ਝਾਰਖੰਡ ਦੇ ਦੇਵਘਰ ‘ਚ ਤ੍ਰਿਕੁਟ ਪਹਾੜ ‘ਤੇ ਐਤਵਾਰ ਨੂੰ ਵਾਪਰੇ ਰੋਪਵੇਅ ਹਾਦਸੇ ਦੇ ਅੱਜ ਤੀਜੇ ਦਿਨ ਜਾਨ ਬਚਾਉਣ ਲਈ ਬਚਾਅ ਕਾਰਜ ਜਾਰੀ ਹਨ। ਅਖੀਰਲੀ ਟਰਾਲੀ ਵਿੱਚ ਫਸੇ 3 ਹੋਰ ਲੋਕਾਂ ਨੂੰ ਬਚਾ ਲਿਆ ਗਿਆ ਹੈ। ਔਰਤ ਨੂੰ ਬਾਹਰ ਕੱਢਦੇ ਸਮੇਂ ਉਹ 2500 ਫੁੱਟ ਦੀ ਉਚਾਈ ਤੋਂ ਟਰਾਲੀ ਤੋਂ ਹੇਠਾਂ ਡਿੱਗ ਗਈ। ਸੈਲਫੀ ਬੈਲਟ ਬੰਨ੍ਹੇ ਹੋਣ ਕਾਰਨ ਉਸ ਦੀ ਜਾਨ ਬਚ ਗਈ। ਉਸ ਨੂੰ ਰੱਸੀ ਦੀ ਮਦਦ ਨਾਲ ਜ਼ਮੀਨ ‘ਤੇ ਉਤਾਰਨ ਦੀ ਕੋਸ਼ਿਸ਼ ਕੀਤੀ ਗਈ। ਇਸ ਦੌਰਾਨ ਉਹ ਫਿਰ ਝਟਕੇ ਨਾਲ ਜ਼ਮੀਨ ‘ਤੇ ਡਿੱਗ ਗਈ ਜਿਸ ਤੋਂ ਬਾਅਦ ਉਸ ਨੂੰ ਹਸਪਤਾਲ ਵਿਚ ਭਰਤੀ ਕਰਵਾਇਆ ਗਿਆ ਹੈ।
ਦੱਸ ਦਈਏ ਕਿ ਸੋਮਵਾਰ ਨੂੰ ਫੌਜ, ਹਵਾਈ ਸੈਨਾ, ਆਈਟੀਬੀਪੀ ਅਤੇ ਐਨਡੀਆਰਐਫ ਦੀਆਂ ਟੀਮਾਂ ਨੇ 12 ਘੰਟੇ ਤੱਕ ਬਚਾਅ ਕਾਰਜ ਚਲਾਇਆ। ਇਸ ਵਿੱਚ ਤਿੰਨ ਹੈਲੀਕਾਪਟਰਾਂ ਅਤੇ ਰੱਸੀ ਦੀ ਮਦਦ ਨਾਲ 33 ਲੋਕਾਂ ਨੂੰ ਬਚਾਇਆ ਗਿਆ। ਬਚਾਅ ਦੌਰਾਨ ਸੁਰੱਖਿਆ ਬੈਲਟ ਟੁੱਟਣ ਕਾਰਨ ਹੈਲੀਕਾਪਟਰ ਤੋਂ ਹੇਠਾਂ ਡਿੱਗਣ ਕਾਰਨ ਇਕ ਵਿਅਕਤੀ ਦੀ ਮੌਤ ਹੋ ਗਈ। ਹਨੇਰੇ ਅਤੇ ਧੁੰਦ ਕਾਰਨ ਕਾਰਵਾਈ ਨੂੰ ਰੱਦ ਕਰ ਦਿੱਤਾ ਗਿਆ। ਹੁਣ ਤੱਕ ਕੁੱਲ ਤਿੰਨ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਪ੍ਰਸ਼ਾਸਨ ਵੱਲੋਂ ਇੱਕ ਦੀ ਪੁਸ਼ਟੀ ਨਹੀਂ ਕੀਤੀ ਗਈ ਹੈ। 12 ਲੋਕ ਜ਼ਖਮੀ ਹਨ।
ਝਾਰਖੰਡ ਹਾਈ ਕੋਰਟ ਦੇ ਚੀਫ਼ ਜਸਟਿਸ ਡਾਕਟਰ ਰਵੀ ਰੰਜਨ ਅਤੇ ਜਸਟਿਸ ਐਸਐਨ ਪ੍ਰਸਾਦ ਦੀ ਅਦਾਲਤ ਨੇ ਦੇਵਘਰ ਵਿੱਚ ਰੋਪਵੇਅ ਹਾਦਸੇ ਦਾ ਖ਼ੁਦ ਨੋਟਿਸ ਲਿਆ ਹੈ। ਅਦਾਲਤ ਨੇ ਰਾਜ ਸਰਕਾਰ ਤੋਂ 25 ਅਪ੍ਰੈਲ ਨੂੰ ਪੂਰੇ ਮਾਮਲੇ ਦੀ ਜਾਂਚ ਰਿਪੋਰਟ ਮੰਗੀ ਹੈ।
ਦੱਸ ਦਈਏ ਕਿ ਰਾਮਨਵਮੀ ਦੀ ਪੂਜਾ ਅਤੇ ਦਰਸ਼ਨਾਂ ਲਈ ਐਤਵਾਰ ਨੂੰ ਇੱਥੇ ਸੈਂਕੜੇ ਸੈਲਾਨੀ ਪੁੱਜੇ ਹੋਏ ਸਨ। ਹਾਦਸਾ ਐਤਵਾਰ ਸ਼ਾਮ 4 ਵਜੇ ਵਾਪਰਿਆ ਜਦੋਂ ਪਹਾੜ ‘ਤੇ ਬਣੇ ਮੰਦਰ ਵੱਲ 26 ਟਰਾਲੀਆਂ ਇੱਕੋ ਸਮੇਂ ਰਵਾਨਾ ਹੋ ਰਹੀਆਂ ਸਨ। ਜਿਸ ਕਾਰਨ ਤਾਰਾਂ ‘ਤੇ ਅਚਾਨਕ ਲੋਡ ਵੱਧ ਗਿਆ ਅਤੇ ਰੋਲਰ ਟੁੱਟ ਗਿਆ। ਤਿੰਨ ਟਰਾਲੀਆਂ ਪਹਾੜ ਨਾਲ ਟਕਰਾ ਗਈਆਂ। ਇਸ ਕਾਰਨ ਦੋ ਟਰਾਲੀਆਂ ਹੇਠਾਂ ਡਿੱਗ ਗਈਆਂ ਜਿਸ ਕਾਰਣ ਇਹ ਵੱਡਾ ਹਾਦਸਾ ਵਾਪਰਿਆ।