‘ਦਿ ਕਪਿਲ ਸ਼ਰਮਾ ਸ਼ੋਅ’ ‘ਚ ਕਈ ਅਜਿਹੇ ਕਿਰਦਾਰ ਹਨ, ਜਿਨ੍ਹਾਂ ਨੂੰ ਲੋਕ ਅੱਜ ਵੀ ਯਾਦ ਕਰਦੇ ਹਨ। ਇਨ੍ਹਾਂ ‘ਚੋਂ ਇਕ ਕਿਰਦਾਰ ਦਾ ਨਾਂ ‘ਦਾਦੀ’ ਹੈ। ਇਸ ਸ਼ੋਅ ‘ਚ ਦਾਦੀ ਦਾ ਕਿਰਦਾਰ ਮਸ਼ਹੂਰ ਐਕਟਰ ਅਲੀ ਅਸਗਰ ਨੇ ਨਿਭਾਇਆ ਸੀ। ਦਾਦੀ ਦੇ ਕਿਰਦਾਰ ਨੂੰ ਲੋਕਾਂ ਨੇ ਇੰਨਾ ਪਸੰਦ ਕੀਤਾ ਕਿ ਜਦੋਂ ਉਨ੍ਹਾਂ ਨੇ ਸ਼ੋਅ ਛੱਡਿਆ ਤਾਂ ਲੋਕਾਂ ਦੇ ਦਿਲ ਟੁੱਟ ਗਏ। ਇਸ ਦੇ ਨਾਲ ਹੀ ਹਾਲ ਹੀ ‘ਚ ਅਲੀ ਅਸਗਰ ਨੇ ਖੁਲਾਸਾ ਕੀਤਾ ਕਿ ਉਨ੍ਹਾਂ ਦੇ ਸ਼ੋਅ ਤੋਂ ਅਚਾਨਕ ਹਟਣ ਦਾ ਕਾਰਨ ਕੀ ਸੀ।
ਇੱਕ ਰਿਪੋਰਟ ਮੁਤਾਬਕ ਅਲੀ ਅਸਗਰ ਨੇ ‘ਦਿ ਕਪਿਲ ਸ਼ਰਮਾ ਸ਼ੋਅ’ ਕ੍ਰਿਏਟਿਵ ਡਿਫਰੈਂਸਿਜ਼ ਕਾਰਨ ਛੱਡਿਆ। ਅਦਾਕਾਰ ਨੇ ਕਿਹਾ, ‘ਇਹ ਦੁੱਖ ਵਾਲੀ ਗੱਲ ਹੈ। ਅਜਿਹੇ ਮੌਕੇ ਆਉਂਦੇ ਹਨ, ਜਦੋਂ ਤੁਸੀਂ ਦੋਰਾਹੇ ’ਤੇ ਖੜ੍ਹੇ ਹੁੰਦੇ ਹੋ। ਉਸ ਸਮੇਂ ਤੁਹਾਨੂੰ ਸਖ਼ਤ ਫ਼ੈਸਲਾ ਲੈਣਾ ਪੈਂਦਾ ਹੈ। ਮੈਂ ਸ਼ੋਅ ਨੂੰ ਤੇ ਸਟੇਜ ਨੂੰ ਮਿਸ ਕਰਦਾ ਹਾਂ। ਅਸੀਂ ਇਕ ਟੀਮ ਵਾਂਗ ਕੰਮ ਕੀਤਾ ਸੀ।’ ਅਦਾਕਾਰ ਨੇ ਅੱਗੇ ਕਿਹਾ, ‘ਪਰ ਇਕ ਸਮਾਂ ਆਇਆ, ਜਦੋਂ ਪ੍ਰੋਫੈਸ਼ਨਲ ਤੌਰ ’ਤੇ ਮੈਨੂੰ ਲੱਗਾ ਕਿ ਹੁਣ ਬਹੁਤ ਜ਼ਿਆਦਾ ਹੋ ਗਿਆ ਹੈ। ਕ੍ਰਿਏਟਿਵ ਡਿਫਰੈਂਸਿਜ਼ ਕਾਰਨ ਮੈਂ ਸ਼ੋਅ ਛੱਡਿਆ ਕਿਉਂਕਿ ਮੇਰਾ ਕਿਰਦਾਰ ਸਥਿਰ ਹੋ ਗਿਆ ਸੀ। ਮੇਰਾ ਕੰਮ ਰੁੱਕ ਗਿਆ ਸੀ। ਉਸ ’ਚ ਸੁਧਾਰ ਦਾ ਕੋਈ ਸਕੋਪ ਨਹੀਂ ਸੀ।’
