ਬਾਲੀਵੁੱਡ ‘ਚ ਇਸ ਸਮੇਂ ਬਾਇਓਪਿਕ ਦਾ ਸੀਜ਼ਨ ਚੱਲ ਰਿਹਾ ਹੈ। ਖਾਸ ਤੌਰ ‘ਤੇ ਕ੍ਰਿਕਟ ‘ਤੇ ਕਈ ਫਿਲਮਾਂ ਬਣ ਰਹੀਆਂ ਹਨ। ਰਣਵੀਰ ਸਿੰਘ ਦੀ ’83’ ਤੋਂ ਬਾਅਦ ਅਨੁਸ਼ਕਾ ਸ਼ਰਮਾ ‘ਚੱਕਦਾ ਐਕਸਪ੍ਰੈਸ’ ਲੈ ਕੇ ਆ ਰਹੀ ਹੈ। ਇਸ ਦੇ ਨਾਲ ਹੀ ਤਾਪਸੀ ਪੰਨੂ ‘ਸ਼ਾਬਾਸ਼ ਮਿੱਠੂ’ ‘ਚ ਵੀ ਨਜ਼ਰ ਆਵੇਗੀ। ਤਾਪਸੀ ਪੰਨੂ ਦੀ ਇਸ ਫਿਲਮ ਦੀ ਰਿਲੀਜ਼ ਡੇਟ ਦਾ ਖੁਲਾਸਾ ਹੋ ਗਿਆ ਹੈ। ਸ਼ਾਬਾਸ਼ ਮਿੱਠੂ 15 ਜੁਲਾਈ 2022 ਨੂੰ ਰਿਲੀਜ਼ ਹੋਵੇਗੀ। ਇਸ ਫਿਲਮ ਦੀ ਕਹਾਣੀ ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਦੀ ਕਪਤਾਨ ਮਿਤਾਲੀ ਰਾਜ ਦੀ ਅਸਲ ਜ਼ਿੰਦਗੀ ਉੱਤੇ ਅਧਾਰਿਤ ਹੈ। ਇਸ ਫਿਲਮ ਦੇ ਵਿੱਚ ਆਦਾਕਾਰਾ ਤਾਪਸੀ ਪੰਨੂ ਮਿਤਾਲੀ ਦਾ ਕਿਰਦਾਰ ਅਦਾ ਕਰ ਰਹੀ ਹੈ।
ਇਸ ਦੇ ਲਈ ਤਾਪਸੀ ਨੇ ਲਗਾਤਾਰ ਕਈ ਮਹੀਨੀਆਂ ਤੱਕ ਕ੍ਰਿਕਟ ਦੀ ਪ੍ਰੈਕਟਿਸ ਵੀ ਕੀਤੀ। ਇਸ ਫਿਲਮ ਵਿੱਚ ਇੱਕ ਨਿੱਕੇ ਜਿਹੇ ਸ਼ਹਿਰ ਤੋਂ ਨਿਕਲ ਕੇ ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਦੀ ਕਪਤਾਨ ਬਨਣ ਤੱਕ ਮਿਤਾਲੀ ਦੇ ਸਫ਼ਰ ਨੂੰ ਦਿਖਾਇਆ ਜਾਵੇਗਾ। ਇਸ ਦੇ ਨਾਲ ਉਸ ਦੇ ਇਸ ਸਫ਼ਰ ਦੌਰਾਨ ਆਈਆਂ ਮੁਸ਼ਕਲਾਂ ਨੂੰ ਵਿਖਾਇਆ ਗਿਆ ਹੈ। ਇਸ ਫਿਲਮ ਵਿੱਚ ਤਾਪਸੀ ਪੰਨੂ ਤੋਂ ਇਲਾਵਾ ਵਿਜੇ ਰਾਜ਼ ਵੀ ਸ਼ਾਮਲ ਹਨ। ਫਿਲਮ ਦਾ ਨਿਰਦੇਸ਼ਨ ਮਸ਼ਹੂਰ ਬੰਗਾਲੀ ਫਿਲਮ ਨਿਰਮਾਤਾ ਸ਼੍ਰੀਜੀਤ ਮੁਖਰਜੀ ਨੇ ਕੀਤਾ ਹੈ। ਦੱਸਣਯੋਗ ਹੈ ਕਿ ਸ਼ਾਬਾਸ਼ ਮਿੱਠੂ ਦੀ ਸ਼ੁਰੂਆਤੀ ਰਿਲੀਜ਼ ਮਿਤੀ 4 ਫਰਵਰੀ, 2022 ਰੱਖੀ ਗਈ ਸੀ।
ਪਿਛਲੇ ਸਾਲ, ਤਾਪਸੀ ਨੇ ਫਿਲਮ ਦੀ ਸ਼ੂਟਿੰਗ ਪੂਰੀ ਕਰਨ ਤੋਂ ਬਾਅਦ ਇੱਕ ਫੋਟੋ ਸਾਂਝੀ ਕੀਤੀ ਸੀ। ਇਸ ਤਸਵੀਰ ਦੇ ਨਾਲ ਤਾਪਸੀ ਨੇ ਲਿਖਿਆ, “ਮੈਂ 8 ਸਾਲ ਦੀ ਸੀ ਜਦੋਂ ਕਿਸੇ ਨੇ ਮੈਨੂੰ ਇਹ ਸੁਪਨਾ ਵਿਖਾਇਆ ਕਿ ਇੱਕ ਦਿਨ, ਕ੍ਰਿਕੇਟ ਮਹਿਜ਼ ਇੱਕ ਜੈਂਟਲਮੈਨ ਦੀ ਖੇਡ ਨਹੀਂ ਹੋਵੇਗੀ। ਇੱਥੋਂ ਤੱਕ ਕਿ ਸਾਡੀ ਟੀਮ ਅਤੇ ਪਛਾਣ ਹੋਵੇਗੀ। ‘ਬਲੂ ਇਨ ਵੂਮੈਨ’। ਅਸੀਂ ਜਲਦੀ ਹੀ ਆ ਰਹੇ ਹਾਂ। #ShabaashMithu ਇਹ ਇੱਕ ਫਿਲਮ ਰੈਪ ਹੈ! ਵਿਸ਼ਵ ਕੱਪ 2022 ਦੀ ਖੁਸ਼ੀ ਲਈ ਤਿਆਰ ਹੋ ਜਾਓ! #WomenInBlue।”
