ਹਿਮਾਚਲ ਪ੍ਰਦੇਸ਼ ਦੇ ਲਾਹੌਲ ਸਪਿਤੀ ਵਿੱਚ ਤਾਪਮਾਨ ਜ਼ੀਰੋ ਤੋਂ ਹੇਠਾਂ ਪਹੁੰਚ ਗਿਆ ਹੈ। ਇਸ ਕਾਰਨ ਝੀਲਾਂ, ਨਦੀਆਂ ਅਤੇ ਝਰਨੇ ਵੀ ਜੰਮ ਗਏ ਹਨ। ਆਮ ਤੌਰ ‘ਤੇ ਜਦੋਂ ਸਰਦੀਆਂ ਵਿੱਚ ਬਰਫ਼ਬਾਰੀ ਹੁੰਦੀ ਹੈ ਅਤੇ ਮੌਸਮ ਖ਼ਰਾਬ ਹੁੰਦਾ ਹੈ ਤਾਂ ਇਸ ਕਾਰਨ ਪਾਣੀ ਨਹੀਂ ਜੰਮਦਾ। ਪਰ ਇਸ ਵਾਰ ਮੌਸਮ ਪੂਰੀ ਤਰ੍ਹਾਂ ਸਾਫ ਹੋਣ ਕਾਰਨ ਸਾਰੀਆਂ ਝੀਲਾਂ ਪੂਰੀ ਤਰ੍ਹਾਂ ਜੰਮ ਗਈਆਂ ਹਨ।
ਅਟਲ ਸੁਰੰਗ ਦੇ ਨੇੜੇ ਲਾਹੌਲ ਸਪਿਤੀ ਦੇ ਸਿਸੂ ਵਿੱਚ ਮਨੁੱਖ ਦੁਆਰਾ ਬਣਾਈ ਗਈ ਝੀਲ ਦੇ ਨਾਲ ਕੁਦਰਤੀ ਤੌਰ ‘ਤੇ ਬਣੀਆਂ ਝੀਲਾਂ ‘ਤੇ ਵੀ ਠੋਸ ਬਰਫ਼ ਦੀ ਇੱਕ ਪਰਤ ਜਮ੍ਹਾਂ ਹੋ ਗਈ ਹੈ। ਘਾਟੀ ‘ਚ ਸਮੁੰਦਰ ਤਲ ਤੋਂ 14 ਹਜ਼ਾਰ ਫੁੱਟ ਦੀ ਉਚਾਈ ‘ਤੇ ਸਥਿਤ ਚੰਦਰਤਾਲ ਝੀਲ, 16 ਹਜ਼ਾਰ ਫੁੱਟ ਦੀ ਉਚਾਈ ‘ਤੇ ਸੂਰਜ ਤਲ, 13700 ਫੁੱਟ ਦੀ ਉਚਾਈ ‘ਤੇ ਸਥਿਤ ਦਾਨਖਰ ਝੀਲ ਦੇ ਨਾਲ-ਨਾਲ ਮਨਾਲੀ ਦੀਆਂ ਪਹਾੜੀਆਂ ‘ਤੇ ਸਥਿਤ ਦੌਸ਼ੇਰ ਅਤੇ ਭ੍ਰਿਗੂ ਝੀਲਾਂ ਵੀ ਜੰਮ ਗਈਆਂ ਹਨ।
ਇਸਤੋਂ ਇਲ਼ਾਵਾ ਹਿਮਾਲਿਆ ਵਿੱਚ ਗਲੇਸ਼ੀਅਰਾਂ ਦੇ ਜੰਮਣ ਤੋਂ ਬਾਅਦ ਚੰਦਰ ਘਾਟੀ ਤੋਂ ਨਿਕਲਣ ਵਾਲੀ ਨਦੀ ਦਾ ਆਕਾਰ ਵੀ 50% ਤੱਕ ਘੱਟ ਗਿਆ ਹੈ। ਦਰਿਆ ਦੇ ਦੋਵੇਂ ਸਿਰਿਆਂ ਦਾ ਪਾਣੀ ਜੰਮ ਗਿਆ ਹੈ।
