ਸੁਪਰਸਟਾਰ ਸ਼ਾਹਰੁਖ ਖਾਨ ਦੀ ਬੇਟੀ ਸੁਹਾਨਾ ਖਾਨ ਨੇ ਰੀਅਲ ਅਸਟੇਟ ‘ਚ ਨਿਵੇਸ਼ ਕੀਤਾ ਹੈ। ਮੀਡੀਆ ਰਿਪੋਰਟਾਂ ਮੁਤਾਬਕ ਅਦਾਕਾਰਾ ਸੁਹਾਨਾ ਨੇ ਮੁੰਬਈ ਨੇੜੇ ਅਲੀਬਾਗ ‘ਚ ਇਕ ਵੱਡੀ ਜਾਇਦਾਦ ਖਰੀਦੀ ਹੈ।
ਜਾਣਕਾਰੀ ਅਨੁਸਾਰ ਉਸ ਨੇ ਥਾਲ ਪਿੰਡ ਵਿੱਚ 9 ਕਰੋੜ 50 ਲੱਖ ਰੁਪਏ ਦੀ ਜ਼ਮੀਨ ਖਰੀਦੀ ਹੈ, ਜਿਸ ਲਈ ਉਸ ਨੇ 57 ਲੱਖ ਰੁਪਏ ਦੀ ਸਟੈਂਪ ਡਿਊਟੀ ਅਦਾ ਕੀਤੀ ਹੈ। ਅਜਿਹੇ ‘ਚ ਸੁਹਾਨਾ ਨੇ ਇਸ ਜ਼ਮੀਨ ‘ਤੇ ਕੁੱਲ 10 ਕਰੋੜ ਰੁਪਏ ਦਾ ਨਿਵੇਸ਼ ਕੀਤਾ ਹੈ।
ਇਸ ਜ਼ਮੀਨ ਦੀ ਰਜਿਸਟਰੀ 13 ਫਰਵਰੀ ਨੂੰ ਹੋਈ ਸੀ। ਦਸਤਾਵੇਜ਼ਾਂ ਦੇ ਅਨੁਸਾਰ, ਸੁਹਾਨਾ ਨੇ ਥਾਲ ਪਿੰਡ, ਰਾਏਗੜ੍ਹ, ਅਲੀਬਾਗ ਵਿੱਚ ਕੁੱਲ 1.8 ਏਕੜ ਵਾਹੀਯੋਗ ਜ਼ਮੀਨ ਵਿੱਚ ਨਿਵੇਸ਼ ਕੀਤਾ ਹੈ। ਜੂਨ 2023 ਵਿੱਚ ਆਪਣੀ ਅਦਾਕਾਰੀ ਦੀ ਸ਼ੁਰੂਆਤ ਤੋਂ ਪਹਿਲਾਂ ਹੀ ਸੁਹਾਨਾ ਨੇ ਅਲੀਬਾਗ ਵਿੱਚ 1.5 ਏਕੜ ਜ਼ਮੀਨ ਖਰੀਦੀ ਸੀ। ਇਹ ਸੌਦਾ 12.19 ਕਰੋੜ ਰੁਪਏ ਵਿੱਚ ਹੋਇਆ ਸੀ।
ਸ਼ਾਹਰੁਖ ਦੀ ਪਹਿਲਾਂ ਤੋਂ ਹੀ ਅਲੀਬਾਗ ‘ਚ ਸਮੁੰਦਰ ਦੇ ਸਾਹਮਣੇ ਜਾਇਦਾਦ ਹੈ। ਉਹ ਅਤੇ ਉਸਦੇ ਪਰਿਵਾਰਕ ਮੈਂਬਰ ਅਕਸਰ ਇੱਥੇ ਪਾਰਟੀਆਂ ਕਰਦੇ ਹਨ। ਸ਼ਾਹਰੁਖ ਨੇ ਆਪਣੇ 52ਵੇਂ ਜਨਮਦਿਨ ‘ਤੇ ਅਲੀਬਾਗ ‘ਚ ਹੀ ਇਕ ਸ਼ਾਨਦਾਰ ਪਾਰਟੀ ਦਾ ਆਯੋਜਨ ਕੀਤਾ ਸੀ। ਉਨ੍ਹਾਂ ਦੇ ਬੰਗਲੇ ‘ਚ ਸਵੀਮਿੰਗ ਪੂਲ ਅਤੇ ਹੈਲੀਪੈਡ ਵੀ ਹੈ। ਅਲੀਬਾਗ ਹਮੇਸ਼ਾ ਤੋਂ ਹੀ ਬੌਲੀਵੁੱਡ ਸੈਲੇਬਸ ਦੀ ਪਸੰਦੀਦਾ ਜਗ੍ਹਾ ਰਿਹਾ ਹੈ।
ਇਸਤੋਂ ਪਹਿਲਾਂ ਬੌਲੀਵੁੱਡ ਅਦਾਕਾਰਾ ਦੀਪਿਕਾ ਪਾਦੂਕੋਣ ਨੇ ਆਪਣੇ ਪਤੀ ਰਣਵੀਰ ਸਿੰਘ ਨਾਲ ਇੱਥੇ 22 ਕਰੋੜ ਰੁਪਏ ‘ਚ ਘਰ ਖਰੀਦਿਆ ਸੀ। ਇਸ ਦੇ ਨਾਲ ਹੀ ਕ੍ਰਿਕਟਰ ਵਿਰਾਟ ਕੋਹਲੀ ਨੇ ਆਪਣੀ ਪਤਨੀ ਅਨੁਸ਼ਕਾ ਨਾਲ ਮਿਲ ਕੇ ਅਲੀਬਾਗ ‘ਚ 20 ਕਰੋੜ ਰੁਪਏ ਦੀ ਜ਼ਮੀਨ ਖਰੀਦੀ ਸੀ।
ਵਰਕ ਫਰੰਟ ਦੀ ਗੱਲ ਕਰੀਏ ਤਾਂ ਸੁਹਾਨਾ ਨੇ ਜ਼ੋਇਆ ਅਖਤਰ ਦੀ ਫਿਲਮ ‘ਦਿ ਆਰਚੀਜ਼’ ਨਾਲ ਡੈਬਿਊ ਕੀਤਾ ਸੀ। ਇਸ ਫਿਲਮ ‘ਚ ਮਰਹੂਮ ਸ਼੍ਰੀਦੇਵੀ ਦੀ ਬੇਟੀ ਖੁਸ਼ੀ ਕਪੂਰ ਅਤੇ ਮੈਗਾਸਟਾਰ ਅਮਿਤਾਭ ਬੱਚਨ ਦੇ ਪੋਤੇ ਅਗਸਤਿਆ ਵੀ ਨਜ਼ਰ ਆਏ ਸਨ।
ਮੀਡੀਆ ਰਿਪੋਰਟਾਂ ਦੀ ਮੰਨੀਏ ਤਾਂ ਸੁਹਾਨੀ ਆਪਣੀ ਅਗਲੀ ਫਿਲਮ ‘ਚ ਪਿਤਾ ਸ਼ਾਹਰੁਖ ਖਾਨ ਨਾਲ ਨਜ਼ਰ ਆਵੇਗੀ। ਇਸ ਦੀ ਸ਼ੂਟਿੰਗ ਮਈ 2024 ਤੱਕ ਸ਼ੁਰੂ ਹੋ ਸਕਦੀ ਹੈ। ਇਹ ਇੱਕ ਐਕਸ਼ਨ-ਥ੍ਰਿਲਰ ਫਿਲਮ ਹੋਵੇਗੀ ਜਿਸ ਦਾ ਨਿਰਦੇਸ਼ਨ ਸੁਜੋਏ ਘੋਸ਼ ਕਰਨਗੇ।
