ਦੇਸ਼ ਵਿੱਚ ਪਿਛਲੇ 24 ਘੰਟਿਆਂ ਵਿੱਚ ਕੋਰੋਨਾ ਦੇ 1335 ਨਵੇਂ ਮਾਮਲੇ ਸਾਹਮਣੇ ਆਏ ਹਨ। ਦੇਸ਼ ‘ਚ ਕੋਰੋਨਾ ਦੇ ਮਾਮਲਿਆਂ ਵਿੱਚ ਚਾਹੇ ਗਿਰਾਵਟ ਆ ਰਹੀ ਹੈ ਪਰ ਖ਼ਤਰਾ ਅਜੇ ਟਲਿਆ ਨਹੀਂ ਹੈ। WHO ਮੁਤਾਬਕ Omicron ਦਾ ਨਵਾਂ XE ਵੇਰੀਐਂਟ ਆ ਗਿਆ ਹੈ, ਜੋ BA.2 ਤੋਂ 10 ਗੁਣਾ ਜ਼ਿਆਦਾ ਖਤਰਨਾਕ ਹੈ। WHO ਦਾ ਦਾਅਵਾ ਹੈ ਕਿ ਇਹ Omicron ਦੇ ਅਸਲੀ ਵੇਰੀਐਂਟ ਨਾਲੋਂ 43% ਤੇਜ਼ੀ ਨਾਲ ਫੈਲਦਾ ਹੈ। XE ਵੇਰੀਐਂਟ Omicron ਦੇ BA.1 ਅਤੇ BA.2 ਦੇ ਮੇਲ ਨਾਲ ਬਣਿਆ ਹੈ।
ਦੱਸ ਦਈਏ ਕਿ Omicron ਦੇ XE ਵੇਰੀਐਂਟ ਦਾ ਪਹਿਲਾ ਮਾਮਲਾ ਯੂਕੇ ਵਿੱਚ 19 ਜਨਵਰੀ ਨੂੰ ਪਾਇਆ ਗਿਆ ਸੀ। ਉਦੋਂ ਤੋਂ ਹੁਣ ਤੱਕ ਇਸ ਵੇਰੀਐਂਟ ਦੇ 600 ਤੋਂ ਵੱਧ ਮਾਮਲੇ ਸਾਹਮਣੇ ਆ ਚੁੱਕੇ ਹਨ। ਇਸ ਤੋਂ ਇਲਾਵਾ ਇਹ ਵੇਰੀਐਂਟ ਫਰਾਂਸ, ਡੈਨਮਾਰਕ ਅਤੇ ਬੈਲਜੀਅਮ ‘ਚ ਵੀ ਪਾਇਆ ਗਿਆ ਹੈ। ਬ੍ਰਿਟੇਨ ਦੀ ਹੈਲਥ ਪ੍ਰੋਟੈਕਸ਼ਨ ਏਜੰਸੀ ਦੇ ਅਨੁਸਾਰ, XE ਵੇਰੀਐਂਟ ਕਿੰਨਾ ਖਤਰਨਾਕ ਹੈ ਜਾਂ ਵੈਕਸੀਨ ਕੰਮ ਕਰੇਗੀ ਜਾਂ ਨਹੀਂ ਇਹ ਜਾਣਨ ਲਈ ਅਜੇ ਹੋਰ ਡੇਟਾ ਦੀ ਲੋੜ ਹੈ।
ਜ਼ਿਕਰਯੋਗ ਹੈ ਕਿ ਕੋਰੋਨਾ ਦੇ ਰੋਜ਼ਾਨਾ ਘੱਟ ਰਹੇ ਮਾਮਲਿਆਂ ਨੂੰ ਦੇਖ਼ਦਿਆਂ ਜਿੱਥੇ ਕੇਂਦਰ ਸਰਕਾਰ ਵਲੋਂ ਪਾਬੰਦੀਆਂ ‘ਚ ਕਾਫ਼ੀ ਹੱਦ ਤੱਕ ਢਿੱਲ ਦਿੱਤੀ ਜਾ ਰਹੀ ਹੈ, ਉੱਥੇ ਹੀ ਇਨ੍ਹਾਂ ਵੱਖ-ਵੱਖ ਸੂਬਿਆਂ ਜਿਵੇਂ ਪੰਜਾਬ, ਦਿੱਲੀ, ਮਹਾਰਾਸ਼ਟਰ, ਤੇਲੰਗਾਨਾ, ਪੱਛਮੀ ਬੰਗਾਲ ਨੇ ਕੋਰੋਨਾ ਸੰਬੰਧੀ ਸਾਰੀਆਂ ਪਾਬੰਦੀਆਂ ਨੂੰ ਹਟਾਉਂਦਿਆਂ ਲੋਕਾਂ ਨੂੰ ਮਾਸਕ ਨਾ ਪਾਉਣ ਦੀ ਇਜ਼ਾਜਤ ਦੇ ਦਿੱਤੀ ਹੈ ਪਰ ਕੇਂਦਰ ਦੀਆਂ ਹਦਾਇਤ ਮੁਤਾਬਿਕ ਮਾਸਕ ਪਾਉਣਾ ਤੇ ਸਮਾਜਿਕ ਦੂਰੀ ਰੱਖਣਾ ਲਾਜ਼ਮੀ ਹੈ।