ਦੇਸ਼ ਵਿੱਚ ਬਿਜਲੀ ਸੰਕਟ ਵਧਦਾ ਜਾ ਰਿਹਾ ਹੈ। ਕਰੀਬ 46 ਡਿਗਰੀ ਤਾਪਮਾਨ ਦੇ ਬਾਵਜੂਦ 12 -12 ਘੰਟੇ ਤੱਕ ਕੱਟ ਲੱਗ ਰਹੇ ਹਨ। ਰਿਕਾਰਡਤੋੜ ਗਰਮੀ ਕਾਰਨ ਦੇਸ਼ ਭਰ ਵਿੱਚ ਬਿਜਲੀ ਦੀ ਮੰਗ ਵਧਦੀ ਜਾ ਰਹੀ ਹੈ। ਅਜਿਹੇ ‘ਚ ਦੇਸ਼ ਦੇ ਇਕ ਚੌਥਾਈ ਪਾਵਰ ਪਲਾਂਟ ਬੰਦ ਪਏ ਹਨ। ਪਲਾਂਟ ਕੋਲੇ ਦੀ ਘਾਟ ਕਾਰਨ ਬੰਦ ਪਏ ਹਨ। ਨਤੀਜੇ ਵਜੋਂ 16 ਰਾਜਾਂ ਵਿੱਚ 10 -12 ਘੰਟੇ ਤੱਕ ਦੇ ਬਿਜਲੀ ਕੱਟ ਲੱਗ ਰਹੇ ਹਨ। ਸਰਕਾਰੀ ਰਿਕਾਰਡ ਅਨੁਸਾਰ ਦੇਸ਼ ਭਰ ਵਿੱਚ 10,000 ਮੈਗਾਵਾਟ ਯਾਨੀ 15 ਕਰੋੜ ਯੂਨਿਟ ਬਿਜਲੀ ਦੀ ਕਟੌਤੀ ਹੋ ਰਹੀ ਹੈ।
ਦੇਸ਼ ਦੇ ਕੁੱਲ 173 ਪਾਵਰ ਪਲਾਂਟਾਂ ਵਿੱਚੋਂ 106 ਪਲਾਂਟਾਂ ਵਿੱਚ ਜ਼ੀਰੋ ਤੋਂ 25% ਤੱਕ ਕੋਲਾ ਹੈ। ਅਸਲ ਵਿੱਚ, ਕੋਲਾ ਪਲਾਂਟ ਕੋਲੇ ਦੇ ਸਟਾਕ ਦੇ ਅਨੁਸਾਰ ਬਿਜਲੀ ਉਤਪਾਦਨ ਨੂੰ ਤਹਿ ਕਰਦੇ ਹਨ। ਜਦੋਂ ਸਟਾਕ ਭਰ ਜਾਂਦਾ ਹੈ, ਤਾਂ ਉਤਪਾਦਨ ਪੂਰਾ ਹੋ ਜਾਂਦਾ ਹੈ ਇਕੱਲੇ ਯੂਪੀ ਵਿੱਚ 3 ਹਜ਼ਾਰ ਮੈਗਾਵਾਟ ਤੋਂ ਵੱਧ ਬਿਜਲੀ ਦੀ ਕਮੀ ਹੈ। ਇੱਥੇ 23 ਹਜ਼ਾਰ ਮੈਗਾਵਾਟ ਬਿਜਲੀ ਦੀ ਮੰਗ ਹੈ, ਜਦੋਂ ਕਿ ਸਪਲਾਈ 20 ਹਜ਼ਾਰ ਮੈਗਾਵਾਟ ਹੈ। ਬਿਜਲੀ ਕੱਟਾਂ ਦਾ ਮੁੱਖ ਕਾਰਨ ਦੇਸ਼ ਦੇ ਇੱਕ ਚੌਥਾਈ ਪਾਵਰ ਪਲਾਂਟਾਂ ਦਾ ਬੰਦ ਹੋਣਾ ਹੈ। ਇਨ੍ਹਾਂ ਵਿੱਚੋਂ 50 ਫੀਸਦੀ ਪਲਾਂਟ ਕੋਲੇ ਦੀ ਘਾਟ ਕਾਰਨ ਬੰਦ ਪਏ ਹਨ।
ਕੇਂਦਰੀ ਕੋਲਾ ਅਤੇ ਖਾਨ ਮੰਤਰੀ ਪ੍ਰਹਿਲਾਦ ਜੋਸ਼ੀ ਨੇ ਕਿਹਾ ਕਿ ਦੇਸ਼ ਭਰ ਦੇ ਥਰਮਲ ਪਲਾਂਟਾਂ ਕੋਲ 22 ਮਿਲੀਅਨ ਟਨ ਕੋਲਾ ਹੈ, ਜੋ ਕਿ 10 ਦਿਨਾਂ ਲਈ ਕਾਫੀ ਹੈ। ਅਜਿਹੀ ਸਥਿਤੀ ਵਿੱਚ, ਇਨ੍ਹਾਂ ਨੂੰ ਪੂਰੀ ਸਮਰੱਥਾ ਨਾਲ ਉਤਪਾਦਨ ਕਰਨਾ ਚਾਹੀਦਾ ਹੈ। ਸੀਸੀਐਲ ਦੇ ਪ੍ਰਬੰਧ ਨਿਰਦੇਸ਼ਕ ਪੀਐਮ ਪ੍ਰਸਾਦ ਨੇ ਕਿਹਾ ਕਿ ਪਲਾਂਟਾਂ ਨੂੰ ਰੋਜ਼ਾਨਾ 2.2 ਲੱਖ ਟਨ ਕੋਲਾ ਦਿੱਤਾ ਜਾਵੇਗਾ।
ਦੱਸ ਦਈਏ ਕਿ ਬਿਜਲੀ ਕਟੌਤੀ ਦਾ ਅਸਰ ਹੁਣ ਰਾਸ਼ਟਰੀ ਰਾਜਧਾਨੀ ਦਿੱਲੀ ਵਿਚ ਵੀ ਦੇਖਣ ਨੂੰ ਮਿਲ ਰਿਹਾ ਹੈ। ਦਿੱਲੀ ਸਰਕਾਰ ਨੇ ਕੋਲੇ ਦੀ ਘਾਟ ਦੇ ਡੂੰਘੇ ਹੁੰਦੇ ਸੰਕਟ ਦੇ ਵਿਚਕਾਰ ਮੈਟਰੋ ਅਤੇ ਹਸਪਤਾਲਾਂ ਸਮੇਤ ਕਈ ਜ਼ਰੂਰੀ ਸੰਸਥਾਵਾਂ ਨੂੰ 24×7 ਬਿਜਲੀ ਸਪਲਾਈ ਪ੍ਰਦਾਨ ਕਰਨ ਵਿੱਚ ਅਸਮਰੱਥਾ ਪ੍ਰਗਟਾਈ ਹੈ।
