ਕੇਂਦਰੀ ਸੜਕ ਆਵਾਜਾਈ ਅਤੇ ਰਾਜਮਾਰਗ ਮੰਤਰੀ ਨਿਤਿਨ ਗਡਕਰੀ ਨੇ ਦੋਹਰੇ ਮਾਪਦੰਡ ਅਪਣਾਉਣ ਵਾਲੀਆਂ ਕਾਰ ਕੰਪਨੀਆਂ ਦੀ ਆਲੋਚਨਾ ਕੀਤੀ। ਉਨ੍ਹਾਂ ਕਿਹਾ ਕਿ ਹਰ ਵਿਅਕਤੀ ਦੀ ਜਾਨ ਕੀਮਤੀ ਹੈ ਪਰ ਕਈ ਕਾਰ ਕੰਪਨੀਆਂ ਵਿਦੇਸ਼ਾਂ ਵਿਚ ਸੁਰੱਖਿਆ ਮਾਪਦੰਡਾਂ ਦਾ ਧਿਆਨ ਰੱਖਦੀਆਂ ਹਨ ਪਰ ਭਾਰਤ ਵਿਚ ਲੋਕਾਂ ਦੀਆਂ ਜਾਨਾਂ ਨਾਲ ਖੇਡਦੀਆਂ ਹਨ।
ਗਡਕਰੀ ਨੇ ਕਿਹਾ ਕਿ ਅਸੀਂ ਕਾਰਾਂ ਵਿੱਚ ਛੇ ਏਅਰਬੈਗ ਲਾਜ਼ਮੀ ਕਰਨ ਦਾ ਫੈਸਲਾ ਕੀਤਾ, ਇੱਥੋਂ ਤੱਕ ਕਿ ਇਕੋਨੋਮਿਕ ਮਾਡਲਾਂ ਵਿੱਚ ਵੀ। ਪਰ ਹੁਣ ਕੁਝ ਕੰਪਨੀਆਂ ਭਾਰਤ ‘ਚ ਅਜਿਹੀਆਂ ਕਾਰਾਂ ਬਣਾ ਰਹੀਆਂ ਹਨ, ਜੋ ਅੰਤਰਰਾਸ਼ਟਰੀ ਮਾਪਦੰਡਾਂ ਤੇ ਪੂਰੀਆਂ ਖਰੀਆਂ ਨਹੀਂ ਉਤਰਦੀਆਂ। ਪਰ ਕੰਪਨੀਆਂ ਉਹੀ ਮਾਡਲਾਂ ਨੂੰ ਵਿਦੇਸ਼ੀ ਬਾਜ਼ਾਰਾਂ ਦੇ ਮਾਪਦੰਡਾਂ ਅਨੁਸਾਰ ਬਣਾ ਰਹੀਆਂ ਹਨ. ਮੈਨੂੰ ਇਹ ਸਮਝ ਨਹੀਂ ਆਉਦਾ। ਗਡਕਰੀ ਨੇ ਕਿਹਾ ਕਿ ਜਦੋਂ ਭਾਰਤ ਵਿੱਚ ਸਭ ਤੋਂ ਵੱਧ ਸੜਕ ਹਾਦਸੇ ਵਾਪਰਦੇ ਹਨ ਤਾਂ ਕਾਰ ਕੰਪਨੀਆਂ ਇਸ ਨੂੰ ਗੰਭੀਰਤਾ ਨਾਲ ਕਿਉਂ ਨਹੀਂ ਲੈ ਰਹੀਆਂ?
ਦੱਸ ਦਈਏ ਕਿ ਛੇ ਏਅਰਬੈਗਸ ਦੇ ਪ੍ਰਸਤਾਵ ਦੀ ਘੋਸ਼ਣਾ ਕਰਦੇ ਹੋਏ, ਗਡਕਰੀ ਨੇ ਮਾਰਚ ਵਿੱਚ ਸੰਸਦ ‘ਚ ਵੀ ਕਿਹਾ ਸੀ ਕਿ ਛੇ ਕਾਰਜਸ਼ੀਲ ਏਅਰਬੈਗਾਂ ਦੀ ਤਾਇਨਾਤੀ ਨਾਲ 2020 ਵਿੱਚ 13,000 ਜਾਨਾਂ ਬਚਾਈਆਂ ਜਾ ਸਕਦੀਆਂ ਸਨ। ਮੰਤਰੀ ਨੇ ਕਿਹਾ ਕਿ ਜਦੋਂ ਆਟੋਮੋਬਾਈਲ ਉਦਯੋਗ ਵਧਦਾ ਹੈ ਅਤੇ ਵਾਹਨਾਂ ਦੀ ਗਿਣਤੀ ਵਧਦੀ ਹੈ, ਤਾਂ ਸੁਰੱਖਿਆ ਦਾ ਧਿਆਨ ਰੱਖਣਾ ਵੀ ਸਾਡੀ ਹੀ ਜ਼ਿੰਮੇਵਾਰੀ ਹੈ।