਰ ਸਿੱਧ ਹੋ ਸਕਦੇ ਹਨ
ਚੌਲਾਂ ਦਾ ਆਟਾ, ਦਹੀਂ ਅਤੇ ਚੁਟਕੀ ਭਰ ਹਲਦੀ ਮਿਲਾ ਕੇ ਘਰ ‘ਤੇ ਹੀ ਸਕਰਬ ਬਣਾਓ। ਇਸ ਨੂੰ ਹੱਥਾਂ ਦੀ ਚਮੜੀ ‘ਤੇ, ਖਾਸ ਕਰਕੇ ਕੂਹਣੀਆਂ ‘ਤੇ ਹਲਕਾ ਜਿਹਾ ਰਗੜ ਕੇ ਲਗਾਓ। ਇਹ ਸਕਰਬ ਮਰੇ ਹੋਏ ਸੈੱਲਾਂ ਨੂੰ ਦੂਰ ਕਰੇਗਾ ਅਤੇ ਚਮੜੀ ਦੀ ਰੰਗਤ ਨੂੰ ਨਿਖਾਰਨ ਵਿੱਚ ਵੀ ਮਦਦ ਕਰੇਗਾ।
ਕੂਹਣੀਆਂ ਦੇ ਕਾਲੇਪਨ ਨੂੰ ਦੂਰ ਕਰਨ ਲਈ ਨਿੰਬੂ ਦੇ ਦੋ ਟੁਕੜੇ ਲੈ ਕੇ ਰੋਜ਼ਾਨਾ ਕੂਹਣੀ ਦੀ ਚਮੜੀ ‘ਤੇ ਰਗੜੋ। ਫਿਰ ਸਾਦੇ ਪਾਣੀ ਨਾਲ ਧੋ ਲਓ। ਇਸ ਦੀ ਰੋਜ਼ਾਨਾ ਵਰਤੋਂ ਨਾਲ ਕੂਹਣੀਆਂ ਦੇ ਕਾਲੇਪਣ ਤੋਂ ਛੁਟਕਾਰਾ ਮਿਲੇਗਾ
ਉੜਦ ਜਾਂ ਮੂੰਗ ਦੀ ਦਾਲ ਨੂੰ ਰਾਤ ਭਰ ਪਾਣੀ ਵਿੱਚ ਭਿਓ ਦਿਓ। ਅਗਲੇ ਦਿਨ ਸਵੇਰੇ ਇਸ ਨੂੰ ਦੁੱਧ ਨਾਲ ਪੀਸ ਲਓ ਅਤੇ ਇਸ ਪੇਸਟ ਦੀ ਵਰਤੋਂ ਕੂਹਣੀਆਂ ਦੀ ਚਮੜੀ ‘ਤੇ ਰਗੜਨ ਲਈ ਕਰੋ। ਫਿਰ ਪਾਣੀ ਨਾਲ ਚੰਗੀ ਤਰ੍ਹਾਂ ਧੋ ਲਓ।
ਕੂਹਣੀਆਂ ਅਤੇ ਗੋਡਿਆਂ ਦੀ ਚਮੜੀ ਜ਼ਿਆਦਾ ਕਾਲੀ ਅਤੇ ਖੁਸ਼ਕ ਹੁੰਦੀ ਹੈ। ਇਨ੍ਹਾਂ ਦੀ ਖੁਸ਼ਕੀ ਅਤੇ ਕਾਲੇਪਨ ਨੂੰ ਦੂਰ ਕਰਨ ਲਈ ਨਿੰਬੂ-ਹਲਦੀ ਦੀ ਕਰੀਮ ਫਾਇਦੇਮੰਦ ਹੁੰਦੀ ਹੈ। ਇਹ ਕਰੀਮ ਨਾ ਸਿਰਫ ਚਮੜੀ ਨੂੰ ਨਰਮ ਕਰਨ ਵਿਚ ਮਦਦ ਕਰਦੀ ਹੈ ਬਲਕਿ ਸਮੇਂ ਦੇ ਨਾਲ ਚਮੜੀ ਦੇ ਰੰਗ ਨੂੰ ਵੀ ਨਿਖਾਰਦੀ ਹੈ।
