ਪੰਜਾਬ ਦੇ ਫ਼ਿਰੋਜ਼ਪੁਰ ਤੋਂ ਰੂਹ ਕੰਬਾਉਂਣ ਵਾਲੀ ਘਟਨਾ ਸਾਹਮਣੇ ਆਈ ਹੈ ਇੱਥੇ ਬਿਜਲੀ ਦਾ ਕਰੰਟ ਲੱਗਣ ਨਾਲ 55 ਸਾਲਾਂ ਵਿਅਕਤੀ ਦੀ ਮੌਤ ਹੋ ਗਈ। ਆਪਣੇ ਪੁੱਤ ਦੀ ਮੌਤ ਦੀ ਖਬਰ ਦੇ ਸਦਮੇ ਨਾਲ ਉਸ ਦੀ ਬਜ਼ੁਰਗ ਮਾਂ ਵੀ ਦੁਨੀਆ ਨੂੰ ਅਲਵਿਦਾ ਕਹਿ ਗਈ ਅਤੇ ਕਿਸਾਨ ਦੀ ਧੀ ਨੇ ਇਹ ਵੀ ਸਦਮਾ ਨਾ ਸਹਿਣ ਕਰਦੇ ਹੋਏ ਮੌਕੇ ਤੇ ਦਮ ਤੋੜ ਦਿੱਤਾ। ਇਥੇ ਇੱਕੋ ਦਿਨ ‘ਚ ਇੱਕੋ ਘਰ ‘ਚੋਂ 3 ਅਰਥੀਆਂ ਨਿਕਲਣ ਨਾਲ ਇਲਾਕੇ ਵਿੱਚ ਸੋਗ ਦੀ ਲਹਿਰ ਦੌੜ ਗਈ ਹੈ
ਦੱਸ ਦਈਏ ਕਿ ਮਾਮਲਾ ਫਿਰੋਜ਼ਪੁਰ ਦੇ ਪਿੰਡ ਤਾਰੇ ਵਾਲਾ ਦਾ ਹੈ। ਇੱਥੇ ਖੇਤੀ ਕਰਨ ਵਾਲੇ 55 ਸਾਲਾ ਮੰਗਤ ਸਿੰਘ ਦੇ ਪਰਿਵਾਰ ਵਿੱਚ ਉਸ ਦੀ ਬਜ਼ੁਰਗ ਮਾਤਾ ਹੀਰੋ ਬਾਈ ਅਤੇ ਇੱਕ ਪੁੱਤਰ ਤੇ 2 ਧੀਆਂ ਸਨ। ਮੰਗਤ ਸਿੰਘ ਦੀ ਪਤਨੀ ਦਾ ਦੋ ਸਾਲ ਪਹਿਲਾਂ ਦਿਹਾਂਤ ਹੋ ਗਿਆ ਸੀ। ਸ਼ੁੱਕਰਵਾਰ ਨੂੰ ਮੰਗਤ ਸਿੰਘ ਘਰ ਤੋਂ ਖੇਤਾਂ ‘ਚ ਲੱਗੇ ਟੁੱਲੂ ਪੰਪ ‘ਤੇ ਨਹਾਉਣ ਲਈ ਗਿਆ ਸੀ। ਨਹਾਉਂਦੇ ਸਮੇਂ ਬਿਜਲੀ ਦਾ ਕਰੰਟ ਲੱਗਣ ਕਾਰਨ ਮੰਗਤ ਸਿੰਘ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ।
ਪਿੰਡ ਵਾਸੀਆਂ ਨੇ ਟੁੱਲੂ ਪੰਪ ‘ਤੇ ਮੰਗਤ ਸਿੰਘ ਨੂੰ ਮਰਿਆ ਹੋਇਆ ਦੇਖਿਆ ਅਤੇ ਉਸ ਦੇ ਘਰ ਸੂਚਨਾ ਦਿੱਤੀ ਤਾਂ ਮੰਗਤ ਸਿੰਘ ਦੀ ਬਜ਼ੁਰਗ ਮਾਤਾ ਹੀਰੋ ਬਾਈ ਵਿਹੜੇ ‘ਚ ਹੀ ਬੇਹੋਸ਼ ਹੋ ਗਈ। ਪਿੰਡ ਵਾਸੀ ਉਸ ਨੂੰ ਤੁਰੰਤ ਨਜ਼ਦੀਕੀ ਨਿੱਜੀ ਹਸਪਤਾਲ ਲੈ ਗਏ ਜਿੱਥੇ ਡਾਕਟਰਾਂ ਨੇ ਹੀਰੋ ਬਾਈ ਨੂੰ ਮ੍ਰਿਤਕ ਐਲਾਨ ਦਿੱਤਾ।
ਹੀਰੋ ਬਾਈ ਨੂੰ ਮ੍ਰਿਤਕ ਐਲਾਨੇ ਜਾਣ ਤੋਂ ਬਾਅਦ ਪਿੰਡ ਵਾਸੀ ਉਸ ਦੀ ਲਾਸ਼ ਨੂੰ ਹਸਪਤਾਲ ਤੋਂ ਪਿੰਡ ਦੇ ਘਰ ਲੈ ਗਏ। ਜਿਵੇ ਹੀ
ਮੰਗਤ ਸਿੰਘ ਦੀ 15 ਸਾਲਾ ਧੀ ਲਖਵਿੰਦਰ ਕੌਰ ਨੂੰ ਪਿਤਾ ਤੋਂ ਬਾਅਦ ਆਪਣੀ ਦਾਦੀ ਹੀਰੋ ਬਾਈ ਦੀ ਮੌਤ ਦਾ ਪਤਾ ਲੱਗਾ ਤਾਂ ਲਖਵਿੰਦਰ ਕੌਰ ਵੀ ਬੇਹੋਸ਼ ਹੋ ਗਈ। ਜਿਸ ਤੋਂ ਬਾਅਦ ਲਖਵਿੰਦਰ ਕੌਰ ਨੂੰ ਹਸਪਤਾਲ ਲਿਆਂਦਾ ਗਿਆ। ਇਲਾਜ ਦੌਰਾਨ ਲਖਵਿੰਦਰ ਕੌਰ ਦੀ ਸਿਹਤ ਲਗਾਤਾਰ ਵਿਗੜਦੀ ਰਹੀ ਅਤੇ ਅੰਤ ਵਿਚ ਉਸ ਦੀ ਵੀ ਮੌਤ ਹੋ ਗਈ। ਲਖਵਿੰਦਰ ਕੌਰ ਦੀ ਮਾਤਾ ਦਾ ਦੋ ਸਾਲ ਪਹਿਲਾਂ ਦਿਹਾਂਤ ਹੋ ਗਿਆ ਸੀ।