ਅੰਬਾਲਾ ‘ਚ ਦੋ ਨਕਾਬਪੋਸ਼ ਬਦਮਾਸ਼ਾਂ ਨੇ ਇਕ ਜਿਊਲਰ ਦੀ ਦੁਕਾਨ ‘ਤੇ ਲੁੱਟ ਦੀ ਵਾਰਦਾਤ ਨੂੰ ਅੰਜਾਮ ਦਿੱਤਾ ਹੈ। ਬਦਮਾਸ਼ ਬਾਈਕ ‘ਤੇ ਸਵਾਰ ਹੋ ਕੇ ਆਏ ਸਨ। ਇਹ ਘਟਨਾ ਪੰਜੋਖਰਾ ਥਾਣਾ ਖੇਤਰ ਦੇ ਅਧੀਨ ਡਿਫੈਂਸ ਕਾਲੋਨੀ ‘ਚ ਦੁਪਹਿਰ ਕਰੀਬ 1 ਵਜੇ ਵਾਪਰੀ।
ਦੂਜੇ ਪਾਸੇ ਸੂਚਨਾ ਮਿਲਣ ਤੋਂ ਬਾਅਦ ਥਾਣਾ ਪੰਜੋਖਰਾ ਦੇ ਇੰਚਾਰਜ ਵਿਕਰਾਂਤ ਸਿੰਘ ਅਤੇ ਸੀਆਈਏ-2 ਦੇ ਇੰਚਾਰਜ ਸੰਦੀਪ ਸਿੰਘ ਨੇ ਮੌਕੇ ‘ਤੇ ਪਹੁੰਚ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਮਿਲੀ ਜਾਣਕਾਰੀ ਅਨੁਸਾਰ ਅੰਬਾਲਾ ਛਾਉਣੀ ਦੀ ਡਿਫੈਂਸ ਕਲੋਨੀ ਸੈਕਟਰ-ਬੀ ਦੇ ਰਹਿਣ ਵਾਲੇ ਰਮੇਸ਼ ਕੁਮਾਰ ਦੀ ਸ਼੍ਰੀ ਰਾਮ ਜਵੈਲਰਜ਼ ਨਾਂ ਦੀ ਦੁਕਾਨ ਹੈ। ਅੱਜ ਦੁਪਹਿਰ 1 ਵਜੇ ਦੇ ਕਰੀਬ ਦੋ ਨਕਾਬਪੋਸ਼ ਬਾਈਕ ‘ਤੇ ਆਏ।
ਬਦਮਾਸ਼ਾਂ ਨੇ ਜੌਹਰੀ ਨੂੰ ਚਾਕੂ ਦਿਖਾ ਦਿੱਤਾ। ਇਸ ਤੋਂ ਬਾਅਦ ਲੁਟੇਰਿਆਂ ਨੇ ਦੁਕਾਨ ਦੇ ਅੰਦਰ ਰੱਖੇ ਗਹਿਣੇ, 10 ਹਜ਼ਾਰ ਰੁਪਏ ਦੀ ਨਕਦੀ ਅਤੇ ਮੋਬਾਈਲ ਫੋਨ ਖੋਹ ਲਿਆ ਅਤੇ ਫ਼ਰਾਰ ਹੋ ਗਏ।
ਜੌਹਰੀ ਅਨੁਸਾਰ ਬਦਮਾਸ਼ ਬਾਈਕ ‘ਤੇ ਆਏ ਸਨ। ਬਾਈਕ ਦਾ ਆਖਰੀ ਨੰਬਰ 9292 ਸੀ। ਮੁਲਜ਼ਮ ਡਿਫੈਂਸ ਕਲੋਨੀ ਤੋਂ ਮਿਲਟਰੀ ਏਰੀਆ ਰਾਹੀਂ ਅੰਬਾਲਾ ਛਾਉਣੀ ਵੱਲ ਭੱਜ ਗਏ। ਪੁਲਿਸ ਅਤੇ ਸੀਆਈਏ ਦੀਆਂ ਟੀਮਾਂ ਆਸਪਾਸ ਲੱਗੇ ਸੀਸੀਟੀਵੀ ਕੈਮਰਿਆਂ ਦੀ ਫੁਟੇਜ ਨੂੰ ਸਕੈਨ ਕਰ ਰਹੀਆਂ ਹਨ।
