ਲੰਬੇ ਸਮੇਂ ਤੋਂ ਫੇਅਰ ਐਂਡ ਲਵਲੀ ਦੀ ਪੋਸਟਰ ਗਰਲ ਰਹੀ ਯਾਮੀ ਗੌਤਮ ਨੇ ਖੁਲਾਸਾ ਕੀਤਾ ਹੈ ਕਿ ਉਹ ‘ਕੇਰਾਟੋਸਿਸ ਪਿਲਾਰਿਸ’ ਨਾਂ ਦੀ ਚਮੜੀ ਨਾਲ ਜੁੜੀ ਬੀਮਾਰੀ ਨਾਲ ਜੂਝ ਰਹੀ ਹੈ ਅਤੇ ਇਸ ਬਿਮਾਰੀ ਦਾ ਕੋਈ ਇਲਾਜ ਨਹੀਂ ਹੈ। ਯਾਮੀ ਨੇ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ਉੱਤੇ ਆਪਣੀਆਂ ਕੁਝ ਤਸਵੀਰਾਂ ਪੋਸਟ ਕੀਤੀਆ ਹਨ। ਇਨ੍ਹਾਂ ਤਸਵੀਰਾਂ ਬਾਰੇ ਯਾਮੀ ਨੇ ਦੱਸਿਆ ਕਿ ਇਹ ਉਸ ਦੀਆਂ ਅਨਐਡਿਟ ਤਸਵੀਰਾਂ ਹਨ।
ਉਸ ਨੇ ਕਿਹਾ ਕਿ ਇਸ ਤਸਵੀਰਾਂ ਵਿੱਚ ਉਸ ਦੇ ਸਰੀਰ ਉੱਤੇ ਲਾਲ ਰੰਗ ਦੇ ਦਾਣੇ ਨਜ਼ਰ ਆ ਰਹੇ ਹਨ, ਇਹ ਧੁਪ ਜਾਂ ਆਮ ਤੌਰ ‘ਤੇ ਹੋਣ ਵਾਲੇ ਦਾਣੇ ਨਹੀਂ ਹਨ। ਬਲਕਿ ਉਹ ਇੱਕ ਸਕਿਨ ਐਲਰਜੀ ਦੇ ਕਾਰਨ ਹੋਏ ਹਨ। ਉਸ ਨੇ ਕਿਹਾ ਕਿ ਇਹ ਬਿਮਾਰੀ ਲਾਇਲਾਜ ਹੈ। ਆਪਣੀ ਪੋਸਟ ਵਿੱਚ ਲਿਖਦੇ ਹੋਏ ਯਾਮੀ ਨੇ ਦੱਸਿਆ ਕਿ ਉਸ ਨੂੰ ਇਹ ਬਿਮਾਰੀ ਟੀਨਏਜ਼ ਦੇ ਸਮੇਂ ਤੋਂ ਹੀ ਹੈ ਤੇ ਇਹ ਹਮੇਸ਼ਾ ਰਹੇਗੀ। ਯਾਮੀ ਨੇ ਦੱਸਿਆ ਕਿ ਜਿਹੜੇ ਲੋਕ ਨਹੀਂ ਜਾਣਦੇ, ਉਨ੍ਹਾਂ ਨੂੰ ਮੈਂ ਦੱਸਣਾ ਚਾਹੁੰਦੀ ਹਾਂ, ਇਸ ਬਿਮਾਰੀ ਦੇ ਚਲਦੇ ਨਿੱਕੇ -ਨਿੱਕੇ ਦਾਣੇ ਨਿਕਲ ਆਉਂਦੇ ਹਨ। ਇਹ ਖੁਰਦਰੇ, ਡਰਾਈ ਰਹਿੰਦੇ ਹਨ।
ਇਹ ਬਿਮਾਰੀ ਕਿਸੇ ਵੀ ਉਮਰ ਦੇ ਵਿਅਕਤੀ ਨੂੰ ਹੋ ਸਕਦੀ ਹੈ। ਮੌਸਮ ਦੇ ਬਦਲਾਅ ਕਾਰਨ ਸਕਿਨ ਵਿੱਚ ਨਮੀ ਦੀ ਕਮੀ ਦੇ ਕਾਰਨ ਵੀ ਇਹ ਸਮੱਸਿਆ ਹੋ ਸਕਦੀ ਹੈ। ਇਸ ਸਬੰਧੀ ਯਾਮੀ ਨੇ ਆਪਣੇ ਇੱਕ ਇੰਟਰਵੀਊ ਦੇ ਵਿੱਚ ਵੀ ਖੁੱਲ੍ਹ ਕੇ ਗੱਲ ਕੀਤੀ। ਯਾਮੀ ਨੇ ਦੱਸਿਆ ਕਿ ਸ਼ੂਟਿੰਗ ਦੇ ਦੌਰਾਨ ਉਸ ਨੂੰ ਇਹ ਦਾਣੇ ਛੁਪਾਉਣੇ ਬੇਹੱਦ ਔਖਾ ਲੱਗਦਾ ਸੀ। ਇਸ ਬਿਮਾਰੀ ਦੀ ਜਾਣਕਾਰੀ ਸਾਂਝੀ ਕਰਨ ਦੇ ਵਿੱਚ ਮੈਨੂੰ ਕਈ ਸਾਲ ਲੱਗ ਗਏ। ਮੈਂ ਪੋਸਟ ‘ਤੇ ਫੈਨਜ਼ ਦੀ ਪ੍ਰਤੀਕੀਰਿਆ ਵੇਖ ਕੇ ਬਹੁਤ ਖੁਸ਼ ਹਾਂ। ਯਾਮੀ ਦੀਆਂ ਇਹ ਫੋਟੋਜ਼ ਐਡਿਟ ਹੋਣ ਲਈ ਜਾਣੀਆਂ ਸਨ, ਪਰ ਉਸ ਨੇ ਸੋਚਿਆ ਕਿ ਕਿਉਂ ਨਾਂ ਉਹ ਆਪਣੀ ਇਸ ਬਿਮਾਰੀ ਨੂੰ ਸਵੀਕਾਰ ਕਰਦੇ ਹੋਏ , ਲੋਕਾਂ ਨੂੰ ਇਸ ਬਾਰੇ ਜਾਣਕਾਰੀ ਦਵੇ। ਫੈਨਜ਼ ਯਾਮੀ ਦੀ ਇਸ ਪੋਸਟ ਨੂੰ ਬਹੁਤ ਪਸੰਦ ਕਰ ਰਹੇ ਹਨ ਅਤੇ ਉਸ ਦੀ ਹੌਸਲਾ ਅਫਜ਼ਾਈ ਕਰ ਰਹੇ ਹਨ।
