ਨਵੀਂ ਦਿੱਲੀ/ਇਸਲਾਮਾਬਾਦ : – ਦਿੱਲੀ ਤੋਂ ਦੋਹਾ ਜਾ ਰਹੀ ਕਤਰ ਏਅਰਵੇਜ਼ ਦੀ ਫਲਾਈਟ ਨੂੰ ਤਕਨੀਕੀ ਖਰਾਬੀ ਕਾਰਨ ਕਰਾਚੀ ਵੱਲ ਮੋੜਨਾ ਪਿਆ। ਇਸ ਫਲਾਈਟ ‘ਚ 100 ਯਾਤਰੀ ਸਵਾਰ ਸਨ। ਹੁਣ ਦੂਸਰੀ ਫਲਾਈਟ ਸਾਰੇ ਯਾਤਰੀਆਂ ਨੂੰ ਲੈ ਕੇ ਦੋਹਾ ਲਈ ਰਵਾਨਾ ਹੋ ਗਈ ਹੈ। ਫਲਾਈਟ ਸਥਾਨਕ ਸਮੇਂ ਮੁਤਾਬਕ ਸ਼ਾਮ 4.15 ਵਜੇ ਦੋਹਾ ‘ਚ ਲੈਂਡ ਕਰੇਗੀ। ਕਤਰ ਏਅਰਵੇਜ਼ ਨੇ ਕਿਹਾ ਕਿ ਦੋਹਾ ‘ਚ ਉਤਰਨ ਤੋਂ ਬਾਅਦ ਸਾਰੇ ਯਾਤਰੀਆਂ ਨੂੰ ਉਨ੍ਹਾਂ ਦੀ ਮੰਜ਼ਿਲ ‘ਤੇ ਪਹੁੰਚਣ ‘ਚ ਮਦਦ ਕੀਤੀ ਜਾਵੇਗੀ।
ਕਤਰ ਏਅਰਵੇਜ਼ ਨੇ ਕਿਹਾ ਕਿ ਫਲਾਈਟ ਨੂੰ ਮੋੜਨ ਦਾ ਫੈਸਲਾ ਕਾਰਗੋ ‘ਚ ਧੂੰਆਂ ਉੱਠਣ ਤੋਂ ਬਾਅਦ ਲਿਆ ਗਿਆ। ਅਚਾਨਕ ਫਲਾਈਟ ਐਮਰਜੈਂਸੀ ਐਲਾਨੇ ਜਾਣ ਕਾਰਨ ਯਾਤਰੀਆਂ ਵਿੱਚ ਡਰ ਦਾ ਮਾਹੌਲ ਬਣ ਗਿਆ। ਘਟਨਾ ਦੀ ਜਾਂਚ ਦੇ ਹੁਕਮ ਦੇ ਦਿੱਤੇ ਗਏ ਹਨ।
ਯਾਤਰੀ ਵਿਕਰਮ ਪਸਰੀਚਾ ਆਪਣੀ ਪਤਨੀ ਅਤੇ ਇਕ ਸਾਲ ਦੀ ਬੇਟੀ ਨਾਲ ਦੋਹਾ ਜਾ ਰਿਹਾ ਸੀ। ਉਨ੍ਹਾਂ ਦੱਸਿਆ ਕਿ ਜਹਾਜ਼ ਸੋਮਵਾਰ ਸਵੇਰੇ ਕਰੀਬ 5.30 ਵਜੇ ਕਰਾਚੀ ‘ਚ ਉਤਰਿਆ। ਬਿਨਾਂ ਕੋਈ ਜਾਣਕਾਰੀ ਦਿੱਤੇ ਯਾਤਰੀਆਂ ਨੂੰ ਜਹਾਜ਼ ਤੋਂ ਉਤਰਨ ਲਈ ਕਿਹਾ ਗਿਆ ਅਤੇ ਫਿਰ ਜਿਨਾਹ ਇੰਟਰਨੈਸ਼ਨਲ ਏਅਰਪੋਰਟ ਦੇ ਟਰਾਂਜ਼ਿਟ ਲੌਂਜ ਵਿਚ ਭੇਜ ਦਿੱਤਾ ਗਿਆ।