ਏਸ਼ੀਆ ਕੱਪ ਸ਼ਨੀਵਾਰ ਨੂੰ ਸ਼੍ਰੀਲੰਕਾ ਬਨਾਮ ਅਫਗਾਨਿਸਤਾਨ ਮੈਚ ਨਾਲ ਸ਼ੁਰੂ ਹੋਵੇਗਾ, ਪਰ ਜ਼ਿਆਦਾਤਰ ਕ੍ਰਿਕਟ ਪ੍ਰਸ਼ੰਸਕਾਂ ਲਈ, ਟੂਰਨਾਮੈਂਟ ਦੀ ਅਸਲ ਸ਼ੁਰੂਆਤ ਐਤਵਾਰ ਸ਼ਾਮ 7:30 ਵਜੇ ਹੋਵੇਗੀ। ਉਸ ਦਿਨ ਫਾਈਨਲ ਤੋਂ ਪਹਿਲਾਂ ਫਾਈਨਲ ਵਰਗਾ ਮੈਚ ਹੋਵੇਗਾ। ਯਾਨੀ ਭਾਰਤ ਅਤੇ ਪਾਕਿਸਤਾਨ ਵਿਚਾਲੇ ਵੱਡੀ ਲੜਾਈ। ਇਸ ਤੋਂ ਬਾਅਦ ਭਾਵੇਂ ਟੂਰਨਾਮੈਂਟ ‘ਚ ਦੋਵੇਂ ਟੀਮਾਂ ਆਹਮੋ-ਸਾਹਮਣੇ ਹੋਣਗੀਆਂ ਪਰ ਪਹਿਲੇ ਮੈਚ ‘ਚ ਰੋਮਾਂਚ ਆਪਣੇ ਸਿਖਰ ‘ਤੇ ਰਹੇਗਾ। ਕਰੀਬ 10 ਮਹੀਨਿਆਂ ਬਾਅਦ ਦੋਵੇਂ ਟੀਮਾਂ ਅੰਤਰਰਾਸ਼ਟਰੀ ਕ੍ਰਿਕਟ ‘ਚ ਆਹਮੋ-ਸਾਹਮਣੇ ਹੋ ਰਹੀਆਂ ਹਨ। ਇਸ ਤੋਂ ਪਹਿਲਾਂ ਦੋਵਾਂ ਵਿਚਾਲੇ ਟੀ-20 ਵਿਸ਼ਵ ਕੱਪ ‘ਚ ਆਖਰੀ ਮੈਚ 24 ਅਕਤੂਬਰ 2021 ਨੂੰ ਹੋਇਆ ਸੀ।
ਏਸ਼ੀਆ ਕੱਪ ‘ਚ ਭਾਰਤ ਅਤੇ ਪਾਕਿਸਤਾਨ ਵਿਚਾਲੇ ਕੁੱਲ ਮਿਲਾ ਕੇ 14 ਮੈਚ (ODI ਅਤੇ T20) ਖੇਡੇ ਗਏ ਹਨ। ਭਾਰਤ ਨੇ 8 ਮੈਚ ਜਿੱਤੇ ਹਨ, ਜਦਕਿ 5 ਹਾਰੇ ਹਨ। ਇੱਕ ਮੈਚ ਦਾ ਕੋਈ ਨਤੀਜਾ ਨਹੀਂ ਨਿਕਲਿਆ। ਏਸ਼ੀਆ ਕੱਪ ‘ਚ ਭਾਰਤ ਦੀ ਪਾਕਿਸਤਾਨ ਖਿਲਾਫ ਆਖਰੀ ਹਾਰ 2 ਮਾਰਚ 2014 ਨੂੰ ਹੋਈ ਸੀ। ਉਹ ਏਸ਼ੀਆ ਕੱਪ ਵਨਡੇ ਫਾਰਮੈਟ ਵਿੱਚ ਖੇਡਿਆ ਗਿਆ ਸੀ ਅਤੇ ਪਾਕਿਸਤਾਨ ਨੇ ਭਾਰਤ ਨੂੰ ਇੱਕ ਵਿਕਟ ਨਾਲ ਹਰਾਇਆ ਸੀ। ਉਦੋਂ ਤੋਂ ਲੈ ਕੇ ਹੁਣ ਤੱਕ ਭਾਰਤ ਨੇ ਤਿੰਨੋਂ ਮੌਕਿਆਂ ‘ਤੇ ਜਿੱਤ ਦਰਜ ਕੀਤੀ ਹੈ।