ਟਾਟਾ ਮੋਟਰਸ ਨੇ ਆਪਣੀ ਸਭ ਤੋਂ ਸਸਤੀ ਇਲੈਕਟ੍ਰਿਕ ਕਾਰ Tiago EV ਦੀ ਕੀਮਤ ਵਧਾਉਣ ਦਾ ਐਲਾਨ ਕੀਤਾ ਹੈ। ਨਵੀਆਂ ਕੀਮਤਾਂ ਜਨਵਰੀ ਤੋਂ ਲਾਗੂ ਹੋਣਗੀਆਂ। ਇਨ੍ਹਾਂ ਕੀਮਤਾਂ ‘ਚ 3 ਤੋਂ 4 ਫੀਸਦੀ ਦਾ ਵਾਧਾ ਹੋਵੇਗਾ। ਇਸ ਕਾਰਨ Tiago EV ਦੇ ਸਾਰੇ ਵੇਰੀਐਂਟ 30 ਤੋਂ 35 ਹਜ਼ਾਰ ਰੁਪਏ ਤੱਕ ਮਹਿੰਗੇ ਹੋ ਸਕਦੇ ਹਨ।
Tiago ਦੀ ਕੀਮਤ ਵਿੱਚ ਪਹਿਲਾਂ ਹੀ ਵਾਧਾ ਹੋਣ ਦੀ ਉਮੀਦ ਕੀਤੀ ਜਾ ਰਹੀ ਸੀ, ਕਿਉਂਕਿ ਕੰਪਨੀ ਨੇ ਇਸ EV ਨੂੰ ਪਹਿਲੇ 10,000 ਗਾਹਕਾਂ ਲਈ ਸ਼ੁਰੂਆਤੀ ਕੀਮਤ ‘ਤੇ ਲਾਂਚ ਕੀਤਾ ਸੀ। ਹਾਲਾਂਕਿ ਲਾਂਚ ਤੋਂ ਬਾਅਦ ਮਿਲੇ ਜ਼ਬਰਦਸਤ ਹੁੰਗਾਰੇ ਤੋਂ ਬਾਅਦ ਕੰਪਨੀ ਨੇ 20,000 ਗਾਹਕਾਂ ਨੂੰ ਇਹ ਸਹੂਲਤ ਦਿੱਤੀ ਸੀ।
ਟਾਟਾ ਮੋਟਰਜ਼ ਪੈਸੇਂਜਰ ਵਹੀਕਲਜ਼ ਦੇ ਮੈਨੇਜਿੰਗ ਡਾਇਰੈਕਟਰ (ਐਮਡੀ) ਸ਼ੈਲੇਸ਼ ਚੰਦਰਾ ਨੇ ਮਿੰਟ ਨੂੰ ਇੱਕ ਇੰਟਰਵਿਊ ਵਿੱਚ ਦੱਸਿਆ ਕਿ ਟਿਆਗੋ ਦੀ ਕੀਮਤ ਵਿੱਚ ਵਾਧਾ ਸਿਰਫ਼ ਸ਼ੁਰੂਆਤੀ ਕੀਮਤ ਬਾਰੇ ਨਹੀਂ ਹੈ। ਉਨ੍ਹਾਂ ਦੱਸਿਆ ਕਿ ਪਿਛਲੇ ਸਾਲ ਦੇ ਮੁਕਾਬਲੇ ਬੈਟਰੀ ਦੀਆਂ ਕੀਮਤਾਂ 30 ਤੋਂ 35 ਫੀਸਦੀ ਮਹਿੰਗੀਆਂ ਹੋ ਗਈਆਂ ਹਨ।
ਇਸ ਤੋਂ ਇਲਾਵਾ ਈਵੀ ਲਈ ਬੈਟਰੀ ਦੇ ਨਵੇਂ ਮਾਪਦੰਡ ਅਤੇ ਅਪ੍ਰੈਲ ਤੋਂ ਲਾਗੂ ਹੋਣ ਵਾਲੇ BS-VI ਨਿਕਾਸੀ ਮਾਪਦੰਡਾਂ ਕਾਰਨ ਨਿਰਮਾਣ ਲਾਗਤ ਵਧ ਗਈ ਹੈ। ਇਸ ਲਈ ਈਵੀ ਦੀ ਕੀਮਤ ਵਧਾਈ ਜਾ ਰਹੀ ਹੈ। ਚੰਦਨਾ ਨੇ ਦੱਸਿਆ ਕਿ ਕੰਪਨੀ ਇਨ੍ਹਾਂ ਕੀਮਤਾਂ ਨੂੰ ਦੋ ਪੜਾਵਾਂ ‘ਚ ਵਧਾਏਗੀ ਤਾਂ ਕਿ ਗਾਹਕ ‘ਤੇ ਕੋਈ ਸਿੱਧਾ ਅਸਰ ਨਾ ਪਵੇ।
ਚੰਦਰਾ ਨੇ ਕਿਹਾ ਕਿ Tiago ਦੇ ਸਾਰੇ ਵੇਰੀਐਂਟਸ (ਪੈਟਰੋਲ ਅਤੇ CNG) ਦੇ ਮੁਕਾਬਲੇ ਇਸ ਈਵੀ ਦੀ ਬੁਕਿੰਗ 30 ਤੋਂ 35% ਹੈ। ਇਸ ਦੇ ਨਾਲ ਹੀ, ਕੰਪਨੀ ਦੇ ਹੋਰ ਇਲੈਕਟ੍ਰਿਕ ਵਾਹਨਾਂ (Nexon EV ਅਤੇ Tigor EV) ਲਾਈਨ-ਅੱਪ ਵਿੱਚ Tiago EV ਦੀ ਮੰਗ 20 ਤੋਂ 25% ਹੈ।
ਚੰਦਰਾ ਨੇ ਦੱਸਿਆ ਕਿ ਕੰਪਨੀ ਦੀ ਯੋਜਨਾ ਜਨਵਰੀ ਦੇ ਅੱਧ ਤੱਕ ਟਿਆਗੋ ਈਵੀ ਦੀ ਡਿਲਿਵਰੀ ਸ਼ੁਰੂ ਕਰਨ ਦੀ ਹੈ ਅਤੇ ਉਮੀਦ ਹੈ ਕਿ ਚਾਰ ਤੋਂ ਪੰਜ ਮਹੀਨਿਆਂ ਦੇ ਅੰਦਰ ਪਹਿਲੇ ਬੈਚ ਦੀ ਡਿਲਿਵਰੀ ਪੂਰੀ ਹੋ ਜਾਵੇਗੀ।