ਗਲੋਬਲ ਮਾਰਕੀਟ ਵਿੱਚ ਵਿਕਣ ਵਾਲੇ 90 ਤੋਂ 95% ਹੀਰਿਆਂ ਦੀ ਕਟਿੰਗ ਅਤੇ ਪੋਲਿਸ਼ਿੰਗ ਭਾਰਤ ਵਿੱਚ ਕੀਤੀ ਜਾਂਦੀ ਹੈ। ਅਮਰੀਕਾ ਸਮੇਤ ਦੁਨੀਆ ਭਰ ਦੇ ਬਾਜ਼ਾਰਾਂ ‘ਚ ਭਾਰਤੀ ਲੈਬਾਂ ‘ਚ ਤਿਆਰ ਹੀਰਿਆਂ ਦੀ ਮੰਗ ਵਧ ਰਹੀ ਹੈ। ਮਾਰਕੀਟ ਮਾਹਿਰਾਂ ਅਨੁਸਾਰ ਲੈਬ ਵਿੱਚ ਬਣੇ ਹੀਰਿਆਂ ਤੋਂ ਹੀਰਿਆਂ ਦੇ ਕਾਰੋਬਾਰ ਨੂੰ ਕਾਫੀ ਫਾਇਦਾ ਹੋ ਰਿਹਾ ਹੈ। ਇਨ੍ਹਾਂ ਹੀਰਿਆਂ ਦੇ ਨਿਰਮਾਣ ਵਿੱਚ ਘੱਟ ਕਾਰਬਨ ਫੁਟਪ੍ਰਿੰਟ, ਆਕਾਰ ਅਤੇ ਚੰਗੀ ਕੁਆਲਿਟੀ ਬਹੁਤ ਸਾਰੇ ਖਰੀਦਦਾਰਾਂ ਨੂੰ ਆਕਰਸ਼ਿਤ ਕਰ ਰਹੀ ਹੈ। ਅਮਰੀਕਾ ਇਨ੍ਹਾਂ ਹੀਰਿਆਂ ਦਾ ਸਭ ਤੋਂ ਵੱਡਾ ਖਰੀਦਦਾਰ ਹੈ।
ਦੱਸ ਦਈਏ ਕਿ ਗੁਜਰਾਤ ਦੇ ਸੂਰਤ ਸ਼ਹਿਰ ਨੂੰ ਹੀਰਿਆਂ ਦੀ ਕਟਿੰਗ ਅਤੇ ਪਾਲਿਸ਼ ਕਰਨ ਦੇ ਕਾਰੋਬਾਰ ਦਾ ਕੇਂਦਰ ਮੰਨਿਆ ਜਾਂਦਾ ਹੈ।ਪਿਛਲੇ ਸਾਲ ਭਾਰਤ ਤੋਂ 25.47 ਅਰਬ ਅਮਰੀਕੀ ਡਾਲਰ ਦੇ ਕੱਟੇ ਅਤੇ ਪਾਲਿਸ਼ ਕੀਤੇ ਹੀਰੇ ਨਿਰਯਾਤ ਕੀਤੇ ਗਏ ਸਨ। ਹੀਰਾ ਕਾਰੋਬਾਰ ਨੇ ਭਾਰਤ ਦੇ ਜੀਡੀਪੀ ਵਿੱਚ 7.5% ਦਾ ਯੋਗਦਾਨ ਪਾਇਆ। ਭਾਰਤੀ ਹੀਰਾ ਉਦਯੋਗ ਨੇ ਇਸ ਵਿੱਤੀ ਸਾਲ ‘ਚ 24 ਅਰਬ ਡਾਲਰ ਦਾ ਕਾਰੋਬਾਰ ਕਰਨ ਦਾ ਟੀਚਾ ਰੱਖਿਆ ਹੈ। ਪਾਲਿਸ਼ਡ ਹੀਰਿਆਂ ਨੂੰ ਵੇਚਣ ਦਾ ਸਭ ਤੋਂ ਵੱਡਾ ਕਾਰਨ ਫੈਸ਼ਨ ਉਦਯੋਗ ਵਿੱਚ ਇਸਦੀ ਲਗਾਤਾਰ ਵੱਧ ਰਹੀ ਮੰਗ ਹੈ ਕਿਉਕਿ ਲੋਕ ਇਸਨੂੰ ਫੈਸ਼ਨ ਵਜੋਂ ਪਹਿਨਦੇ ਹਨ।