ਦੱਸ ਦਈਏ ਕਿ ਬਰਫਬਾਰੀ ਅਤੇ ਝੀਲ ਨੂੰ ਦੇਖਣ ਲਈ ਹਰ ਰੋਜ਼ 15 ਤੋਂ 20 ਹਜ਼ਾਰ ਸੈਲਾਨੀ ਸਿਸੂ ਪਹੁੰਚ ਰਹੇ ਹਨ। ਪੁਲਿਸ ਅਨੁਸਾਰ ਸਿਰਫ਼ ਦੋ ਦਿਨਾਂ ਵਿੱਚ ਹੀ ਸੈਲਾਨੀਆਂ ਦੇ 16 ਹਜ਼ਾਰ 303 ਵਾਹਨ ਅਟਲ ਸੁਰੰਗ ਵਿੱਚੋਂ ਲੰਘੇ ਹਨ। ਜਿਸ ਵਿੱਚ 8115 ਵਾਹਨ ਸਿਰਫ਼ ਲਾਹੌਲ ਘਾਟੀ ਵਿੱਚ ਹੀ ਦਾਖ਼ਲ ਹੋਏ ਹਨ। ਇਨ੍ਹਾਂ ਵਾਹਨਾਂ ‘ਚ 40,500 ਸੈਲਾਨੀ ਘਾਟੀ ਪਹੁੰਚੇ। ਘਾਟੀ ਵਿੱਚ ਦਾਖਲ ਹੋਣ ਵਾਲੇ ਸੈਲਾਨੀ ਸਿਸੂ ਝੀਲ ਦੇ ਕਿਨਾਰੇ ਜਾਣ ਨੂੰ ਤਰਜੀਹ ਦੇ ਰਹੇ ਹਨ।
ਇਸਦੇ ਨਾਲ ਹੀ ਝੀਲ ਦੇ ਕੰਢੇ ਸਥਿਤ ਹੈਲੀਪੈਡ ਅਤੇ ਮੋਦੀ ਮੈਦਾਨ ਨੂੰ ਸਿਸੂ ਤੱਕ ਪਹੁੰਚਣ ਵਾਲੇ ਸੈਲਾਨੀਆਂ ਦੇ ਵਾਹਨਾਂ ਲਈ ਪਾਰਕਿੰਗ ਸਥਾਨ ਬਣਾਇਆ ਗਿਆ ਹੈ। ਜਿੱਥੇ ਸੈਲਾਨੀ ਆਪਣੀਆਂ ਕਾਰਾਂ ਪਾਰਕ ਕਰਕੇ ਇਸ ਖੂਬਸੂਰਤ ਝੀਲ ਨੂੰ ਦੇਖਦੇ ਹਨ।
ਲਾਹੌਲ ਸਪਿਤੀ ਪੁਲਿਸ ਨੇ ਝੀਲ ‘ਤੇ ਬਰਫ਼ ਦੀ ਪਰਤ ਦੇਖਣ ‘ਤੇ ਪਾਬੰਦੀ ਲਗਾ ਦਿੱਤੀ ਹੈ। ਇਸ ਸਬੰਧੀ ਐਸਪੀ ਵੱਲੋਂ ਹੁਕਮ ਵੀ ਜਾਰੀ ਕਰ ਦਿੱਤੇ ਗਏ ਹਨ। ਸੈਲਾਨੀਆਂ ਦੀ ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦਿਆਂ ਝੀਲ ਦੇ ਕੰਢਿਆਂ ’ਤੇ ਪੁਲੀਸ ਮੁਲਾਜ਼ਮ ਵੀ ਤਾਇਨਾਤ ਕੀਤੇ ਗਏ ਹਨ।
