ਆਪਣੀ ਰੋਜ਼ਾਨਾ ਜ਼ਿੰਦਗੀ ਵਿੱਚ ਹਰ ਕੋਈ ਪਿਆਜ਼ ਅਤੇ ਲਸਣ ਦੀ ਵਰਤੋਂ ਜਰੂਰ ਕਰਦਾ ਹੈ। ਇਸ ਦੀ ਵਰਤੋਂ ਸਲਾਦ ਤੇ ਸਬਜ਼ੀਆਂ ਵਿੱਚ ਆਮ ਤੌਰ ਤੇ ਕੀਤੀ ਜਾਂਦੀ ਹੈ। ਜ਼ਿਆਦਾਤਰ ਸਬਜ਼ੀਆਂ ਦਾ ਸਵਾਦ ਇਨ੍ਹਾਂ ਦੋਨਾਂ ਚੀਜ਼ਾਂ ਤੋਂ ਬਿਨ੍ਹਾਂ ਫਿੱਕਾ ਪੈ ਜਾਂਦਾ ਹੈ। ਪਰ ਭਾਰਤ ਵਿੱਚ ਇੱਕ ਪਿੰਡ ਅਜਿਹਾ ਵੀ ਹੈ ਜਿੱਥੇ ਪਿਆਜ਼ ਅਤੇ ਲਸਣ ਦੀ ਵਰਤੋਂ ਕਰਨ ‘ਤੇ ਪਾਬੰਦੀ ਹੈ।
ਬਿਹਾਰ ਦੇ ਜਹਾਨਾਬਾਦ ਦੇ ਪਿੰਡ ਤ੍ਰਿਲੋਕੀ ਬੀਘਾ ਜੋ ਕਿ ਜ਼ਿਲ੍ਹੇ ਤੋਂ ਕਰੀਬ 30 ਕਿਲਮੀਟਰ ਦੂਰ ਹੈ ਇਥੇ ਕੋਈ ਵੀ ਪਿਆਜ਼ ਦੀ ਕਿਸੇ ਵੀ ਤਰ੍ਹਾਂ ਨਾਲ ਵਰਤੋਂ ਨਹੀਂ ਕਰਦਾ। 30 ਤੋਂ 35 ਘਰਾਂ ਵਾਲੀ ਬਸਤੀ (ਪਿੰਡ) ਦੇ ਯਾਦਵ ਜਾਤੀ ਦੇ ਲੋਕਾਂ ਦਾ ਕਹਿਣਾ ਹੈ ਕਿ ਇੱਥੇ ਇੱਕ ਅਜਿਹਾ ਮੰਦਰ ਹੈ ਜਿੱਥੇ ਦੇਵਤਿਆਂ ਦੇ ਸਰਾਪ ਕਾਰਨ ਉਹ ਪਿਆਜ਼-ਲਸਣ ਨਹੀਂ ਖਾਂਦੇ। ਪੂਰੇ ਪਿੰਡ ਵਿੱਚ ਬਾਜ਼ਾਰ ਵਿੱਚੋਂ ਪਿਆਜ਼ ਤੇ ਲਸਣ ਲਿਆਉਣ ਦੀ ਵੀ ਮਨਾਹੀ ਹੈ। ਇਸ ਪਿੰਡ ਦੇ ਲੋਕਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੇ ਪੁਰਖੇ ਵੀ ਪਿਆਜ਼-ਲਸਣ ਨਹੀਂ ਖਾਂਦੇ ਸਨ। ਅਜਿਹੇ ‘ਚ ਹੁਣ ਉਹ ਇਸ ਪਰੰਪਰਾ ਨੂੰ ਨਹੀਂ ਤੋੜ ਸਕਦੇ।
ਪਿੰਡ ਦੇ ਲੋਕਾਂ ਨੇ ਜਾਣਕਾਰੀ ਦਿੰਦਿਆਂ ਦਸਿਆ ਕਿ ਇੱਥੇ ਰਹਿਣ ਵਾਲੀ ਇੱਕ ਔਰਤ ਅਨੁਸਾਰ ਕਈ ਸਾਲ ਪਹਿਲਾਂ ਇੱਕ ਪਰਿਵਾਰ ਨੇ ਇਸ ਪਰੰਪਰਾ ਨੂੰ ਤੋੜਨ ਦੀ ਕੋਸ਼ਿਸ਼ ਕੀਤੀ ਸੀ, ਜਿਸ ਦੇ ਸਿੱਟੇ ਵਜੋਂ ਉਨ੍ਹਾਂ ਦੇ ਘਰ ਕਈ ਅਣਸੁਖਾਵੀਆਂ ਘਟਨਾਵਾਂ ਵਾਪਰੀਆਂ ਸਨ।ਉਦੋਂ ਤੋਂ ਇੱਥੇ ਕੋਈ ਵੀ ਅਜਿਹੀ ਗਲਤੀ ਨਹੀਂ ਕਰਦਾ। ਪਿੰਡ ਦੇ ਮੁਖੀ ਅਨੁਸਾਰ ਇਸ ਪਿੰਡ ਵਿੱਚ 35 ਲੋਕਾਂ ਦਾ ਪਰਿਵਾਰ ਰਹਿੰਦਾ ਹੈ। ਇਸ ਪਿੰਡ ਵਿੱਚ ਸਿਰਫ਼ ਲਸਣ ਪਿਆਜ਼ ਹੀ ਨਹੀਂ ਬਲਕਿ ਮੀਟ ਅਤੇ ਸ਼ਰਾਬ ‘ਤੇ ਵੀ ਪਾਬੰਦੀ ਹੈ।
