ਚੰਡੀਗੜ੍ਹ : ਕੈਨੇਡਾ ਵਾਸੀ ਐੱਨ ਆਰ ਆਈ ਸੋਹਣ ਸਿੰਘ ਗਿੱਡਾ ਨਾਲ ਮੁਹਾਲੀ ਦੀ ਫਿਲਮਾਂ ਬਣਾਉਣ ਵਾਲੀ ਇਕ ਕੰਪਨੀ ਨੇ ਤਿੰਨ ਕਰੋੜ 12 ਲੱਖ ਰੁਪਏ ਦੀ ਠੱਗੀ ਲਗਾਈ ਹੈ। ਫ਼ਿਲਮ ‘ਸਰਦਾਰ ਹਰੀ ਸਿੰਘ ਨਲੂਆ’ ਬਣਾਉਣ ਦਾ ਕੰਟਰੈਕਟ ਇਸ ਸਾਲ ਮਾਰਚ ਵਿੱਚ ਖ਼ਤਮ ਹੋ ਗਿਆ ਸੀ ਪਰ ਹੁਣ ਫਿਲਮ ਬਣਾਉਣ ਵਾਲੀ ਕੰਪਨੀ ਨਾ ਤਾਂ ਪੈਸੇ ਵਾਪਸ ਕਰ ਰਹੀ ਹੈ ਅਤੇ ਨਾ ਹੀ ਫ਼ਿਲਮ ਬਣਾ ਰਹੀ ਹੈ। ਤਿੰਨ ਮਹੀਨੇ ਤੋਂ ਇਹ ਮਾਮਲਾ ਐੱਨ ਆਰ ਆਈ ਥਾਣਾ ਮੁਹਾਲੀ ਵਿੱਚ ਹੈ ਪਰ ਪੁਲਿਸ ਲਾਰਿਆਂ ਤੋਂ ਸਿਵਾਏ ਕੁਝ ਨਹੀਂ ਦੇ ਰਹੀ।
ਆਪਣੇ ਨਾਲ ਲੱਗੀ ਠੱਗੀ ਬਾਰੇ ਜਾਣਕਾਰੀ ਦਿੰਦਿਆਂ ਸੋਹਣ ਸਿੰਘ ਗਿੱਡਾ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਸਿੱਖੀ ਸ਼ਰਧਾ ਦੇ ਕਾਰਨ ਉਨ੍ਹਾਂ ਸਰਦਾਰ ਹਰੀ ਸਿੰਘ ਨਲੂਆ ਦੀ ਥ੍ਰੀਡੀ ਐਨੀਮੇਸ਼ਨ ਫਿਲਮ ਬਣਾਉਣੀ ਸੀ ਜਿਸ ਦਾ ਬਜਟ 3 ਕਰੋੜ ਰੁਪਏ ਸੀ। ਮੁਹਾਲੀ ਦੇ ਗਿੱਲ ਮੀਡੀਆ ਸਟੂਡੀਓ ਨਾਲ ਉਨ੍ਹਾਂ ਬਕਾਇਦਾ ਲਿਖਤੀ ਇਕਰਾਰਨਾਮਾ ਕੀਤਾ ਸੀ। ਕੰਪਨੀ ਨੇ ਇਕਰਾਰਨਾਮੇ ਤੋਂ ਬਾਅਦ ਕੇਵਲ ਦੋ ਤਿੰਨ ਟ੍ਰੇਲਰ ਹੀ ਉਸ ਨੂੰ ਦਿੱਤੇ ਅਤੇ ਕੁਝ ਫੋਟੋਆਂ ਦਿੱਤੀਆਂ ਪਰ ਕੰਪਲੀਟ ਫ਼ਿਲਮ ਬਣਾ ਕੇ ਨਹੀਂ ਦਿੱਤੀ ਗਈ । ਉਹ ਬਜਟ ਨਾਲੋਂ 12 ਲੱਖ ਰੁਪਏ ਵਧੇਰੇ ਦੇ ਚੁੱਕਿਆ ਹੈ ਪਰ ਹੁਣ ਕੰਪਨੀ ਦੇ ਮਾਲਕ ਉਸ ਤੋਂ ਹੋਰ ਪੈਸੇ ਦੀ ਮੰਗ ਕਰ ਰਹੇ ਹਨ ਜੋ ਸ਼ਰ੍ਹੇਆਮ ਧੋਖਾਧੜੀ ਅਤੇ ਧੱਕੇਸ਼ਾਹੀ ਹੈ।
ਉਨ੍ਹਾਂ ਇਹ ਵੀ ਦੱਸਿਆ ਕਿ ਸਾਰਾ ਪੈਸਾ ਉਸ ਨੇ ਕੰਪਨੀ ਨੂੰ ਆਨਲਾਈਨ ਦਿੱਤਾ ਸੀ ਅਤੇ ਕੰਪਨੀ ‘ਤੇ ਵਿਸ਼ਵਾਸ ਕਰਕੇ ਪੂਰੀ ਪੇਮੈਂਟ ਐਡਵਾਂਸ ਵੀ ਦੇ ਦਿੱਤੀ ਸੀ ਪਰ ਉਸ ਨਾਲ ਵੱਡੀ ਧੋਖਾਧੜੀ ਹੋਈ ਹੈ। ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਤੋਂ ਇਨਸਾਫ ਦੀ ਮੰਗ ਕਰਦਿਆਂ ਉਨ੍ਹਾਂ ਕਿਹਾ ਕਿ ਐਨ ਆਰ ਆਈ ਥਾਣੇ ਵਾਲੇ ਵੀ ਕੁਝ ਨਹੀਂ ਕਰ ਰਹੇ ਜਿਸ ਕਾਰਨ ਉਸ ਦੇ ਮਾਮਲੇ ਦੀ ਤੁਰੰਤ ਜਾਂਚ ਕਰਾ ਕੇ ਮੁਲਜ਼ਮਾਂ ਖ਼ਿਲਾਫ਼ ਬਣਦੀ ਕਾਰਵਾਈ ਕੀਤੀ ਜਾਵੇ। ਉਸ ਨੇ ਭਾਵੁਕ ਹੁੰਦਿਆਂ ਕਿਹਾ ਕਿ ਉਸ ਨੇ ਇੱਕ ਕਰੋੜ ਰੁਪਿਆ ਤਾਂ ਆਪਣਾ ਘਰ ਵੇਚ ਕੇ ਦਿੱਤਾ ਸੀ ਅਤੇ ਬਾਕੀ ਦੀ ਆਪਣੀ ਮਿਹਨਤ ਦੀ ਕਮਾਈ ਦੇ ਪੈਸੇ ਨਾਲ ਉਨ੍ਹਾਂ ਫਿਲਮ ਬਣਾਉਣ ਸੀ ਪਰ ਉਸ ਨਾਲ ਵੱਡੀ ਠੱਗੀ ਲੱਗੀ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ ਉਸ ਨੂੰ ਇਨਸਾਫ ਨਾ ਮਿਲਿਆ ਤਾਂ ਉਹ ਅਦਾਲਤ ਦਾ ਦਰਵਾਜ਼ਾ ਵੀ ਖੜਕਾਉਣਗੇ।












