ਮੋਹਾਲੀ 6 ਸਤੰਬਰ 2022 – ਦੇਸ਼ ਅੰਦਰ ਜਾਅਲੀ ਯੂਨੀਵਰਸਿਟੀਆਂ ਤੋਂ ਜਾਅਲੀ ਡਿਗਰੀਆਂ, ਸਰਟੀਫਿਕੇਟ ਲਿਆ ਕੇ ਪੰਜਾਬ ਦੇ ਹਰ ਵਿਭਾਗ ਵਿੱਚ ਨੌਕਰੀਆਂ ਕਰਨ ਵਾਲੇ ਆਮ ਮਿਲ ਸਕਦੇ ਹਨ। ਇਸ ਸਬੰਧੀ ਪ੍ਰੈਸ ਬਿਆਨ ਜਾਰੀ ਕਰਦਿਆਂ ਗੌਰਮਿੰਟ ਟੀਚਰ ਯੂਨੀਅਨ ਪੰਜਾਬ ਦੇ ਸਾਬਕਾ ਸੂਬਾ ਜਰਨਲ ਸਕੱਤਰ ਸੁੱਚਾ ਸਿੰਘ ਖੱਟੜਾ, ਸਾਬਕਾ ਸੂਬਾ ਪ੍ਰੈਸ ਸਕੱਤਰ ਹਰਨੇਕ ਸਿੰਘ ਮਾਵੀ ਨੇ ਸਾਂਝੇ ਤੌਰ ਤੇ ਕਿਹਾ ਕਿ ਸਿੱਖਿਆ ਵਿਭਾਗ ਅੰਦਰ ਅਜਿਹੇ ਜਾਅਲੀ ਡਿਗਰੀਆਂ,ਸਰਟੀਫਿਕੇਟ ਵਾਲਿਆਂ ਦੀ ਗਿਣਤੀ ਸਭ ਤੋਂ ਵਧੇਰੇ ਹੈ ਅਤੇ ਅਜਿਹੇ ਜੁਗਾੜੀ ਕਈ-ਕਈ ਵਿਭਾਗੀ ਤਰੱਕੀਆਂ ਵੀ ਲੈ ਗਏ ਹਨ।
ਅਨੇਕਾਂ ਬਾਰੇ ਚਰਚਾ ਹੈ ਕਿ ਉਹਨਾਂ ਦੀਆਂ ਨਿਯੁਕਤੀਆਂ ਵੀ ਜਾਅਲੀ ਹਨ। ਸਾਬਕਾ ਸੂਬਾਈ ਅਧਿਆਪਕ ਆਗੂਆਂ ਨੇ ਕਿਹਾ ਕਿ ਜੇਕਰ ਸਰਕਾਰ ਨਿਰਪੱਖ ਤੇ ਸਮਾਂਬੱਧ ਜਾਂਚ ਕਰਵਾਏ ਅਤੇ ਦੋਸ਼ੀ ਪਾਏ ਜਾਣ ਵਾਲੇ ਮੁਲਾਜ਼ਮਾਂ ਨੂੰ ਬਾਹਰ ਦਾ ਰਸਤਾ ਵਿਖਾਵੇ ਤਾਂ ਇੱਕ ਪਾਸੇ ਤਾਂ ਸਰਕਾਰੀ ਖਜਾਨੇ ਵਿੱਚੋਂ ਇਹਨਾਂ ਨੂੰ ਤਨਖਾਹ ਦੇ ਰੂਪ ਵਿੱਚ ਹੋ ਰਹੀ ਖਜਾਨੇ ਦੀ ਕਰੋੜਾਂ ਰੁਪਏ ਦੀ ਨਜ਼ਾਇਜ਼ ਮਾਇਨਿੰਗ ਰੁਕ ਸਕਦੀ ਹੈ, ਨਾਲ ਹੀ ਦੂਜੇ ਪਾਸੇ ਅਜਿਹੇ ਮੁਲਾਜ਼ਮਾਂ ਤੋਂ ਤਿੰਨ ਗੁਣਾਂ ਨਵੇਂ ਮੁਲਾਜ਼ਮ ਭਰਤੀ ਕੀਤੇ ਜਾ ਸਕਦੇ ਹਨ।
