ਹਿਮਾਚਲ ਪ੍ਰਦੇਸ਼ ਵਿਧਾਨ ਸਭਾ ਦੇ ਸਿਰਮੌਰ ਜ਼ਿਲ੍ਹੇ ਦੇ ਸ੍ਰੀਰੇਨੁਕਾਜੀ ਤੋਂ ਵਿਧਾਇਕ ਵਿਨੈ ਕੁਮਾਰ ਡਿਪਟੀ ਸਪੀਕਰ ਬਣੇ ਹਨ। ਉਨ੍ਹਾਂ ਨੂੰ ਸਰਬਸੰਮਤੀ ਨਾਲ ਡਿਪਟੀ ਸਪੀਕਰ ਚੁਣ ਲਿਆ ਗਿਆ ਹੈ। ਮੁੱਖ ਮੰਤਰੀ ਸੁਖਵਿੰਦਰ ਸੁੱਖੂ ਨੇ ਉਨ੍ਹਾਂ ਨੂੰ ਡਿਪਟੀ ਸਪੀਕਰ ਬਣਾਉਣ ਲਈ ਸਦਨ ਵਿੱਚ ਪਹਿਲਾ ਪ੍ਰਸਤਾਵ ਰੱਖਿਆ। ਦੂਜਾ ਪ੍ਰਸਤਾਵ ਖੇਤੀਬਾੜੀ ਮੰਤਰੀ ਚੰਦਰ ਕੁਮਾਰ ਨੇ ਰੱਖਿਆ।
ਵਿਨੈ ਕੁਮਾਰ ਨੂੰ ਡਿਪਟੀ ਸਪੀਕਰ ਬਣਾਉਣ ਦਾ ਤੀਜਾ ਪ੍ਰਸਤਾਵ ਵਿਰੋਧੀ ਧਿਰ ਦੇ ਨੇਤਾ ਜੈਰਾਮ ਠਾਕੁਰ ਨੇ ਰੱਖਿਆ, ਜਿਸ ਦਾ ਸਾਬਕਾ ਡਿਪਟੀ ਸਪੀਕਰ ਹੰਸਰਾਜ ਨੇ ਸਮਰਥਨ ਕੀਤਾ। ਇਸ ਤਰ੍ਹਾਂ ਸਰਕਾਰ ਬਣਨ ਤੋਂ ਇਕ ਸਾਲ ਬਾਅਦ ਡਿਪਟੀ ਸਪੀਕਰ ਦੀ ਨਿਯੁਕਤੀ ਹੋਈ ਹੈ।
ਵਿਨੈ ਕੁਮਾਰ ਤਿੰਨ ਵਾਰ ਵਿਧਾਇਕ ਰਹਿ ਚੁੱਕੇ ਹਨ। ਉਹ ਸਾਲ 2012 ਵਿੱਚ ਪਹਿਲੀ ਵਾਰ ਵਿਧਾਨ ਸਭਾ ਪੁੱਜੇ ਸਨ। 2017 ਵਿੱਚ ਦੂਜੀ ਵਾਰ ਵਿਧਾਇਕ ਚੁਣੇ ਗਏ। ਸਾਲ 2022 ਵਿੱਚ ਉਹ ਲਗਾਤਾਰ ਤੀਜੀ ਵਾਰ ਚੋਣ ਜਿੱਤ ਕੇ ਵਿਧਾਨ ਸਭਾ ਵਿੱਚ ਪਹੁੰਚੇ ਹਨ।
ਸਾਬਕਾ ਵੀਰਭੱਦਰ ਸਰਕਾਰ ਵਿੱਚ ਵਿਨੈ ਕੁਮਾਰ ਮੁੱਖ ਸੰਸਦੀ ਸਕੱਤਰ (ਸੀਪੀਐਸ) ਰਹਿ ਚੁੱਕੇ ਹਨ। ਵਿਨੈ ਕੁਮਾਰ ਦਾ ਜਨਮ 12 ਮਾਰਚ 1978 ਨੂੰ ਮੈਨ ਬਾਗ ਸਿਰਮੌਰ ਵਿੱਚ ਹੋਇਆ ਸੀ। ਵਿਨੈ ਦੀ ਤਾਜਪੋਸ਼ੀ ਨੂੰ ਲੈ ਕੇ ਉਨ੍ਹਾਂ ਦੇ ਸਮਰਥਕਾਂ ‘ਚ ਉਤਸ਼ਾਹ ਹੈ।
ਇਸ ਤਰ੍ਹਾਂ ਸਿਰਮੌਰ ਜ਼ਿਲ੍ਹੇ ਨੂੰ ਸੁੱਖੂ ਸਰਕਾਰ ਵਿੱਚ ਦੂਜਾ ਵੱਡਾ ਅਹੁਦਾ ਮਿਲਿਆ ਹੈ। ਇਸ ਤੋਂ ਪਹਿਲਾਂ ਕਾਂਗਰਸ ਸਰਕਾਰ ਵਿੱਚ ਸੰਸਦੀ ਮਾਮਲਿਆਂ ਬਾਰੇ ਮੰਤਰੀ ਅਤੇ ਉਦਯੋਗ ਮੰਤਰੀ ਹਰਸ਼ ਚੌਹਾਨ ਵੀ ਸਿਰਮੌਰ ਜ਼ਿਲ੍ਹੇ ਦੇ ਸ਼ਿਲਈ ਵਿਧਾਨ ਸਭਾ ਹਲਕੇ ਤੋਂ ਹਨ।
