ਦੱਖਣੀ ਮੁੰਬਈ ਦੇ ਭੁਲੇਸ਼ਵਰ ਇਲਾਕੇ ਵਿਚ ਸ਼ਨੀਵਾਰ ਰਾਤ ਨੂੰ ਗਣੇਸ਼ ਪ੍ਰਤਿਮਾ ਦੇ ਆਗਮਨ ਜਲੂਸ ਦੌਰਾਨ ਕਰੀਬ 22 ਫੁੱਟ ਉੱਚੀ ‘ਭੁਲੇਸ਼ਵਰਚਾ ਰਾਜਾ’ ਦੀ ਪ੍ਰਤਿਮਾ ਅਚਾਨਕ ਡਿੱਗ ਪਈ। ਇਸ ਦੀ ਲਪੇਟ ਵਿਚ ਆਉਣ ਕਾਰਨ ਦੋ ਗਣੇਸ਼ ਭਗਤਾਂ ਦੀ ਮੌਤ ਹੋ ਗਈ, ਜਦਕਿ ਦੋ ਬੱਚੀਆਂ ਸਮੇਤ ਪੰਜ ਸ਼ਰਧਾਲੂ ਜ਼ਖਮੀ ਹੋ ਗਏ। ਇਹ ਹਾਦਸਾ ਰਾਤ ਕਰੀਬ 10 ਵਜੇ ਬਲਰਾਮ ਮਰਚੈਂਟ ਰੋਡ ਉੱਤੇ ਕਬੂਤਰਖ਼ਾਨੇ ਦੇ ਨੇੜੇ ਵਾਪਰਿਆ। ਮਰਨ ਵਾਲਿਆਂ ਦੀ ਪਛਾਣ 33 ਸਾਲਾ ਸੰਕੇਤ ਨੇਵਸ਼ੇ ਅਤੇ 30 ਸਾਲਾ ਬ੍ਰਿਜੇਸ਼ ਹੇਮੰਤ ਜੋਸ਼ੀ ਵਜੋਂ ਹੋਈ ਹੈ। ਜ਼ਖ਼ਮੀਆਂ ਵਿਚ ਵੈਭਵ ਘੇਨੰਦ, ਪਵਨ ਚੌਰਸੀਆ ਅਤੇ ਕੁਣਾਲ ਕਾਸ਼ਿਦ ਸ਼ਾਮਲ ਹਨ। ਇਸ ਤੋਂ ਇਲਾਵਾ, ਪੰਜ ਸਾਲ ਦੀ ਲਾਵਨਿਆ ਗਨੇਰ ਅਤੇ ਸੱਤ ਸਾਲਾ ਦਿਵਿਆ ਗਨੇਰ ਵੀ ਜ਼ਖ਼ਮੀ ਹੋਈਆਂ ਹਨ। ਸਾਰੇ ਜ਼ਖ਼ਮੀਆਂ ਦਾ ਹਸਪਤਾਲਾਂ ਵਿਚ ਇਲਾਜ ਚੱਲ ਰਿਹਾ ਹੈ ਤੇ ਉਨ੍ਹਾਂ ਦੀ ਹਾਲਤ ਸਥਿਰ ਦੱਸੀ ਜਾ ਰਹੀਆਂ ਹਨ। ਪੀਟੀਆਈ ਮੁਤਾਬਕ ਮਰਹੂਮ ਸੰਕੇਤ ਨੇਵਸ਼ੇ ‘ਭੁਲੇਸ਼ਵਰਾਚਾ ਰਾਜਾ ਗਣੇਸ਼ ਮੰਡਲ’ ਦਾ ਪ੍ਰਧਾਨ ਸੀ।
ਇਹ ਵੀ ਪੜ੍ਹੋ
ਪੁਲਿਸ ਦੀ ਮੁੱਢਲੀ ਜਾਂਚ ਵਿਚ ਸਾਹਮਣੇ ਆਇਆ ਹੈ ਕਿ ਪ੍ਰਤਿਮਾ ਦੇ ਪਿੱਛੇ ਲੱਗਾ ਵੈਲਡਿੰਗ ਸਪੋਰਟ ਟੁੱਟ ਗਿਆ ਸੀ, ਜਿਸ ਕਾਰਨ ਇਹ ਅੱਗੇ ਵਾਲੇ ਪਾਸੇ ਡਿੱਗ ਪਈ। ਹਾਲਾਂਕਿ, ਹਾਦਸੇ ਦੀ ਵਜ੍ਹਾ ਜਾਣਨ ਲਈ ਜਾਂਚ ਜਾਰੀ ਹੈ। ਪੁਲਿਸ ਨੇ ਇਸ ਸਬੰਧੀ ਅਚਾਨਕ ਮੌਤ ਦਾ ਮਾਮਲਾ ਦਰਜ ਕੀਤਾ ਹੈ। ਹਾਦਸੇ ਵਿਚ ਪ੍ਰਤਿਮਾ ਟੁੱਟਣ ਉਪਰੰਤ ਪ੍ਰਸ਼ਾਸਨ ਨੇ ਇਸ ਨੂੰ ਗਿਰਗਾਉਂ ਚੌਪਾਟੀ ਦੇ ਸਮੁੰਦਰ ਵਿਚ ਵਿਸਰਜਤ ਅਰਥਾਤ ਪ੍ਰਵਾਹ ਦਿੱਤਾ ਹੈ। ਪ੍ਰਤਿਮਾ ਦੇ ਆਗਮਨ ਸਮਾਰੋਹ ਵਿਚ ਵੱਡੀ ਗਿਣਤੀ ਵਿਚ ਸ਼ਰਧਾਲੂ ਸ਼ਾਮਲ ਸਨ। ਇਸ ਘਟਨਾ ਨੇ ਗਣੇਸ਼ ਉਤਸਵ ਤੋਂ ਪਹਿਲਾਂ ਮੁੰਬਈ ਵਿਚ ਵੱਡੇ ਆਕਾਰ ਦੀਆਂ ਅਤੇ ਭਾਰੀ ਮੂਰਤੀਆਂ ਦੀ ਸੁਰੱਖਿਆ ਦੇ ਪ੍ਰਬੰਧਾਂ ਉੱਤੇ ਵੀ ਸਵਾਲ ਉਠਾ ਦਿੱਤੇ ਹਨ। ਮਹਾਰਾਸ਼ਟਰ ਦੇ ਮੁੱਖ ਮੰਤਰੀ ਦੇਵੇਂਦਰ ਫਡਨਵੀਸ ਨੇ ਹਾਦਸੇ ਨੂੰ ਬੇਹਦ ਦੁੱਖਦਾਈ ਅਤੇ ਹਿਰਦੇ ਵਲੂੰਧਰ ਦੇਣ ਵਾਲਾ ਦੱਸਿਆ ਹੈ। ਉਨ੍ਹਾਂ ਨੇ ਮਾਰੇ ਗਏ ਗਣੇਸ਼ ਭਗਤਾਂ ਨੂੰ ਸ਼ਰਧਾਂਜਲੀ ਦਿੰਦੇ ਹੋਏ ਜ਼ਖ਼ਮੀਆਂ ਦੇ ਜਲਦੀ ਸਿਹਤਮੰਦ ਹੋਣ ਦੀ ਪ੍ਰਾਰਥਨਾ ਕੀਤੀ ਹੈ। ਦੋ ਮੌਤਾਂ ਹੋਣ ਕਾਰਨ ਇਲਾਕੇ ਵਿਚ ਗ਼ਮ ਦੀ ਲਹਿਰ ਦੌੜ ਗਈ ਹੈ।
