ਨਵੀਂ ਦਿੱਲੀ: ਨਿਸ਼ਾ ਰਾਵਲ ਅਤੇ ਕਰਨ ਮਹਿਰਾ ਟੀਵੀ ਦੀ ਮਸ਼ਹੂਰ ਜੋੜੀ ਵਿੱਚੋਂ ਇੱਕ ਸਨ। ਪਰ ਹੁਣ ਉਨ੍ਹਾਂ ਵਿਚਕਾਰ ਦੂਰੀ ਆ ਗਈ ਹੈ। ਹੁਣ ਦੋਵੇਂ ਇਕ-ਦੂਜੇ ‘ਤੇ ਗੰਭੀਰ ਦੋਸ਼ ਲਗਾਉਂਦੇ ਨਜ਼ਰ ਆ ਰਹੇ ਹਨ। ਪਿਛਲੇ ਸਾਲ ਨਿਸ਼ਾ ਨੇ ਅਭਿਨੇਤਾ ਅਤੇ ਉਨ੍ਹਾਂ ਦੇ ਪਰਿਵਾਰ ‘ਤੇ ਘਰੇਲੂ ਹਿੰਸਾ ਦਾ ਦੋਸ਼ ਲਗਾਇਆ ਸੀ। ਜਿਸ ਤੋਂ ਬਾਅਦ ਕਰਨ ਨੂੰ ਵੀ ਮੁੰਬਈ ਪੁਲਸ ਨੇ ਗ੍ਰਿਫਤਾਰ ਕਰ ਲਿਆ ਸੀ ਪਰ ਕੁਝ ਘੰਟਿਆਂ ਬਾਅਦ ਉਸ ਨੂੰ ਜ਼ਮਾਨਤ ਮਿਲ ਗਈ। ਫਿਲਹਾਲ ਦੋਵੇਂ ਤਲਾਕ ਅਤੇ ਬੇਟੇ ਕਵੀਸ਼ ਦੀ ਕਸਟਡੀ ਲਈ ਅਦਾਲਤ ਦੇ ਚੱਕਰ ਲਗਾ ਰਹੇ ਹਨ। ਇਸ ਦੌਰਾਨ ਕਰਨ ਨੇ ਹੁਣ ਪ੍ਰੈੱਸ ਕਾਨਫਰੰਸ ਕਰਕੇ ਨਿਸ਼ਾ ‘ਤੇ ਕਈ ਗੰਭੀਰ ਦੋਸ਼ ਲਗਾਏ ਹਨ। ਕਰਨ ਨੇ ਪ੍ਰੈਸ ਕਾਨਫਰੰਸ ਦੇ ਵਿੱਚ ਨਿਸ਼ਾ ਉੱਤੇ ਰੋਹਿਤ ਸੇਠਿਆ ਨਾਲ ਐਕਸਟਰਾ ਮੈਰੀਟੀਅਲ ਅਫੇਅਰ ਦਾ ਦੋਸ਼ ਲਾਇਆ ਹੈ। ਕਰਨ ਨੇ ਕਿਹਾ ਕਿ ਇੱਕ ਪਾਸੇ ਦੋਵੇਂ ਭੈਂਣ-ਭਰਾ ਦਾ ਰਿਸ਼ਤਾ ਦੱਸਦੇ ਹਨ।
ਮੇਰੇ ਵਿਆਹ ‘ਤੇ ਰੋਹਿਤ ਸੇਠਿਆ ਨੇ ਹੀ ਨਿਸ਼ਾ ਦਾ ਕੰਨਿਆਦਾਨ ਕੀਤਾ ਸੀ। ਮੈਂ ਇਹ ਸਭ ਕੁਝ ਪਹਿਲਾਂ ਨਹੀਂ ਦੱਸ ਸਕਦਾ ਸੀ, ਇਹ ਸਭ ਕੁਝ ਮੇਰੇ ਨਾਲ ਪਿਛਲੇ ਸਾਲ ਵਾਪਰਿਆ ਹੈ। ਜੇਕਰ ਮੈਂ ਉਸ ਸਮੇਂ ਕਿਹਾ ਹੁੰਦਾ ਤਾਂ ਸਭ ਨੇ ਕਿਹਾ ਹੁੰਦਾ ਕਿ ਪਤਨੀ ਨੇ ਉਨ੍ਹਾਂ ‘ਤੇ ਇਲਜ਼ਾਮ ਲਗਾਏ ਹਨ ਤਾਂ ਬਦਲੇ ‘ਚ ਕਰਨ ਨੇ ਵੀ ਅਜਿਹੇ ਦੋਸ਼ ਲਾਏ ਹਨ। ਕਰਨ ਨੇ ਅੱਗੇ ਕਿਹਾ ਕਿ ਇਹ ਸਾਰੇ ਸਬੂਤ ਇਕੱਠੇ ਕਰਨ ਵਿੱਚ ਉਸ ਨੂੰ 14 ਮਹੀਨੇ ਦਾ ਸਮਾਂ ਲੱਗਾ ਹੈ। ਕਰਨ ਨੇ ਕਿਹਾ ਕਿ ਇੱਕ-ਇੱਕ ਈਵੈਂਟ, ਇੱਕ-ਇੱਕ ਚੀਜ਼, ਇਸ ਨਾਲ ਗੱਲ ਕਰੋ, ਕਦੇ ਕਿਸੇ ਹੋਰ ਨਾਲ ਗੱਲ ਕਰੋ , ਇਨ੍ਹਾਂ ਸਬੂਤਾਂ ਨੂੰ ਇੱਕਠਾ ਕਰਨ ਲਈ ਮੈਨੂੰ ਤਕਰੀਬਨ 14 ਮਹੀਨੇ ਲੱਗ ਗਏ। ਦੋਸਤਾਂ ਕੁਝ ਦੱਸਿਆ, ਕਿਸੇ ਨੇ ਕੁਝ। ਇਹ ਸਭ ਕੁਝ ਮੇਰੇ ਬੱਚੇ ਦੇ ਸਾਹਮਣੇ ਹੋਇਆ ਹੈ। ਜਿਸ ਕਾਰਨ ਉਸ ‘ਤੇ ਮਾੜਾ ਅਸਰ ਪਵੇਗਾ।
ਕਰਨ ਨੇ ਨਿਸ਼ਾ ਉੱਤੇ ਇਹ ਵੀ ਦੋਸ਼ ਲਾਇਆ ਕਿ ਉਸ ਦੇ ਮਾਪਿਆਂ ਤੇ ਛੋਟੇ ਭਰਾ ਨੂੰ ਜਾਣਬੁੱਝ ਕੇ ਫਸਾਇਆ ਗਿਆ ਹੈ। ਦਰਅਸਲ ਨਿਸ਼ਾ ਤੇ ਰੋਹਿਤ ਸੇਠਿਆ ਮਿਲ ਕੇ ਉਸ ਦਾ ਬਿਜ਼ਨਸ ਤੇ ਘਰ ਉੱਤੇ ਕਬਜ਼ਾ ਕਰਨਾ ਚਾਹੁੰਦੇ ਹਨ। ਇਹ ਸਭ ਕਰਨ ਦੇ ਲਈ ਉਹ ਉਸ ਦੇ ਬੇਟੇ ਕਵੀਸ਼ ਨੂੰ ਇਮੋਸ਼ਨਲ ਹਥਿਆਰ ਵਾਂਗ ਇਸਤੇਮਾਲ ਕਰ ਰਹੇ ਹਨ। ਕਰਨ ਨੇ ਕਿਹਾ ਕਿ ਉਹ ਸੱਚਾਈ, ਆਪਣੇ ਤੇ ਆਪਣੇ ਪਰਿਵਾਰ ਅਤੇ ਆਪਣੇ ਪੁੱਤਰ ਦੇ ਭੱਵਿਖ ਲਈ ਇਹ ਕਾਨੂੰਨੀ ਲੜਾਈ ਲੜ ਰਹੇ ਹਨ। ਜਦੋਂ ਤੱਕ ਇਨਸਾਫ ਨਹੀਂ ਮਿਲ ਜਾਂਦਾ ਉਹ ਇਹ ਜਾਰੀ ਰੱਖਣਗੇ। ਕਰਨ ਦੀ ਇਸ ਪ੍ਰੈਸ ਕਾਨਫਰੰਸ ਤੋਂ ਬਾਅਦ ਜਦੋਂ ਮੀਡੀਆ ਨੇ ਇਸ ਪੂਰੇ ਮਾਮਲੇ ‘ਤੇ ਨਿਸ਼ਾ ਨਾਲ ਗੱਲ ਕਰਨੀ ਚਾਹੀ ਤਾਂ ਉਸ ਨੇ ਇਨ੍ਹਾਂ ਦੋਸ਼ਾਂ ‘ਤੇ ਪ੍ਰਤੀਕਿਰਿਆ ਦੇਣ ਤੋਂ ਇਨਕਾਰ ਕਰ ਦਿੱਤਾ।
