ਚੀਨ ‘ਚ ਸੋਮਵਾਰ ਨੂੰ ਹਾਦਸਾਗ੍ਰਸਤ ਹੋਏ ਬੋਇੰਗ 737 ਜਹਾਜ਼ ਦਾ ਦੂਜਾ ਬਲੈਕ ਬਾਕਸ ਮਿਲ ਗਿਆ ਹੈ। ਚਾਈਨਾ ਈਸਟਰਨ ਏਅਰਲਾਈਨਜ਼ ਦੇ ਜਹਾਜ਼ ਦਾ ਪਹਿਲਾ ਬਲੈਕ ਬਾਕਸ ਬੁੱਧਵਾਰ ਨੂੰ ਖਰਾਬ ਹਾਲਤ ‘ਚ ਬਰਾਮਦ ਹੋਇਆ ਸੀ। ਕਰੈਸ਼ ਹੋਏ ਜਹਾਜ਼ ਦਾ ਪਹਿਲਾ ਬਲੈਕ ਬਾਕਸ ਬੁੱਧਵਾਰ ਨੂੰ ਮਿਲਣ ਤੋਂ ਬਾਅਦ ਇਸ ਨੂੰ ਡੀਕੋਡਿੰਗ ਲਈ ਬੀਜਿੰਗ ਸਥਿਤ ਪ੍ਰਯੋਗਸ਼ਾਲਾ ਵਿੱਚ ਭੇਜਿਆ ਗਿਆ ਹੈ ਅਤੇ ਡੇਟਾ ਦਾ ਵਿਸ਼ਲੇਸ਼ਣ ਕੀਤਾ ਜਾ ਰਿਹਾ ਹੈ। ਚੀਨ ਦੇ ਸ਼ਹਿਰੀ ਹਵਾਬਾਜ਼ੀ ਪ੍ਰਸ਼ਾਸਨ ਦੇ ਏਵੀਏਸ਼ਨ ਸੇਫਟੀ ਦਫਤਰ ਨੇ ਉਮੀਦ ਜਤਾਈ ਹੈ ਕਿ ਖਰਾਬ ਹੋਏ ਬਲੈਕ ਬਾਕਸ ਤੋਂ ਵੀ ਉਨ੍ਹਾਂ ਨੂੰ ਹਾਦਸੇ ਬਾਰੇ ਕਾਫੀ ਜਾਣਕਾਰੀ ਮਿਲ ਸਕਦੀ ਹੈ।
ਚੀਨੀ ਮੀਡੀਆ ਦੀਆਂ ਰਿਪੋਰਟਾਂ ਮੁਤਾਬਕ ਗੁਆਂਗਜ਼ੂ ਦੇ ਨੇੜੇ ਗੁਆਂਗਸੀ ਸ਼ਹਿਰ ‘ਚ ਜਿਸ ਜਗ੍ਹਾ ‘ਤੇ ਜਹਾਜ਼ ਕਰੈਸ਼ ਹੋਇਆ ਹੈ, ਉਥੇ ਸੰਘਣਾ ਜੰਗਲ ਹੈ ਅਤੇ ਇਸ ਸਮੇਂ ਇਸ ਜਗ੍ਹਾ ‘ਤੇ ਮੌਸਮ ਬਹੁਤ ਖਰਾਬ ਹੈ। ਗੁਆਂਸੀ ‘ਚ ਪਿਛਲੇ ਦਿਨੀਂ ਭਿਆਨਕ ਤੂਫਾਨ ਵੀ ਆਇਆ ਹੈ, ਜਿਸ ਕਾਰਨ ਰਾਹਤ ਅਤੇ ਬਚਾਅ ਕਾਰਜਾਂ ‘ਚ ਕਾਫੀ ਦਿੱਕਤਾਂ ਆਈਆਂ ਹਨ। ਹਾਲਾਂਕਿ, ਸ਼ੁੱਕਰਵਾਰ ਤੱਕ ਚਾਰ ਦਿਨਾਂ ਦੀ ਖੋਜ ਦੇ ਬਾਅਦ ਵੀ ਕਰੈਸ਼ ਹੋਏ ਜਹਾਜ਼ ਵਿੱਚ ਸਵਾਰ 133 ਯਾਤਰੀਆਂ ਵਿੱਚੋਂ ਕਿਸੇ ਦੇ ਵੀ ਜ਼ਿੰਦਾ ਹੋਣ ਬਾਰੇ ਕੋਈ ਸੁਰਾਗ ਨਹੀਂ ਮਿਲਿਆ ਹੈ।