ਚੰਡੀਗੜ੍ਹ, 27 ਫਰਵਰੀ 2022 – ਨਵਜੋਤ ਸਿੰਘ ਸਿੱਧੂ ਸਿਆਸਤ ਦੇ ਅਸਮਾਨ ’ਚ ਇੱਕ ਚਮਕਦਾ ਸਿਤਾਰਾ ਹਨ, ਪਰ ਫੇਰ ਵੀ ਇਸ ਵਾਰ ਕਾਂਗਰਸ ਦਾ CM ਚਿਹਰਾ ਬਣਨ ਤੋਂ ਖੁੰਝ ਗਏ। ਜੇਕਰ ਕਾਰਨਾਂ ਦੀ ਗੱਲ ਕਰੀਏ ਤਾਂ ਕਾਂਗਰਸ ਪਾਰਟੀ ’ਚ ਨਵਾਂ ਹੋਣਾ ਵੀ ਉਨ੍ਹਾਂ ਦੇ CM ਚਿਹਰਾ ਬਣਨ ’ਚ ਵੱਡਾ ਰੋੜਾ ਬਣਿਆ। ਉਨ੍ਹਾਂ ਤੋਂ ਅੱਗੇ ਕਈ ਕਾਂਗਰਸੀ CM ਬਣਨ ਦੀ ਦੌੜ ’ਚ ਸ਼ਾਮਲ ਹਨ। ਜਿਵੇ ਕਿ ਰਵਨੀਤ ਸਿੰਘ ਬਿੱਟੂ, ਸੁਖਜਿੰਦਰ ਸਿੰਘ ਰੰਧਾਵਾ, ਸੁਨੀਲ ਜਾਖੜ, ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ। ਅਸੀਂ ਸਿਰਫ਼ ਉਨ੍ਹਾਂ ਆਗੂਆਂ ਦੀ ਗੱਲ ਕੀਤੀ ਹੈ ਜੋ ਕਦੇ ਹੋਰਨਾ ਪਾਰਟੀਆਂ ’ਚ ਨਹੀਂ ਗਏ ਭਾਵ ਸ਼ੁਰੂ ਤੋਂ ਹੀ ਕਾਂਗਰਸ ’ਚ ਹਨ।
ਸਿੱਧੂ ਦਾ ਬੜਬੋਲਾਪਣ, ਦੂਜੀ ਰੁਕਾਵਟ
ਸਿੱਧੂ ਦਾ ਬੜਬੋਲਾਪਣ ਵੀ ਉਨ੍ਹਾਂ ਦੇ CM ਚਿਹਰਾ ਬਣਨ ’ਚ ਰੁਕਾਵਟ ਬਣਿਆ। ਸਿੱਧੂ ਨੇ ਭਾਜਪਾ ’ਚ ਹੁੰਦਿਆ ਕਈ ਵਾਰ ਰਾਹੁਲ ਗਾਂਧੀ, ਸੋਨੀਆ ਗਾਂਧੀ ’ਤੇ ਤਿੱਖੀ ਬਿਆਨਬਾਜੀ ਕੀਤੀ। ਉਨ੍ਹਾਂ ਸਾਬਕਾ ਮੁੱਖ ਮੰਤਰੀ ਮਨਮੋਹਨ ਸਿੰਘ ਨੂੰ ‘ਮੌਨੀ ਬਾਬਾ’ ਤੱਕ ਕਿਹਾ। ਕੈਪਟਨ ਅਮਰਿੰਦਰ ਸਿੰਘ ਦੀ ਵਜ਼ਾਰਤ ’ਚ ਮੰਤਰੀ ਹੁੰਦਿਆ ਹਮੇਸ਼ਾ ਕੈਪਟਨ ਵਿਰੁੱਧ ਬਿਆਨਬਾਜੀ ਕਰਦੇ ਰਹੇ। ਇਸ ਤੋਂ ਬਾਅਦ ਨਵੇਂ ਬਣੇ CM ਚੰਨੀ ’ਤੇ ਵੀ ਵੋਟਾਂ ਪੈਣ ਤੋਂ ਪਹਿਲਾਂ ਤੱਕ ਅਸਿੱਧੇ ਤੌਰ ’ਤੇ ਹਮਲੇ ਜਾਰੀ ਰੱਖੇ।
ਵਾਰ ਵਾਰ ਅਸਤੀਫ਼ਾ ਦੇਣਾ ਵੀ ਬਣਿਆ ਕਾਰਣ
ਨਵਜੋਤ ਸਿੰਘ ਸਿੱਧੂ ਨੇ ਮਹਿਕਮਾ ਬਦਲੇ ਜਾਣ ਦੇ ਵਿਰੋਧ ’ਚ ਅਸਤੀਫ਼ਾ ਦੇ ਦਿੱਤਾ ਸੀ। ਉਸਤੋਂ ਬਾਅਦ ਸਿੱਧੂ ਨੇ ਦੂਜੀ ਵਾਰ CM ਚੰਨੀ ਦੇ ਫ਼ੈਸਲਿਆਂ ਦੇ ਵਿਰੋਧ ’ਚ ਵੀ ਅਸਤੀਫ਼ਾ ਦਿੱਤਾ। ਉਸ ਸਮੇਂ ਉਨ੍ਹਾਂ ਦੇ ਆਪ ’ਚ ਜਾਣ ਦੀਆਂ ਅਫ਼ਵਾਹਾਂ ਵੀ ਉੱਡੀਆਂ।
ਖ਼ੈਰ ਜੇਕਰ ਇਹ ਸਾਰੀਆਂ ਗੱਲਾਂ ਸਹੀ ਸਾਬਤ ਹੁੰਦੀਆਂ ਨੇ ਤਾਂ ਕਿਤੇ ਨਾ ਕਿਤੇ ਉਨ੍ਹਾਂ ਦਾ ਇਸ ਵਾਰ ਆਪਣੇ ਹਲਕੇ ਅੰਮ੍ਰਿਤਸਰ ਪੂਰਬੀ ’ਚ ਜਿੱਤਣਾ ਵੀ ਔਖਾ ਹੀ ਜਾਪਦਾ ਹੈ।