ਮੁਲਾਜ਼ਮ ਆਗੂਆਂ ਨੇ ਸੁਝਾਅ ਦਿੱਤਾ ਕਿ ਜੇਕਰ ਸਰਕਾਰ ਅਜਿਹੇ ਮੁਲਾਜ਼ਮਾਂ ਨੂੰ ਸੇਵਾ ਮੁਕਤੀ ਲਾਭ ਤਿਆਗ ਕੇ ਸਵੈ- ਇਛੁੱਕ ਸੇਵਾ ਮੁਕਤੀ ਜਾਂ ਵਿਜੀਲੈਂਸ ਵਿਭਾਗ ਦੀ ਪੜਤਾਲ ਵਿੱਚੋਂ ਇੱਕ ਦੀ ਚੋਣ ਕਰਨ ਦੀ ਖੁੱਲ ਦੇਵੇ ਤਾਂ ਸੇਵਾ ਮੁਕਤੀ ਲਾਭ ਛੱਡਕੇ ਵੱਡੀ ਗਿਣਤੀ ਸਵੈ-ਇੱਛਾ ਨਾਲ ਹੀ ਸੇਵਾ ਮੁਕਤੀ ਲੈ ਜਾਣਗੇ। ਮੁਲਾਜ਼ਮ ਆਗੂਆਂ ਨੇ ਕਿਹਾ ਕਿ ਭੂਤਕਾਲ ਦੌਰਾਨ ਇਹ ਗੋਰਖਧੰਦਾ ਹਰੇਕ ਪਾਰਟੀ ਦੀਆਂ ਸਰਕਾਰਾਂ ਵੇਲੇ ਬੇਰੋਕ ਚੱਲਦਾ ਰਿਹਾ ਹੈ। ਆਗੂਆਂ ਨੇ ਕਿਹਾ ਕਿ ਜੇਕਰ ਭਗਵੰਤ ਮਾਨ ਸਰਕਾਰ ਅਜਿਹੀ ਪਹਿਲਕਦਮੀ ਕਰਨ ਦਾ ਹੌਸਲਾ ਕਰਦੀ ਹੈ ਤਾਂ ਉਹਨਾਂ ਨੂੰ ਨਵੇਂ ਮੁਲਾਜ਼ਮ ਭਰਤੀ ਕਰਨ ਦੇ ਨਵੇਂ ਮੌਕੇ ਮਿਲਣ ਦੇ ਨਾਲ ਨਾਲ ਸਿਆਸੀ ਲਾਹਾ ਵੀ ਮਿਲੇਗਾ।
ਆਗੂਆਂ ਨੇ ਕਿਹਾ ਕਿ ਜਿਸ ਦ੍ਰਿੜਤਾ ਨਾਲ ਭਗਵੰਤ ਸਿੰਘ ਮਾਨ ਸਰਕਾਰ ਪਿਛਲੀਆਂ ਸਰਕਾਰਾਂ ਦੇ ਘਪਲੇ ਫੜਨ ਵਿੱਚ ਲੱਗੀ ਹੋਈ ਹੈ ਉਸਤੋਂ ਉਮੀਦ ਬਣਦੀ ਹੈ ਕਿ ਇਸ ਪੇਚੀਦਾ ਪ੍ਰੰਤੂ ਵੱਡੇ ਘਪਲੇ ਨੂੰ ਵੀ ਨੰਗਾ ਕਰਨ ਲਈ ਹੱਥ ਪਾਇਆ ਜਾਵੇਗਾ। ਮੁਲਾਜ਼ਮ ਆਗੂਆਂ ਨੇ ਜ਼ੋਰਦਾਰ ਮੰਗ ਕੀਤੀ ਕਿ ਇਸ ਮਸਲੇ ਦੀ ਪੜਤਾਲ ਲਈ ਪੜਤਾਲੀਆ ਟੀਮ ਵਿੱਚ ਇਮਾਨਦਾਰ, ਤੇਜ ਬੁੱਧੀ ਤੇ ਮਿਹਨਤੀ ਅਧਿਕਾਰੀ ਤੇ ਕਰਮਚਾਰੀ ਨਿਯੁੰਕਤ ਕੀਤੇ ਜਾਣ।
