ਹਿਮਾਚਲ ਦੇ ਨਾਲਾਗੜ੍ਹ ‘ਚ ਫਰਿੱਜ ਦੇ ਕੰਪ੍ਰੈਸ਼ਰ ‘ਚ ਧਮਾਕਾ ਹੋਇਆ ਹੈ। ਇਸ ਕਾਰਨ ਘਰ ਨੂੰ ਅੱਗ ਲੱਗ ਗਈ। ਇਸ ਅੱਗ ‘ਚ ਕਮਰੇ ‘ਚ ਸੌਂ ਰਿਹਾ 3 ਸਾਲਾ ਬੱਚਾ ਜ਼ਿੰਦਾ ਸੜ ਗਿਆ, ਜਦਕਿ ਉਸ ਦੇ ਮਾਤਾ-ਪਿਤਾ ਵੀ ਝੁਲਸ ਗਏ। ਉਹਨਾਂ ਨੂੰ ਇਲਾਜ ਲਈ ਹਸਪਤਾਲ ਲਿਆਂਦਾ ਗਿਆ ਹੈ।
ਦੱਸ ਦਈਏ ਕਿ ਬੱਚੇ ਦੇ ਪਿਤਾ ਨੂੰ ਗੰਭੀਰ ਹਾਲਤ ਵਿੱਚ ਪੀਜੀਆਈ ਚੰਡੀਗੜ੍ਹ ਰੈਫਰ ਕਰ ਦਿੱਤਾ ਗਿਆ ਹੈ। ਜਦਕਿ ਮਾਂ ਨੂੰ ਮੁੱਢਲੀ ਸਹਾਇਤਾ ਦੇ ਬਾਅਦ ਘਰ ਭੇਜ ਦਿੱਤਾ ਗਿਆ ਹੈ। ਇਹ ਮਾਮਲਾ ਦੇਰ ਰਾਤ ਨਾਲਾਗੜ੍ਹ ਦੇ ਪਿੰਡ ਦਭੋਟਾ ਵਿੱਚ ਸਾਹਮਣੇ ਆਇਆ।
ਜਾਣਕਾਰੀ ਅਨੁਸਾਰ ਪਿੰਡ ਦਭੋਟਾ ਵਿਖੇ ਸਤਨਾਮ ਸਿੰਘ ਆਪਣੀ ਪਤਨੀ ਪੂਜਾ ਅਤੇ 3 ਸਾਲ ਦੇ ਬੇਟੇ ਵਿਹਾਨ ਨਾਲ ਸੌਂ ਰਿਹਾ ਸੀ। ਪਰਿਵਾਰ ਦੇ ਹੋਰ ਮੈਂਬਰ ਅਗਲੇ ਕਮਰੇ ਵਿੱਚ ਸੌਂ ਰਹੇ ਸਨ। ਰਾਤ 11.30 ਵਜੇ ਅਚਾਨਕ ਹੋਏ ਧਮਾਕੇ ਤੋਂ ਬਾਅਦ ਕਮਰੇ ਨੂੰ ਅੱਗ ਲੱਗ ਗਈ।
ਇਸਤੋਂ ਇਲਾਵਾ ਅੱਗ ਕੁਝ ਹੀ ਦੇਰ ਵਿੱਚ ਸਾਰੇ ਕਮਰੇ ਵਿੱਚ ਫੈਲ ਗਈ। ਇਸ ਤੋਂ ਪਹਿਲਾਂ ਕਿ ਸੁੱਤੇ ਪਏ ਸਤਨਾਮ ਸਿੰਘ ਕੁਝ ਸਮਝ ਪਾਉਂਦੇ, ਅੱਗ ਨੇ ਪੂਰੇ ਕਮਰੇ ਨੂੰ ਆਪਣੀ ਲਪੇਟ ਵਿਚ ਲੈ ਲਿਆ। ਸਤਨਾਮ ਸਿੰਘ, ਪਤਨੀ ਪੂਜਾ ਅਤੇ ਵਿਹਾਨ ਅੱਗ ਦੀ ਲਪੇਟ ਵਿੱਚ ਆ ਗਏ। ਇਸ ਦੌਰਾਨ ਵਿਹਾਨ ਦੀ ਜ਼ਿੰਦਾ ਸੜ ਕੇ ਮੌਤ ਹੋ ਗਈ।
ਕੰਪ੍ਰੈਸ਼ਰ ਫਰਿੱਜ ਦੇ ਪਿਛਲੇ ਪਾਸੇ ਲੱਗਿਆ ਹੁੰਦਾ ਹੈ। ਇਸ ਵਿੱਚ ਇੱਕ ਪੰਪ ਅਤੇ ਇੱਕ ਮੋਟਰ ਲੱਗੀ ਹੋਈ ਹੁੰਦੀ ਹੈ। ਇਹ ਮੋਟਰ ਪੰਪ ਰਾਹੀਂ ਕੋਇਲ ਵਿਚ ਰੈਫ੍ਰਿਜਰੈਂਟ ਗੈਸ ਭੇਜਦੀ ਹੈ, ਜੋ ਗੈਸ ਨੂੰ ਠੰਡਾ ਕਰਦੀ ਹੈ। ਫਰਿੱਜ ਦੇ ਲਗਾਤਾਰ ਚੱਲਣ ਕਾਰਨ ਪਿਛਲਾ ਹਿੱਸਾ ਗਰਮ ਹੋਣ ਲੱਗਦਾ ਹੈ ਅਤੇ ਕੋਇਲ ਸੁੰਗੜਨ ਲੱਗਦੀ ਹੈ। ਅਜਿਹੀ ਸਥਿਤੀ ‘ਚ ਗੈਸ ਦੇ ਰਸਤੇ ‘ਚ ਰੁਕਾਵਟ ਪੈਦਾ ਹੁੰਦੀ ਹੈ ਅਤੇ ਦਬਾਅ ਵਧ ਜਾਂਦਾ ਹੈ। ਫਿਰ ਇਹ ਧਮਾਕੇ ਦਾ ਰੂਪ ਲੈ ਲੈਂਦਾ ਹੈ।
