ਫਿਲਮ ‘ਮੈਂ ਔਰ ਮਿਸਟਰ ਰਾਈਟ’, ‘ਹਮ-ਤੁਮ’, ‘ਦਿੱਲੀ-ਬੇਲੀ’,’ਉਮਰ’, ‘ਅੱਗੇ ਸੇ ਰਾਈਟ’, ‘ਰੇਡੀਓ’, ‘ਵਨ ਲਾਈਫ ਟੂ ਲਿਵ’ ਸਮੇਤ ਕਈ ਫਿਲਮਾਂ ‘ਚ ਕੰਮ ਕਰ ਚੁੱਕੀ ਅਭਿਨੇਤਰੀ ਸ਼ੇਨਾਜ਼ ਟਰੇਜ਼ਰੀ ਇਕ ਗੰਭੀਰ ਬੀਮਾਰੀ ਦਾ ਸ਼ਿਕਾਰ ਹੋ ਗਈ ਹੈ। ਅਭਿਨੇਤਰੀ ਸ਼ੇਨਾਜ਼ ਨੇ ਮੰਗਲਵਾਰ (29 ਜੂਨ) ਨੂੰ ਸੋਸ਼ਲ ਮੀਡੀਆ ਰਾਹੀਂ ਦੱਸਿਆ ਕਿ ਉਹ ਪ੍ਰੋਸੋਪੈਗਨੋਸੀਆ ਨਾਂ ਦੀ ਗੰਭੀਰ ਬੀਮਾਰੀ ਨਾਲ ਜੂਝ ਰਹੀ ਹੈ। ਇਸ ਬਿਮਾਰੀ ਨੂੰ face blindness ਵੀ ਕਿਹਾ ਜਾਂਦਾ ਹੈ। ਉਸ ਨੇ ਦੱਸਿਆ ਕਿ ਇਸ ਬਿਮਾਰੀ ਕਾਰਨ ਉਸ ਨੂੰ ਲੋਕਾਂ ਦੇ ਚਿਹਰੇ ਪਛਾਣਨ ਵਿੱਚ ਦਿੱਕਤ ਆਉਂਦੀ ਹੈ।
ਸ਼ੇਨਾਜ਼ ਨੇ ਆਪਣੀ ਪਹਿਲੀ ਸਟੋਰੀ ‘ਚ ਲਿਖਿਆ, ‘ਮੈਨੂੰ ਪ੍ਰੋਸੋਪੈਗਨੋਸੀਆ ਨਾਂ ਦੀ ਬੀਮਾਰੀ ਦਾ ਪਤਾ ਲੱਗਾ ਹੈ। ਹੁਣ ਸਮਝ ਆਇਆ ਕਿ ਮੈਨੂੰ ਕਈ ਚਿਹਰੇ ਕਿਉਂ ਯਾਦ ਨਹੀਂ ਹਨ। ਭੁੱਲਣ ਦੇ ਨਾਲ-ਨਾਲ, ਇਸਨੂੰ ਚਿਹਰੇ ਦਾ ਅੰਨ੍ਹਾਪਣ ਵੀ ਕਿਹਾ ਜਾਂਦਾ ਹੈ, ਜਿਸਦਾ ਮਤਲਬ ਹੈ ਕਿ ਤੁਸੀਂ ਲੋਕਾਂ ਦੇ ਚਿਹਰਿਆਂ ਨੂੰ ਨਹੀਂ ਪਛਾਣ ਸਕਦੇ। ਉਨ੍ਹਾਂ ਲਿਖਿਆ, ‘ਜੋ ਵਿਅਕਤੀ ਇਸ ਬੀਮਾਰੀ ਨਾਲ ਜੂਝ ਰਿਹਾ ਹੁੰਦਾ ਹੈ, ਉਹ ਆਪਣੇ ਕਰੀਬੀ ਦੋਸਤਾਂ ਅਤੇ ਪਰਿਵਾਰਕ ਮੈਂਬਰਾਂ ਦੇ ਚਿਹਰਿਆਂ ਨੂੰ ਵੀ ਨਹੀਂ ਪਛਾਣ ਸਕਦਾ।’ ਉਸਨੇ ਅੱਗੇ ਲਿਖਿਆ, ‘ਹਾਂ ਇਹ ਮੈਂ ਹਾਂ। ਲੋਕਾਂ ਨੂੰ ਪਛਾਣਨ ਲਈ ਮੈਨੂੰ ਸਮਾਂ ਲੱਗਦਾ ਹੈ। ਕਈ ਵਾਰ ਉਹ ਕਰੀਬੀ ਦੋਸਤ ਵੀ ਹੁੰਦੇ ਹਨ, ਜਿਨ੍ਹਾਂ ਨੂੰ ਮੈਂ ਕਈ ਦਿਨਾਂ ਤੋਂ ਨਹੀਂ ਦੇਖਿਆ ਹੁੰਦਾ ।
ਸ਼ੇਨਾਜ਼ ਨੇ ਲੋਕਾਂ ਨੂੰ ਅਪੀਲ ਕਰਦੇ ਹੋਏ ਲਿਖਿਆ, ‘ਕਿਰਪਾ ਕਰਕੇ ਮੈਨੂੰ ਸਮਝੋ, ਮੈਂ ਅਣਜਾਣ ਨਹੀਂ ਬਣਦੀ ਸੀ, ਇਹ ਸਭ ਇਸ ਕਾਰਨ ਹੋਇਆ। ਮੈਨੂੰ ਹਮੇਸ਼ਾ ਸ਼ਰਮ ਮਹਿਸੂਸ ਹੁੰਦੀ ਹੈ ਕਿ ਮੈਂ ਲੋਕਾਂ ਦੀ ਪਛਾਣ ਕਿਉਂ ਮਿਕਸ ਕਰ ਦਿੰਦੀ ਸੀ। ਅਜਿਹਾ ਮੇਰੇ ਕੋਲੋਂ ਨਾ ਸਿਰਫ਼ ਬਾਹਰਲੇ ਲੋਕਾਂ ਨਾਲ ਹੋਇਆ ਹੈ, ਸਗੋਂ ਨਜ਼ਦੀਕੀਆਂ ਨਾਲ ਵੀ ਹੋਇਆ ਹੈ। ਇਹ ਇੱਕ ਅਸਲੀ ਮਾਨਸਿਕ ਸਮੱਸਿਆ ਹੈ। ਕਿਰਪਾ ਕਰਕੇ ਮੈਨੂੰ ਸਮਝਣ ਦੀ ਕੋਸ਼ਿਸ਼ ਕਰੋ।