ਈਰਾਨ ‘ਚ ਸ਼ੁੱਕਰਵਾਰ ਨੂੰ ਜੇਹਦਾਨ ਸ਼ਹਿਰ ‘ਚ 15 ਸਾਲਾ ਬਲੋਚ ਲੜਕੀ ਨਾਲ ਬਲਾਤਕਾਰ ਦੇ ਖਿਲਾਫ ਪ੍ਰਦਰਸ਼ਨ ਕੀਤਾ ਗਿਆ। ਉਨ੍ਹਾਂ ਨੂੰ ਰੋਕਣ ਲਈ ਪੁਲਿਸ ਵੱਲੋ ਗੋਲੀਬਾਰੀ ਵੀ ਕੀਤੀ ਗਈ ਜਿਸ ਵਿੱਚ ਤਿੰਨ ਦਰਜਨ ਦੇ ਕਰੀਬ ਲੋਕਾਂ ਦੀ ਮੌਤ ਹੋਣ ਦੀ ਖ਼ਬਰ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਗੁੱਸੇ ਵਿੱਚ ਆਏ ਲੋਕਾਂ ਵੱਲੋ ਸਰਕਾਰੀ ਦਫ਼ਤਰਾਂ ਅਤੇ ਥਾਣਿਆਂ ਨੂੰ ਵੀ ਅੱਗ ਲਗਾਈ ਗਈ। ਸ਼ੁੱਕਰਵਾਰ ਦੀ ਨਮਾਜ਼ ਤੋਂ ਬਾਅਦ ਬਲੋਚ ਭਾਈਚਾਰੇ ਦੇ ਲੋਕ ਸੜਕਾਂ ‘ਤੇ ਆ ਗਏ ਅਤੇ ਨਾਅਰੇਬਾਜ਼ੀ ਕੀਤੀ। ਇਸ ਤੋਂ ਬਾਅਦ ਪੁਲਿਸ ਨੇ ਗੋਲੀ ਚਲਾ ਦਿੱਤੀ।
ਦਰਅਸਲ ਪਿਛਲੇ ਹਫਤੇ ਇਕ ਪੁਲਸ ਕਮਾਂਡਰ ‘ਤੇ 15 ਸਾਲਾ ਬਲੋਚ ਲੜਕੀ ਨਾਲ ਬਲਾਤਕਾਰ ਕਰਨ ਦਾ ਦੋਸ਼ ਲੱਗਾ ਸੀ। ਈਰਾਨ ਦੇ ਉੱਘੇ ਸੁੰਨੀ ਮੌਲਵੀ ਧਰਮਗੁਰੂ ਮੌਲਵੀ ਅਬਦੁਲ ਹਾਮਿਦ ਨੇ ਇਸ ਬੱਚੀ ਨਾਲ ਬਲਾਤਕਾਰ ਦੀ ਪੁਸ਼ਟੀ ਕੀਤੀ ਹੈ। ਸੁੰਨੀ ਬਲੋਚ ਆਬਾਦੀ ਈਰਾਨ ਦੇ ਦੱਖਣ-ਪੂਰਬੀ ਸਿਸਤਾਨ ਅਤੇ ਬਲੋਚਿਸਤਾਨ ਪ੍ਰਾਂਤਾਂ ਵਿੱਚ ਹੈ। ਦੋਸ਼ੀ ਕਮਾਂਡਰ ਦਾ ਨਾਂ ਕਰਨਲ ਇਬਰਾਹਿਮ ਖੁਚਾਕਜ਼ਈ ਦੱਸਿਆ ਜਾ ਰਿਹਾ ਹੈ। ਉਹ ਸ਼ੀਆ ਮੁਸਲਮਾਨ ਹੈ। ਪੀੜਤ ਲੜਕੀ ਸੁੰਨੀ ਹੈ। ਸ਼ੁੱਕਰਵਾਰ ਨੂੰ ਬਲੋਚ ਭਾਈਚਾਰੇ ਦੇ ਨੇਤਾਵਾਂ ਨੇ ਇਸ ਘਟਨਾ ਦੇ ਖਿਲਾਫ ਪ੍ਰਦਰਸ਼ਨ ਦਾ ਸੱਦਾ ਦਿੱਤਾ ਸੀ।