ਪੰਜਾਬ : – ਪਿਛਲੇ ਕੁਝ ਦਿਨਾਂ ਤੋਂ ਅੰਡਿਆਂ ਦੀਆਂ ਕੀਮਤਾਂ ਵਿਚ ਭਾਰੀ ਗਿਰਾਵਟ ਦੇਖਣ ਨੂੰ ਮਿਲ ਰਹੀ ਹੈ। ਆਂਡਿਆਂ ਦੀਆਂ ਕੀਮਤਾਂ ‘ਚ ਲਗਾਤਾਰ ਗਿਰਾਵਟ ਜਾਰੀ ਹੈ। ਹੁਣ ਕੁਝ ਦਿਨਾਂ ਦੀ ਰਾਹਤ ਤੋਂ ਬਾਅਦ ਅੰਡਿਆਂ ਦੀਆਂ ਕੀਮਤਾਂ ਇਕ ਵਾਰ ਫਿਰ ਡਿੱਗਣ ਲੱਗੀਆਂ ਹਨ। ਪੰਜਾਬ ‘ਚ ਪਿਛਲੇ 81 ਦਿਨਾਂ ਦੌਰਾਨ ਆਂਡਿਆਂ ਦੀ ਕੀਮਤ ‘ਚ 180 ਰੁਪਏ ਪ੍ਰਤੀ ਸੌ ਤੱਕ ਦੀ ਗਿਰਾਵਟ ਦੇਖਣ ਨੂੰ ਮਿਲੀ ਹੈ, ਜਦਕਿ ਪੋਲਟਰੀ ਇੰਡਸਟਰੀ ਦੀ ਕੀਮਤ ‘ਚ 15 ਤੋਂ 20 ਫੀਸਦੀ ਤੱਕ ਦਾ ਵਾਧਾ ਹੋਇਆ ਹੈ। ਇਹ ਸਪੱਸ਼ਟ ਹੈ ਕਿ ਅੰਡੇ ਉਤਪਾਦਕਾਂ ਨੂੰ ਦੋਹਰੀ ਮਾਰ ਝੱਲਣੀ ਪੈ ਰਹੀ ਹੈ।
ਉਤਪਾਦਕਾਂ ਦਾ ਤਰਕ ਹੈ ਕਿ ਹੁਣ ਮੌਸਮ ‘ਚ ਬਦਲਾਅ ਕਾਰਨ ਆਉਣ ਵਾਲੇ ਦਿਨਾਂ ‘ਚ ਵੀ ਬਾਜ਼ਾਰ ‘ਚ ਮੰਗ ਕਮਜ਼ੋਰ ਰਹੇਗੀ। ਆਂਡਿਆਂ ਦੀ ਕੀਮਤ ਵਿੱਚ ਗਿਰਾਵਟ ਅਤੇ ਮੁਰਗੀਆਂ ਲਈ ਫੀਡ ਦੀ ਕੀਮਤ ਵਿੱਚ ਵਾਧੇ ਕਾਰਨ ਉਤਪਾਦਕ ਲਈ ਲਾਗਤ ਨੂੰ ਪੂਰਾ ਕਰਨਾ ਮੁਸ਼ਕਲ ਹੋ ਰਿਹਾ ਹੈ। ਅਜਿਹੇ ‘ਚ ਜ਼ਿਆਦਾਤਰ ਉਤਪਾਦਕਾਂ ਨੂੰ ਨੁਕਸਾਨ ਹੋ ਰਿਹਾ ਹੈ।
9 ਦਸੰਬਰ 2021 ਨੂੰ ਆਂਡੇ ਦੀ ਕੀਮਤ 547 ਰੁਪਏ ਪ੍ਰਤੀ ਸੌ ਸੀ। ਜੋ 1 ਜਨਵਰੀ 2022 ਨੂੰ 520 ਰੁਪਏ, 1 ਫਰਵਰੀ ਨੂੰ 478 ਰੁਪਏ, 20 ਫਰਵਰੀ ਨੂੰ 390 ਰੁਪਏ ਅਤੇ 25 ਫਰਵਰੀ ਨੂੰ ਡਿੱਗ ਕੇ 367 ਰੁਪਏ ਪ੍ਰਤੀ ਸੌ ਰਹਿ ਗਿਆ। ਅੱਜ ਵੀ ਥੋਕ ਬਾਜ਼ਾਰ ਵਿੱਚ ਆਂਡੇ ਦੀ ਕੀਮਤ 367 ਰੁਪਏ ਪ੍ਰਤੀ ਸੌ ਹੈ। ਜਦੋਂ ਕਿ ਆਂਡਾ ਉਤਪਾਦਕ ਨੂੰ ਫਾਰਮ ‘ਤੇ ਪ੍ਰਤੀ ਸੌ ਰੁਪਏ ਮਹਿਜ਼ 348 ਰੁਪਏ ਮਿਲ ਰਹੇ ਹਨ।