ਭਾਰਤੀ ਉਦਯੋਗਪਤੀ ਸਾਇਰਸ ਮਿਸਤਰੀ ਦਾ ਐਤਵਾਰ ਨੂੰ ਇੱਕ ਕਾਰ ਹਾਦਸੇ ‘ਚ ਦੇਹਾਂਤ ਹੋ ਗਿਆ। ਸੋਮਵਾਰ ਸਵੇਰੇ ਡਾਕਟਰਾਂ ਦੀ ਟੀਮ ਨੇ ਮਿਸਤਰੀ ਦਾ ਪੋਸਟਮਾਰਟਮ ਕੀਤਾ। ਕਾਰ ਹਾਦਸੇ ਵਿੱਚ ਮਾਰੇ ਗਏ ਸਾਇਰਸ ਮਿਸਤਰੀ ਅਤੇ ਜਹਾਂਗੀਰ ਪੰਡੋਲ ਦੀਆਂ ਲਾਸ਼ਾਂ ਨੂੰ ਜੇਜੇ ਹਸਪਤਾਲ ਲਿਆਂਦਾ ਗਿਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਦੋਵਾਂ ਦੀਆ ਮ੍ਰਿਤਕ ਦੇਹਾਂ ਨੂੰ ਮੁਰਦਾਘਰ ‘ਚ ਰੱਖਿਆ ਗਿਆ ਹੈ। ਦੱਸ ਦਈਏ ਕਿ ਟਾਟਾ ਗਰੁੱਪ ਦੇ ਸਾਬਕਾ ਚੇਅਰਮੈਨ ਸਾਇਰਸ ਮਿਸਤਰੀ ਦਾ ਅੰਤਿਮ ਸੰਸਕਾਰ ਮੰਗਲਵਾਰ ਨੂੰ ਕੀਤਾ ਜਾਵੇਗਾ। ਜਾਣਕਾਰੀ ਮੁਤਾਬਕ ਮੰਗਲਵਾਰ ਨੂੰ ਸਵੇਰੇ 10 ਵਜੇ ਮੁੰਬਈ ਦੇ ਵਰਲੀ ਸ਼ਮਸ਼ਾਨਘਾਟ ‘ਚ ਉਨ੍ਹਾਂ ਨੂੰ ਅੰਤਿਮ ਵਿਦਾਈ ਦਿੱਤੀ ਜਾਵੇਗੀ।
ਦੱਸਿਆ ਜਾ ਰਿਹਾ ਹੈ ਕਿ ਕਾਰ ‘ਚ ਸਾਇਰਸ ਮਿਸਤਰੀ ਤੋਂ ਇਲਾਵਾ ਜਹਾਂਗੀਰ ਪਾਂਡੋਲ, ਗਾਇਨੀਕੋਲੋਜਿਸਟ ਅਨੀਤਾ ਪਾਂਡੋਲ ਅਤੇ ਉਸ ਦਾ ਪਤੀ ਡੇਰੀਅਸ ਪਾਂਡੋਲ ਸਵਾਰ ਸਨ। ਅਨਾਇਤਾ ਕਾਰ ਚਲਾ ਰਹੀ ਸੀ। ਉਸਦਾ ਪਤੀ ਅੱਗੇ ਬੈਠਾ ਸੀ। ਜਦੋਂ ਕਿ ਸਾਇਰਸ ਮਿਸਤਰੀ ਅਤੇ ਜਹਾਂਗੀਰ ਪਿਛਲੀ ਸੀਟ ‘ਤੇ ਬੈਠੇ ਸਨ। ਇਸ ਸੜਕ ਹਾਦਸੇ ‘ਚ ਜ਼ਖਮੀ ਹੋਏ ਗਾਇਨੀਕੋਲੋਜਿਸਟ ਅਨਾਇਤਾ ਪਾਂਡੋਲ ਅਤੇ ਉਨ੍ਹਾਂ ਦੇ ਜਖਮੀ ਪਤੀ ਨੂੰ ਗੁਜਰਾਤ ਦੇ ਵਾਪੀ ਤੋਂ ਮੁੰਬਈ ਲਿਜਾਇਆ ਗਿਆ ਹੈ। ਹਾਦਸੇ ਤੋਂ ਬਾਅਦ ਦੋਵਾਂ ਨੂੰ ਵਾਪੀ ਸ਼ਹਿਰ ਦੇ ਇੱਕ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ। ਇਕ ਅਧਿਕਾਰੀ ਨੇ ਦੱਸਿਆ, ”ਦੋਵੇਂ ਜ਼ਖਮੀਆਂ ਨੂੰ ਸੜਕ ਰਾਹੀਂ ਮੁੰਬਈ ਲਿਜਾਇਆ ਗਿਆ ਹੈ, ਜਿੱਥੇ ਉਨ੍ਹਾਂ ਦਾ ਬਿਹਤਰ ਇਲਾਜ ਕੀਤਾ ਜਾਵੇਗਾ।”