84 ਸਾਲਾਂ ਪ੍ਰਸਿੱਧ ਸੰਤੂਰ ਵਾਦਕ ਪੰਡਿਤ ਸ਼ਿਵਕੁਮਾਰ ਸ਼ਰਮਾ ਦਾ ਅੱਜ ਮੁੰਬਈ ਵਿੱਚ ਦਿਲ ਦਾ ਦੌਰਾ ਪੈਣ ਕਾਰਨ ਦਿਹਾਂਤ ਹੋ ਗਿਆ। ਜਾਣਕਾਰੀ ਮੁਤਾਬਿਕ ਪੰਡਿਤ ਸ਼ਿਵਕੁਮਾਰ ਸ਼ਰਮਾ ਗੁਰਦਿਆਂ ਸਬੰਧੀ ਬਿਮਾਰੀ ਤੋਂ ਪੀੜਤ ਸਨ। ਉਹ ਪਿਛਲੇ ਛੇ ਮਹੀਨਿਆਂ ਤੋਂ ਡਾਇਲਸਿਸ ‘ਤੇ ਸੀ। ਦੱਸ ਦੇਈਏ ਕਿ ਪੰਡਿਤ ਸ਼ਿਵ ਕੁਮਾਰ ਸ਼ਰਮਾ ਦਾ ਸਿਨੇਮਾ ਦੀ ਦੁਨੀਆ ਵਿੱਚ ਅਹਿਮ ਯੋਗਦਾਨ ਰਿਹਾ । ਬਾਲੀਵੁੱਡ ‘ਚ ‘ਸ਼ਿਵ-ਹਰੀ’ ਦੇ ਨਾਂ ਨਾਲ ਮਸ਼ਹੂਰ ਸ਼ਿਵ ਕੁਮਾਰ ਸ਼ਰਮਾ ਅਤੇ ਹਰੀ ਪ੍ਰਸਾਦ ਚੌਰਸੀਆ ਦੀ ਜੋੜੀ ਨੇ ਕਈ ਸੁਪਰਹਿੱਟ ਗੀਤਾਂ ਨੂੰ ਸੰਗੀਤ ਦਿੱਤਾ ਹੈ।
ਜ਼ਿਕਰਯੋਗ ਹੈ ਕਿ ਸੰਤੂਰ ਵਾਦਕ ਪੰਡਿਤ ਸ਼ਿਵਕੁਮਾਰ ਸ਼ਰਮਾ ਅਤੇ ਬੰਸਰੀ ਵਾਦਕ ਪੰਡਿਤ ਹਰੀਪ੍ਰਸਾਦ ਚੌਰਸੀਆ ਦੋਵੇਂ ਆਪਣੀ ਜੁਗਲਬੰਦੀ ਲਈ ਮਸ਼ਹੂਰ ਸਨ। 1967 ਵਿੱਚ ਪਹਿਲੀ ਵਾਰ ਇਸ ਜੋੜੀ ਨੇ ਸ਼ਿਵ-ਹਰੀ ਨਾਮ ਦੀ ਇੱਕ ਕਲਾਸੀਕਲ ਐਲਬਮ ਤਿਆਰ ਕੀਤੀ ਸੀ। ਐਲਬਮ ਦਾ ਨਾਮ ਸੀ ਕਾਲ ਆਫ ਦ ਵੈਲੀ। ਇਸ ਤੋਂ ਬਾਅਦ ਦੋਹਾਂ ਨੇ ਇਕੱਠੇ ਕਈ ਮਿਊਜ਼ਿਕ ਐਲਬਮਾਂ ਕੀਤੀਆਂ। ਇਸ ਤੋਂ ਬਾਅਦ 1981 ਦੀ ਫਿਲਮ ‘ਸਿਲਸਿਲਾ’ ਵਿੱਚ ਸ਼ਿਵ-ਹਰੀ ਦੀ ਜੋੜੀ ਦੁਆਰਾ ਸੰਗੀਤ ਦਿੱਤਾ ਗਿਆ ਸੀ। ਇਸ ਜੋੜੀ ਨੇ ਯਸ਼ ਚੋਪੜਾ ਦੀਆਂ ਚਾਰ ਫਿਲਮਾਂ ਸਮੇਤ ਕੁੱਲ ਅੱਠ ਫਿਲਮਾਂ ਲਈ ਸੰਗੀਤ ਤਿਆਰ ਕੀਤਾ ਸੀ। ਇਸ ਤੋਂ ਇਲਾਵਾ ਮਸ਼ਹੂਰ ਫਿਲਮ ‘ਚਾਂਦਨੀ’ ਦਾ ਗੀਤ ‘ਮੇਰੇ ਹੱਥੋਂ ਮੈਂ ਨੌਂ ਨੌਂ ਚੂੜੀਆਂ’ ਲੋਕਾਂ ਦੁਆਰਾ ਬਹੁਤ ਪਸੰਦ ਕੀਤਾ ਗਿਆ ਜੋ ਕਿ ਮਰਹੂਮ ਅਦਾਕਾਰਾ ਸ਼੍ਰੀਦੇਵੀ ‘ਤੇ ਫਿਲਮਾਇਆ ਗਿਆ ਸੀ ।