ਖਾਰਕਿਵ : – ਐਮਬੀਬੀਐਸ ਕਰਨ ਲਈ ਪੰਜਾਬ ਤੋਂ ਯੂਕਰੇਨ ਜਾਣ ਵਾਲੇ ਵਿਦਿਆਰਥੀਆਂ ਦੀ ਸੂਚੀ ਲਗਾਤਾਰ ਵਧਦੀ ਜਾ ਰਹੀ ਹੈ। ਬੱਚਿਆਂ ਦੇ ਉਥੇ ਫਸੇ ਹੋਣ ਕਾਰਨ ਹੁਣ ਮਾਪਿਆਂ ਦੀ ਚਿੰਤਾ ਵੀ ਵੱਧ ਰਹੀ ਹੈ। ਯੂਕਰੇਨ ਵਿੱਚ ਜਿੱਥੇ ਕੱਲ੍ਹ ਤੱਕ ਅੰਮ੍ਰਿਤਸਰ ਦੇ 45 ਵਿਦਿਆਰਥੀ ਦੱਸੇ ਜਾ ਰਹੇ ਸਨ, ਉਥੇ ਅੱਜ ਮਾਪੇ 52 ਵਿਦਿਆਰਥੀਆਂ ਦੀ ਸੂਚੀ ਲੈ ਕੇ ਅੰਮ੍ਰਿਤਸਰ ਦੇ ਡੀਸੀ ਦਫ਼ਤਰ ਪੁੱਜੇ।
ਦੋ ਦਿਨ ਪਹਿਲਾਂ ਯੂਕਰੇਨ ਤੋਂ ਪਰਤੀ ਵਿਦਿਆਰਥਣ ਯੁਕਤਾ ਸੂਚੀ ਲੈ ਕੇ ਸ਼ਨੀਵਾਰ ਨੂੰ ਡੀਸੀ ਦਫ਼ਤਰ ਪਹੁੰਚੀ। ਇਸ ਸੂਚੀ ਵਿੱਚ 52 ਵਿਦਿਆਰਥੀਆਂ ਦੇ ਨਾਂ ਸਨ, ਜੋ ਯੂਕਰੇਨ ਦੇ ਖਾਰਕਿਵ ਵਿੱਚ ਸਥਿਤ ਕਾਲਜ ਹੋਸਟਲ ਦੇ ਬੰਕਰ ਵਿੱਚ ਮੌਜੂਦ ਹਨ। ਇਹ ਸਾਰੇ ਵਿਦਿਆਰਥੀ ਯੁਕਤਾ ਦੇ ਬੈਚਮੇਟ ਹਨ ਅਤੇ ਪੰਜਾਬ ਦੇ ਵੱਖ-ਵੱਖ ਸ਼ਹਿਰਾਂ ਦੇ ਰਹਿਣ ਵਾਲੇ ਹਨ। ਯੁਕਤਾ ਨੇ ਦੱਸਿਆ ਕਿ ਉਨ੍ਹਾਂ ਨੇ ਇਕ ਵਟਸਐਪ ਗਰੁੱਪ ਬਣਾ ਕੇ ਸਾਰਿਆਂ ਨੂੰ ਇਕੱਠਾ ਕੀਤਾ ਹੈ ਅਤੇ ਹੁਣ ਹਰ ਜਾਣਕਾਰੀ ਇਕ ਦੂਜੇ ਨਾਲ ਸਾਂਝੀ ਕੀਤੀ ਜਾ ਰਹੀ ਹੈ। ਉਹ ਖੁਦ 24 ਫਰਵਰੀ ਨੂੰ ਅੰਮ੍ਰਿਤਸਰ ਪਹੁੰਚੀ ਸੀ ਅਤੇ ਉਸ ਤੋਂ ਬਾਅਦ ਯੂਕਰੇਨ ਵਿੱਚ ਹਾਲਾਤ ਵਿਗੜ ਗਏ ਹਨ। ਯੁਕਤਾ ਨੇ ਦੱਸਿਆ ਕਿ ਅੰਮ੍ਰਿਤਸਰ ਅਤੇ ਪੰਜਾਬ ਦੇ ਜ਼ਿਆਦਾਤਰ ਬੱਚੇ ਯੂਕਰੇਨ ਦੇ ਖਾਰਕਿਵ ਵਿੱਚ ਹਨ ਅਤੇ ਉੱਥੇ ਕਾਲਜ ਦੇ ਹੋਸਟਲ ਵਿੱਚ ਬਣੇ ਬੰਕਰ ਵਿੱਚ ਇਕੱਠੇ ਰਹਿ ਰਹੇ ਹਨ।