ਕੇਂਦਰੀ ਸੈਕੰਡਰੀ ਸਿੱਖਿਆ ਬੋਰਡ (ਸੀਬੀਐਸਈ) ਦੇ ਅਗਲੇ ਅਕਾਦਮਿਕ ਸਾਲ ਤੋਂ ਦਸਵੀਂ ਅਤੇ ਬਾਰ੍ਹਵੀਂ ਜਮਾਤ ਦੀਆਂ ਪ੍ਰੀਖਿਆਵਾਂ ਪਿਛਲੇ ਸਾਲਾਂ ਦੀ ਤਰ੍ਹਾਂ ਸਾਲ ਵਿੱਚ ਸਿਰਫ ਇੱਕ ਵਾਰ ਲਈਆਂ ਜਾਣਗੀਆਂ। ਬੋਰਡ ਹੁਣ ਆਪਣੇ ਪੁਰਾਣੇ ਟ੍ਰੈਕ ‘ਤੇ ਵਾਪਸ ਆ ਜਾਵੇਗਾ। ਇਸ ਤਹਿਤ ਇਹ ਪ੍ਰੀਖਿਆ ਪਹਿਲਾਂ ਦੀ ਤਰ੍ਹਾਂ ਸਾਲ ‘ਚ ਇਕ ਵਾਰ ਹੋਵੇਗੀ।
ਦੱਸ ਦਈਏ ਕਿ 2021-22 ਅਕਾਦਮਿਕ ਸਾਲ ਲਈ, ਬੋਰਡ ਨੇ ਬੋਰਡ ਪ੍ਰੀਖਿਆਵਾਂ ਦੋ ਟਰਮਾ ਚ ਲਈਆਂ ਸਨ। ਟਰਮ-1 ਬੋਰਡ ਦੀਆਂ ਪ੍ਰੀਖਿਆਵਾਂ ਨਵੰਬਰ-ਦਸੰਬਰ 2021 ਵਿੱਚ ਹੋਈਆਂ ਸਨ ਅਤੇ ਟਰਮ-2 ਦੀਆਂ ਪ੍ਰੀਖਿਆਵਾਂ ਇਸ ਸਾਲ 26 ਅਪ੍ਰੈਲ ਨੂੰ ਸ਼ੁਰੂ ਹੋਣਗੀਆਂ। ਟਰਮ 1 ਦੇ ਪੇਪਰਾਂ ਵਿੱਚ ਸਿਰਫ਼ ਬਹੁ-ਚੋਣ ਵਾਲੇ ਪ੍ਰਸ਼ਨ ਸ਼ਾਮਲ ਹੁੰਦੇ ਹਨ, ਜਦੋਂ ਕਿ ਟਰਮ 2 ਵਿੱਚ ਵਿਅਕਤੀਗਤ ਜਾਂ ਲੰਬੇ ਉੱਤਰਾਂ ਵਾਲੇ ਪ੍ਰਸ਼ਨ ਸ਼ਾਮਲ ਹੁੰਦੇ ਹਨ।
ਸੀਬੀਐਸਈ ਅਧਿਕਾਰੀ ਨੇ ਮੀਡੀਆ ਨੂੰ ਦੱਸਿਆ ਕਿ ਇਹ ਫੈਸਲਾ ਸਕੂਲਾਂ ਤੋਂ ਪ੍ਰਤੀਨਿਧਤਾ ਪ੍ਰਾਪਤ ਕਰਨ ਤੋਂ ਬਾਅਦ ਲਿਆ ਗਿਆ ਹੈ। ਉਸਨੇ ਅੱਗੇ ਕਿਹਾ ਕਿ ਬੋਰਡ ਨੇ ਕਦੇ ਵੀ ਦੋ-ਟਰਮ ਦੇ ਫਾਰਮੈਟ ਨੂੰ ਜਾਰੀ ਰੱਖਣ ਦਾ ਐਲਾਨ ਨਹੀਂ ਕੀਤਾ ਸੀ। ਅਧਿਕਾਰੀ ਨੇ ਦੱਸਿਆ ਕਿ ਸੀਬੀਐਸਈ ਨੇ ਹੁਣ ਫਿਰ ਸਿੰਗਲ ਪ੍ਰੀਖਿਆ ਫਾਰਮੈਟ ‘ਤੇ ਬਣੇ ਰਹਿਣ ਦਾ ਫੈਸਲਾ ਕੀਤਾ ਹੈ।
ਸੀਬੀਐਸਈ ਨੇ ਪਿਛਲੇ ਸਾਲ ਕੋਵਿਡ-19 ਮਹਾਮਾਰੀ ਦੇ ਚੱਲਦੇ ਇਸ ਸਾਲ ਲਈ 10ਵੀਂ ਅਤੇ 12ਵੀਂ ਦੀ ਪ੍ਰੀਖਿਆ ਲਈ ਦੋ ਟਰਮ ਦਾ ਫੈਸਲਾ ਕੀਤਾ ਸੀ।ਜੋ ਸਟੂਡੈਂਟਸ ਹੁਣ 10ਵੀਂ ਅਤੇ 12ਵੀਂ ਜਮਾਤ ਵਿੱਚ ਦਾਖਲਾ ਲੈ ਰਹੇ ਹਨ, ਉਨ੍ਹਾਂ ਲਈ 2022-23 ਦੇ ਵਿਦਿਅਕ ਸਾਲ ਦੀ ਬੋਰਡ ਅੰਤਮ ਪ੍ਰੀਖਿਆ ਇੱਕ ਵਾਰ ਹੋਵੇਗੀ।