ਅਦਾਕਾਰਾ ਰਿਚਾ ਚੱਢਾ ‘ਫੁਕਰੇ 3’ ਵਿੱਚ ‘ਭੋਲੀ ਪੰਜਾਬਣ’ ਦਾ ਕਿਰਦਾਰ ਦੁਹਰਾਉਣ ਲਈ ਤਿਆਰ ਹੈ। ਇਸ ਬਾਰੇ ਰਿਚਾ ਨੇ ਕਿਹਾ, ”ਭੋਲੀ ਪੰਜਾਬਣ ਇਕ ਮਸ਼ਹੂਰ ਕਿਰਦਾਰ ਹੈ। ਉਹ ਇੱਕ ਦਲੇਰ ਗੈਂਗਸਟਰ ਹੈ, ਜੋ ਚੀਜ਼ਾਂ ਨੂੰ ਆਪਣੇ ਅਨੁਸਾਰ ਢਾਲਣਾ ਜਾਣਦੀ ਹੈ। ਮੈਨੂੰ ਵੱਡੇ ਪਰਦੇ ‘ਤੇ ਇਹ ਕਿਰਦਾਰ ਨਿਭਾਉਣ ਵਿੱਚ ਬਹੁਤ ਮਜ਼ਾ ਆਇਆ।” ਉਸ ਨੇ ਕਿਹਾ, ”ਸਾਲਾਂਬੱਧੀ ਇਸ ਫਿਲਮ ਦੇ ਪ੍ਰਸ਼ੰਸਕਾਂ ਵਿੱਚ ਕਈ ਗੁਣਾ ਵਾਧਾ ਹੋਇਆ ਹੈ, ਖ਼ਾਸ ਕਰ ਕੇ ਇਸ ਕਿਰਦਾਰ ਨੂੰ ਪਸੰਦ ਕਰਨ ਵਾਲੇ ਬੱਚਿਆਂ ਦੀ ਗਿਣਤੀ ਕਾਫੀ ਵਧੀ ਹੈ ਪਰ ਜੇ ਤੁਸੀਂ ਮੈਨੂੰ ਪੁੱਛੋ ਤਾਂ ਇਹ ਮੇਰੇ ਲਈ ਫਿਲਮ ਫਰੈਂਚਾਇਜ਼ੀ ਨਾਲੋਂ ਕਿਤੇ ਵੱਧ ਹੈ।
ਇਸ ਯਾਤਰਾ ਦੌਰਾਨ ਮੈਂ ਦੋ ਮਹੱਤਵਪੂਰਨ ਰਿਸ਼ਤੇ ਸ਼ੁਰੂ ਕੀਤੇ। ਅਗਲੇ ਪ੍ਰਾਜੈਕਟਾਂ ਲਈ ਬਹੁਤ ਉਤਸ਼ਾਹਿਤ ਹਾਂ ਅਤੇ ਪ੍ਰਸ਼ੰਸਕਾਂ ਵੱਲੋਂ ਦਿੱਤੇ ਜਾ ਰਹੇ ਪਿਆਰ ਲਈ ਧੰਨਵਾਦੀ ਹਾਂ।” ਮ੍ਰਿਗਦੀਪ ਸਿੰਘ ਲਾਂਬਾ ਦੇ ਨਿਰਦੇਸ਼ਨ ਹੇਠ ਬਣਨ ਵਾਲੀ ਇਹ ਫਿਲਮ ‘ਐਕਸਲ ਐਂਟਰਟੇਨਮੈਂਟ’ ਦੇ ਬੈਨਰ ਹੇਠ ਰਿਲੀਜ਼ ਹੋਵੇਗੀ। ਇਹ ਫਿਲਮ ਚਾਰ ਦੋਸਤਾਂ ‘ਤੇ ਆਧਾਰਿਤ ਹੈ, ਜੋ ਆਸਾਨੀ ਨਾਲ ਪੈਸਾ ਕਮਾਉਣ ਲਈ ਇਕੱਠੇ ਹੁੰਦੇ ਹਨ। ਜ਼ਿਕਰਯੋਗ ਹੈ ਕਿ ਇਸ ਵੇਲੇ ਦਿੱਲੀ ਵਿੱਚ ‘ਫੁਕਰੇ 3’ ਦੀ ਸ਼ੂਟਿੰਗ ਚੱਲ ਰਹੀ ਹੈ।
