ਭਾਰਤੀ ਨਿੱਜੀ ਟੈਲੀਕਾਮ ਕੰਪਨੀਆਂ ਇੱਕ ਵਾਰ ਫਿਰ ਮੋਬਾਈਲ ਉਪਭੋਗਤਾਵਾਂ ਨੂੰ ਝਟਕਾ ਦੇਣ ਲਈ ਤਿਆਰ ਹਨ। ਇੱਕ ਨਵੀਂ ਰਿਪੋਰਟ ਵਿੱਚ ਇਹ ਜਾਣਕਾਰੀ ਸਾਹਮਣੇ ਆਈ ਹੈ ਕਿ ਰਿਲਾਇੰਸ ਜੀਓ, ਵੋਡਾਫੋਨ ਆਈਡੀਆ ਅਤੇ ਏਅਰਟੈੱਲ 2022 ਦੀਵਾਲੀ ਤੱਕ ਆਪਣੇ ਪ੍ਰੀਪੇਡ ਪਲਾਨ ਦੀਆਂ ਕੀਮਤਾਂ ਵਧਾ ਸਕਦੇ ਹਨ। ਨਵੀਂ ਕੀਮਤ ਅਨੁਸਾਰ ਵਾਧੇ ਤੋਂ ਬਾਅਦ ਪ੍ਰੀਪੇਡ ਟੈਰਿਫ 10-12 ਫੀਸਦੀ ਮਹਿੰਗਾ ਹੋ ਸਕਦਾ ਹੈ।
ਪ੍ਰੀ-ਪੇਡ ਪਲਾਨ ਦੀ ਕੀਮਤ 10% ਤੋਂ 12% ਵੱਧਣ ਬਾਅਦ ਜਿਸ ਪਲਾਨ ਦੀ ਕੀਮਤ 100 ਰੁਪਏ ਹੈ ਉਸਦੀ ਦੀ ਕੀਮਤ 110 ਤੋਂ 112 ਰੁਪਏ ਹੋ ਸਕਦੀ ਹੈ। ਕਿਹਾ ਜਾ ਰਿਹਾ ਹੈ ਕਿ ਮਹਿੰਗੇ ਟੈਰਿਫ ਪਲਾਨ ਤੋਂ ਦੂਰਸੰਚਾਰ ਕੰਪਨੀਆਂ ਨੂੰ ਫਾਇਦਾ ਹੋਵੇਗਾ ਅਤੇ ਉਨ੍ਹਾਂ ਦੀ ਪ੍ਰਤੀ ਉਪਭੋਗਤਾ ਔਸਤ ਆਮਦਨ (ARPU) 10% ਵਧ ਜਾਵੇਗੀ। ਇਸ ਵਾਧੇ ਤੋਂ ਬਾਅਦ Airtel, Jio ਅਤੇ Vi ਦਾ ARPU ਕ੍ਰਮਵਾਰ 200 ਰੁਪਏ, 185 ਰੁਪਏ ਅਤੇ 135 ਰੁਪਏ ਹੋ ਜਾਵੇਗਾ। ਦੱਸ ਦੇਈਏ ਕਿ ਇਸ ਤੋਂ ਪਹਿਲਾਂ ਦੇਸ਼ ਦੀਆਂ ਇਨ੍ਹਾਂ ਤਿੰਨ ਵੱਡੀਆਂ ਟੈਲੀਕਾਮ ਕੰਪਨੀਆਂ ਨੇ ਨਵੰਬਰ 2021 ਵਿੱਚ ਵੀ ਟੈਰਿਫ ਦੀਆਂ ਕੀਮਤਾਂ ਵਿੱਚ ਵਾਧਾ ਕੀਤਾ ਸੀ।
ਨਵੰਬਰ 2021 ਵਿੱਚ ਏਅਰਟੈੱਲ ਅਤੇ ਵੋਡਾਫੋਨ ਆਈਡੀਆ ਨੇ ਐਲਾਨ ਕੀਤਾ ਸੀ ਕਿ ਦੂਰਸੰਚਾਰ ਕੰਪਨੀਆਂ ਆਪਣੇ ਪ੍ਰੀਪੇਡ ਟੈਰਿਫ ਪਲਾਨ ਵਿੱਚ 20-25 ਪ੍ਰਤੀਸ਼ਤ ਵਾਧਾ ਕਰਨਗੀਆਂ। ਇਸ ਤੋਂ ਬਾਅਦ ਰਿਲਾਇੰਸ ਜਿਓ ਨੇ ਵੀ ਅਜਿਹਾ ਹੀ ਕਦਮ ਚੁੱਕਿਆ ਹੈ। ਇਸ ਫੈਸਲੇ ਤੋਂ ਬਾਅਦ 79 ਰੁਪਏ ਵਰਗੇ ਸਸਤੇ ਪਲਾਨ ਦੀ ਕੀਮਤ 99 ਰੁਪਏ ਹੋ ਗਈ । ਏਅਰਟੈੱਲ ਦੇ 698 ਰੁਪਏ ਵਾਲੇ ਪਲਾਨ ਵਿੱਚ ਹਰ ਦਿਨ 2 ਜੀਬੀ ਡੇਟਾ ਮਿਲਦਾ ਸੀ ਅਤੇ ਇਸਦੀ ਵੈਧਤਾ 84 ਦਿਨਾਂ ਦੀ ਸੀ। ਪਰ ਵਾਧੇ ਤੋਂ ਬਾਅਦ ਇਸ ਪਲਾਨ ਦੀ ਕੀਮਤ 839 ਰੁਪਏ ਹੋ ਗਈ।