ਚੰਡੀਗੜ੍ਹ ਤੋਂ ਲਗਭਗ 100 ਤੋਂ 150 ਕਿਲੋਮੀਟਰ ਦੂਰ ਕੁਝ ਅਜਿਹੀਆਂ ਅਣਜਾਣ ਥਾਵਾਂ ਹਨ, ਜਿਨ੍ਹਾਂ ਬਾਰੇ ਬਹੁਤ ਘੱਟ ਲੋਕ ਜਾਣਦੇ ਹਨ। ਅਜਿਹੀਆਂ ਕਈ ਅਣਦੇਖੀਆਂ ਥਾਵਾਂ ਹਨ ਜਿਨ੍ਹਾਂ ਬਾਰੇ ਸੈਲਾਨੀਆਂ ਨੂੰ ਸ਼ਾਇਦ ਹੀ ਪਤਾ ਹੋਵੇ। ਮਸ਼ੋਬਰਾ, ਸਾਂਜ ਵੈਲੀ, ਕਲਗਾ, ਤੋਂ ਇਲਾਵਾ ਚੰਡੀਗੜ੍ਹ ਤੋਂ ਲਗਭਗ 110 ਕਿਲੋਮੀਟਰ ਦੀ ਦੂਰੀ ‘ਤੇ ਸਥਿਤ ਚੈਲ ਹਿੱਲ ਸਟੇਸ਼ਨ ਇਕ ਬਹੁਤ ਹੀ ਖੂਬਸੂਰਤ ਪਹਾੜੀ ਜਗ੍ਹਾ ਹੈ।
ਇਥੇ ਦੀ “ਸਾਧੂਪੁਲ ਝੀਲ” ਚੈਲ ਦੀਆ ਦੇਖਣ ਯੋਗ ਸਥਾਨਾਂ ਵਿੱਚੋ ਇਕ ਹੈ। ਇਸ ਸਥਾਨ ਨੇ ਆਪਣੇ ਸ਼ਾਂਤ ਵਾਤਾਵਰਨ ਕਾਰਨ ਸੈਲਾਨੀਆਂ ਵਿੱਚ ਕਾਫੀ ਪ੍ਰਸਿੱਧੀ ਹਾਸਲ ਕੀਤੀ ਹੈ। ਇੱਥੇ ਇੱਕ ਛੋਟਾ ਕੈਫੇ ਹੈ ਜੋ ਮੈਗੀ ਅਤੇ ਬਰੈੱਡ-ਆਮਲੇਟ ਵਰਗੇ ਸਨੈਕਸ ਪਰੋਸਦਾ ਹੈ। ਝੀਲ ਨੂੰ ਦੇਖਦੇ ਹੋਏ ਤੁਸੀਂ ਠੰਡੇ ਪਾਣੀ ‘ਚ ਪੈਰ ਡੁਬੋ ਕੇ ਮੈਗੀ ਦਾ ਮਜ਼ਾ ਲੈ ਸਕਦੇ ਹੋ। ਝੀਲ ਸਾਧੂਪਾਲ ਪਿੰਡ ਵਿੱਚ ਹੈ, ਜੋ ਕਿ ਸੋਲਨ ਅਤੇ ਚੈਲ ਦੇ ਵਿਚਕਾਰ ਸਥਿਤ ਇੱਕ ਛੋਟਾ ਜਿਹਾ ਪਿੰਡ ਹੈ।
ਚੈਲ ਵਿੱਚ ਰਾਜਗੜ੍ਹ ਪਹਾੜੀ ਉੱਤੇ ਸਥਿਤ ਇਹ ਮਹਿਲ 1891 ਵਿੱਚ ਬਣਾਇਆ ਗਿਆ ਸੀ। ਇਹ ਰਾਜਗੜ੍ਹ ਮਹਿਲ ਵਜੋਂ ਵੀ ਜਾਣਿਆ ਜਾਂਦਾ ਹੈ, ਇਸ ਦੇ ਕੁਝ ਇਤਿਹਾਸਕ ਹਿੱਸੇ ਹਨ ਜੋ ਰਾਇਲਟੀ ਨੂੰ ਪ੍ਰਦਰਸ਼ਿਤ ਕਰਦੇ ਹਨ। ਇਹ ਮਹਿਲ ਸੰਘਣੇ ਜੰਗਲ ਦੇ ਵਿਚਕਾਰ ਸਥਿਤ ਹੈ ਅਤੇ ਝੌਂਪੜੀਆਂ ਨਾਲ ਘਿਰਿਆ ਹੋਇਆ ਹੈ। ਇਹ ਚੈਲ ਵਿੱਚ ਸੈਲਾਨੀਆਂ ਦਾ ਪਸੰਦੀਦਾ ਸਥਾਨ ਹੈ।
ਇਸ ਤੋਂ ਇਲਾਵਾ ਜੇਕਰ ਤੁਸੀਂ ਅਡਵੈਂਚਰ ਦਾ ਸ਼ੌਕ ਰੱਖਦੇ ਹੋ, ਤਾਂ ਤੁਸੀਂ ਚੈਲ ਕਾ ਗੌਰਾ ਅਤੇ ਝੱਜਾ ਟਰੈਕਾਂ ਦੀ ਚੋਣ ਕਰ ਸਕਦੇ ਹੋ। ਉੱਚੇ ਪਾਈਨ ਦੇ ਰੁੱਖਾਂ ਨਾਲ ਘਿਰਿਆ, ਇਹ ਟ੍ਰੈਕ ਥੋੜਾ ਚੁਣੌਤੀਪੂਰਨ ਹੋਣ ਦੇ ਨਾਲ-ਨਾਲ ਓਨਾ ਹੀ ਸੁੰਦਰ ਹੈ। ਇਹ ਜਗ੍ਹਾ ਤੁਹਾਡੇ ਦਿਮਾਗ ਨੂੰ ਤਰੋਤਾਜ਼ਾ ਕਰੇਗੀ। ਇੱਥੇ ਕੁਝ ਦੇਰ ਬੈਠ ਕੇ ਕੁਦਰਤ ਦੀ ਸੁੰਦਰਤਾ ਦਾ ਆਨੰਦ ਲਿਆ ਜਾ ਸਕਦਾ ਹੈ।
ਦੱਸ ਦਈਏ ਕਿ ਚੈਲ ਕਿਸੇ ਸਮੇਂ ਮਹਾਰਾਜਾ ਭੁਪਿੰਦਰ ਸਿੰਘ ਦੀ ਗਰਮੀਆਂ ਦੀ ਰਾਜਧਾਨੀ ਸੀ, ਜਿਸ ਨੂੰ ਉਸ ਸਮੇਂ ਕ੍ਰਿਕਟ ਨਾਲ ਬਹੁਤ ਪਿਆਰ ਸੀ। ਉਨ੍ਹਾਂ ਨੇ ਇਸ ਕ੍ਰਿਕਟ ਮੈਦਾਨ ਨੂੰ 7500 ਫੁੱਟ ਦੀ ਉਚਾਈ ‘ਤੇ ਬਣਾਇਆ, ਜਿਸ ਕਾਰਨ ਇਹ ਜਗ੍ਹਾ ਪੂਰੀ ਦੁਨੀਆ ‘ਚ ਸਭ ਤੋਂ ਉੱਚੇ ਕ੍ਰਿਕਟ ਮੈਦਾਨ ਵਜੋਂ ਜਾਣੀ ਜਾਣ ਲੱਗੀ। ਮੈਦਾਨਾਂ ਦੀ ਦੇਖਭਾਲ ਫੌਜ ਦੇ ਅਫਸਰਾਂ ਦੁਆਰਾ ਕੀਤੀ ਜਾਂਦੀ। ਸੈਲਾਨੀ ਇਸ ਦੇ ਆਲੇ-ਦੁਆਲੇ ਘੁੰਮ ਸਕਦੇ ਹਨ ਅਤੇ ਤਸਵੀਰਾਂ ਕਲਿੱਕ ਕਰ ਸਕਦੇ ਹਨ।
