ਪੈਟਰੋਲ ਡੀਜ਼ਲ ਦੀਆ ਕੀਮਤਾਂ ‘ਚ ਹੋਣ ਵਾਲੇ ਵਾਧੇ ਦੇ ਨਾਲ ਨਾਲ ਗੈਸ ਦੀਆ ਕੀਮਤਾਂ ਵੀ ਆਉਣ ਵਾਲੇ ਮਹੀਨੇ ‘ਚ ਵੱਧ ਸਕਦੀਆਂ ਹਨ। ਜਿਸਦਾ ਦਾ ਸਿੱਧਾ ਅਸਰ ਆਮ ਆਦਮੀ ਦੀ ਜੇਬ ਪਏਗਾ। ਦਰਅਸਲ ਪੂਰੀ ਦੁਨੀਆ ‘ਚ ਗੈਸ ਦੀ ਭਾਰੀ ਕਮੀ ਹੋ ਗਈ ਹੈ ਅਤੇ ਇਸ ਦਾ ਅਸਰ ਭਾਰਤ ‘ਚ ਅਪ੍ਰੈਲ ‘ਚ ਦੇਖਣ ਨੂੰ ਮਿਲ ਸਕਦਾ ਹੈ। ਰਿਲਾਇੰਸ ਇੰਡਸਟਰੀਜ਼ ਮੁਤਾਬਕ ਡੂੰਘੇ ਸਮੁੰਦਰ ‘ਚੋਂ ਨਿਕਲਣ ਵਾਲੀ ਗੈਸ ਦੀ ਕੀਮਤ 6.13 ਡਾਲਰ ਤੋਂ ਵਧ ਕੇ ਕਰੀਬ 10 ਡਾਲਰ ਹੋ ਜਾਵੇਗੀ।
ਦੇਸ਼ ਵਿੱਚ ਘਰੇਲੂ ਕੁਦਰਤੀ ਗੈਸ ਦੀਆਂ ਕੀਮਤਾਂ ਹਰ ਸਾਲ ਅਪ੍ਰੈਲ ਅਤੇ ਅਕਤੂਬਰ ਵਿੱਚ ਤੈਅ ਹੁੰਦੀਆਂ ਹਨ। ਅਪ੍ਰੈਲ ਦੀ ਕੀਮਤ ਜਨਵਰੀ ਤੋਂ ਦਸੰਬਰ 2021 ਦੀਆਂ ਅੰਤਰਰਾਸ਼ਟਰੀ ਕੀਮਤਾਂ ‘ਤੇ ਆਧਾਰਿਤ ਹੋਵੇਗੀ। ਇੰਦਰਪ੍ਰਸਥ ਗੈਸ ਲਿਮਟਿਡ ਦੇ ਮੈਨੇਜਿੰਗ ਡਾਇਰੈਕਟਰ ਏਕੇ ਜੇਨਾ ਅਨੁਸਾਰ ਘਰੇਲੂ ਕੁਦਰਤੀ ਗੈਸ ਦੀ ਕੀਮਤ ਵਿੱਚ ਇੱਕ ਡਾਲਰ ਦੇ ਵਾਧੇ ਨਾਲ ਸੀਐਨਜੀ ਦੀ ਕੀਮਤ 4.5 ਰੁਪਏ ਪ੍ਰਤੀ ਕਿਲੋਗ੍ਰਾਮ ਵਧ ਜਾਵੇਗੀ। ਇਸ ਦਾ ਮਤਲਬ ਹੈ ਕਿ ਸੀਐਨਜੀ ਦੀ ਕੀਮਤ 15 ਰੁਪਏ ਪ੍ਰਤੀ ਕਿਲੋ ਵਧ ਸਕਦੀ ਹੈ।
ਦਸ ਦਈਏ ਕਿ ਦੇਸ਼ ਵਿੱਚ ਘਰੇਲੂ ਗੈਸ ਦੀਆਂ ਕੀਮਤਾਂ ਦੁੱਗਣੀਆਂ ਹੋ ਸਕਦੀਆਂ ਹਨ। ਇਸ ਨਾਲ ਸੀਐਨਜੀ, ਪੀਐਨਜੀ ਅਤੇ ਬਿਜਲੀ ਦੀਆਂ ਕੀਮਤਾਂ ਵਿੱਚ ਵਾਧਾ ਹੋ ਸਕਦਾ ਹੈ ਅਤੇ ਨਾਲ ਹੀ ਸਰਕਾਰ ਦਾ ਖਾਦ ਸਬਸਿਡੀ ਦਾ ਬਿੱਲ ਵੀ ਵੱਧ ਜਾਵੇਗਾ।