ਠੇਕੇਦਾਰਾਂ ਨੂੰ ਨਿਰਮਾਣ ਕਾਰਜ ਮਿੱਥੇ ਸਮੇਂ ਵਿਚ ਨੇਪਰੇ ਚਾੜ੍ਹਨ ਦੀ ਹਦਾਇਤ
ਐਸ.ਏ.ਐਸ ਨਗਰ 3 ਮਈ : – ਅਮਿਤ ਤਲਵਾੜ,ਡਿਪਟੀ ਕਮਿਸ਼ਨਰ ਐਸਏਐਸ ਨਗਰ ਵੱਲੋਂ ਅੱਜ ਮੁਹਾਲੀ ਦੇ 3 ਬੀ 2 ਖੇਤਰ ਵਿਖੇ ਪੀ ਐਚ ਸੀ ਤੋਂ ਅਪਗਰੇਡ ਹੋ ਕੇ ਸੀ ਐੱਚ ਸੀ ਬਣਾਏ ਜਾ ਰਹੇ ਹਸਪਤਾਲ ਦੇ ਨਿਰਮਾਣ ਕਾਰਜਾਂ ਦਾ ਜਾਇਜ਼ਾ ਲਿਆ l ਉਨ੍ਹਾਂ ਵੱਲੋਂ ਪੰਜਾਬ ਹੈਲਥ ਸਿਸਟਮ ਕਾਰਪੋਰੇਸ਼ਨ ਦੇ ਐਕਸੀਅਨ ਅਤੇ ਠੇਕੇਦਾਰ ਨੂੰ ਮੌਕੇ ਤੇ ਬੁਲਾ ਕੇ ਇਹ ਹਦਾਇਤ ਕੀਤੀ ਗਈ ਕਿ ਇਸ ਨਿਰਮਾਣ ਕਾਰਜ ਨੂੰ ਮਿੱਥੇ ਸਮੇਂ ਵਿੱਚ ਨੇਪਰੇ ਚਾੜ੍ਹਿਆ ਜਾਵੇ ਤਾਂ ਜੋ ਮਿਆਰੀ ਸਿਹਤ ਸਹੂਲਤਾਂ ਇਸ ਸੀ ਐਸ ਸੀ ਰਾਹੀਂ ਇਲਾਕੇ ਦੇ ਲੋਕਾਂ ਨੂੰ ਮੁਹੱਈਆ ਕਰਵਾਈਆਂ ਜਾ ਸਕਣ l
ਸ੍ਰੀ ਅਮਿਤ ਤਲਵਾੜ ਨੇ ਠੇਕੇਦਾਰਾਂ ਨੂੰ ਇਹ ਹਦਾਇਤ ਕੀਤੀ ਕਿ ਨਿਰਮਾਣ ਕਾਰਜ ਜੰਗੀ ਪੱਧਰ ਤੇ ਜਾਰੀ ਰਹੇ ਪਰ ਨਿਰਮਾਣ ਕਾਰਜ ਵਾਲੇ ਖੇਤਰ ਨੂੰ ਕੋਈ ਦੀਵਾਰ ਜਾਂ ਪਰਦਾ ਕਰਕੇ ਮੌਜੂਦਾ ਪੀ ਐਚ ਸੀ ਨਾਲੋਂ ਵੱਖਰਾ ਕੀਤਾ ਜਾਵੇ ਤਾਂ ਜੋ ਇਲਾਜ ਲਈ ਇੱਥੇ ਆਉਣ ਵਾਲੇ ਮਰੀਜ਼ਾਂ ਨੂੰ ਕਿਸੇ ਤਰ੍ਹਾਂ ਦੀ ਦਿੱਕਤ ਨਾ ਪੇਸ਼ ਆਵੇ l ਇਸ ਮੌਕੇ ਤੇ ਮੌਜੂਦ ਸਿਵਲ ਸਰਜਨ ਡਾ ਆਦਰਸ਼ਪਾਲ ਕੌਰ ਨੂੰ ਡਿਪਟੀ ਕਮਿਸ਼ਨਰ ਵੱਲੋਂ ਇਹ ਹਦਾਇਤ ਕੀਤੀ ਗਈ ਕਿ ਜਦੋਂ ਤਕ ਸੀ ਐਚ ਸੀ ਦਾ ਨਿਰਮਾਣ ਕਾਰਜ ਮੁਕੰਮਲ ਨਹੀਂ ਹੁੰਦਾ ਤਦੋਂ ਤਕ ਇਸ ਨੂੰ ਪੀ ਐਚ ਸੀ ਵਜੋਂ ਹੀ ਜਾਰੀ ਰੱਖਿਆ ਜਾਵੇ ਅਤੇ ਡਾਕਟਰਾਂ ਦੇ ਬੈਠਣ ਦੇ ਨਾਲ ਨਾਲ ਮਰੀਜ਼ਾਂ ਦੀ ਸਹੂਲਤ ਲਈ ਹਰ ਤਰ੍ਹਾਂ ਦਾ ਪ੍ਰਬੰਧ ਇਸ ਥਾਂ ਤੇ ਯਕੀਨੀ ਬਣਾਇਆ ਜਾਵੇ l ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਸਿਵਲ ਸਰਜਨ ਨੂੰ ਇਹ ਹਦਾਇਤ ਵੀ ਕੀਤੀ ਕਿ ਸੀ ਐੱਚ ਸੀ ਵਜੋਂ ਅਪਗਰੇਡ ਹੋਣ ਤੋਂ ਬਾਅਦ ਇੱਥੇ ਤੈਨਾਤ ਕੀਤੇ ਜਾਣ ਵਾਲੇ ਡਾਕਟਰ ਅਤੇ ਹੋਰ ਜ਼ਰੂਰੀ ਸਾਜ਼ੋ ਸਾਮਾਨ ਅਤੇ ਸਹੂਲਤਾਂ ਦੇ ਬਾਰੇ ਵਿਸਤ੍ਰਿਤ ਡਿਮਾਂਡ ਡਰਾਫਟ ਤਿਆਰ ਕਰਕੇ ਸਿਹਤ ਮਹਿਕਮੇ ਦੇ ਉੱਚ ਅਧਿਕਾਰੀਆਂ ਨੂੰ ਭੇਜ ਦਿੱਤਾ ਜਾਵੇ l ਇਸ ਮਗਰੋਂ ਡਿਪਟੀ ਕਮਿਸ਼ਨਰ ਵੱਲੋਂ ਸਿਵਲ ਹਸਪਤਾਲ ਵਿਖੇ ਜਾ ਕੇ ਪੀ ਐਸ ਏ ਆਕਸੀਜਨ ਪਲਾਂਟ ਦੀ ਵਰਕਿੰਗ ਦਾ ਜਾਇਜ਼ਾ ਵੀ ਲਿਆ l
ਇਸ ਮੌਕੇ ਡਿਪਟੀ ਕਮਿਸ਼ਨਰ ਨਾਲ ਉਚੇਚੇ ਤੌਰ ਤੇ ਸਿਵਲ ਸਰਜਨ ਸ੍ਰੀਮਤੀ ਆਦਰਸ਼ਪਾਲ ਕੌਰ,ਪ੍ਰਿੰਸੀਪਲ ਮੈਡੀਕਲ ਕਾਲਜ , ਡਾ ਭਵਨੀਤ ਭਾਰਤੀ ਅਤੇ ਐਸ ਐਮ ਓ ਡਾ ਵਿਜੈ ਭਗਤ ਵੀ ਮੌਜੂਦ ਸਨ l













