ਦਿੱਲੀ ‘ਚ ਬੀਤੇ ਦਿਨ ਵੱਡਾ ਹਾਦਸਾ ਵਾਪਰ ਗਿਆ। ਡੀਐਨਡੀ ਪੁਲ ਨੇੜੇ ਗ੍ਰੇਟਰ ਨੋਇਡਾ ਤੋਂ ਮੂਰਤੀ ਵਿਸਰਜਨ ਕਰਨ ਆਏ ਪੰਜ ਲੜਕੇ ਯਮੁਨਾ ਵਿੱਚ ਡੁੱਬ ਗਏ। ਸੂਚਨਾ ਮਿਲਦੇ ਹੀ ਜ਼ਿਲ੍ਹੇ ‘ਚ ਹੜਕੰਪ ਮਚ ਗਿਆ। ਪੁਲਸ ਤੋਂ ਇਲਾਵਾ ਫਾਇਰ ਬ੍ਰਿਗੇਡ, ਗੋਤਾਖੋਰ ਅਤੇ ਡਿਜ਼ਾਸਟਰ ਮੈਨੇਜਮੈਂਟ ਦੀ ਟੀਮ ਮੌਕੇ ‘ਤੇ ਪਹੁੰਚ ਗਈ ਅਤੇ ਬਚਾਅ ਕਾਰਜ ਸ਼ੁਰੂ ਕੀਤਾ ਗਿਆ। ਸ਼ਾਮ ਤੱਕ ਬਚਾਅ ਟੀਮਾਂ ਨੇ ਯਮੁਨਾ ਵਿੱਚੋਂ ਇੱਕ-ਇੱਕ ਕਰਕੇ ਪੰਜਾਂ ਲੜਕਿਆਂ ਦੀਆਂ ਲਾਸ਼ਾਂ ਬਰਾਮਦ ਕੀਤੀਆਂ। ਸਾਰੀਆਂ ਲਾਸ਼ਾਂ ਨੂੰ ਪੋਸਟਮਾਰਟਮ ਲਈ ਸਫਦਰਜੰਗ ਹਸਪਤਾਲ ਭੇਜ ਦਿੱਤਾ ਗਿਆ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਸਾਰੇ ਮ੍ਰਿਤਕ ਨੋਇਡਾ ਦੇ ਪਿੰਡ ਸਲਾਰਪੁਰ ਦੇ ਰਹਿਣ ਵਾਲੇ ਸਨ। ਸਾਰਿਆਂ ਦੀ ਉਮਰ 17-18 ਸਾਲ ਦੇ ਵਿਚਕਾਰ ਸੀ। ਸਲਾਰਪੁਰ ਪਿੰਡ ਤੋਂ ਕਰੀਬ 18 ਲੋਕਾਂ ਦਾ ਇੱਕ ਜਥਾ ਭਗਵਾਨ ਕ੍ਰਿਸ਼ਨ ਦੀ ਮੂਰਤੀ ਲੈ ਕੇ ਇੱਥੇ ਵਿਸਰਜਨ ਕਰਨ ਆਇਆ ਸੀ। ਉਹ ਵਿਸਰਜਨ ਤੋਂ ਬਾਅਦ ਵਾਪਸ ਜਾ ਰਹੇ ਸਨ। ਇਸ ਦੌਰਾਨ ਮੂਰਤੀ ਨੂੰ ਨਦੀ ਦੇ ਵਿਚਕਾਰ ਫਸਿਆ ਦੇਖ ਕੇ ਵਿਸਰਜਨ ਲਈ ਆਏ ਗਰੁੱਪ ਦੇ 5 ਲੜਕਿਆਂ ਨੇ ਮੂਰਤੀ ਨੂੰ ਸਹੀ ਢੰਗ ਨਾਲ ਵਿਸਰਜਨ ਕਰਨ ਦੀ ਕੋਸ਼ਿਸ਼ ਕਰਨੀ ਸ਼ੁਰੂ ਕਰ ਦਿੱਤੀ। ਇਸ ਦੌਰਾਨ ਯਮੁਨਾ ਨਦੀ ‘ਚ ਤੇਜ਼ ਵਹਾਅ ਆਇਆ ਅਤੇ ਪੰਜ ਲੜਕੇ ਯਮੁਨਾ ਦੇ ਪਾਣੀ ਵਿੱਚ ਰੁੜ੍ਹ ਗਏ।