2 ਦਸੰਬਰ ਤੋਂ 6 ਦਸੰਬਰ 2021 ਤਕ ਬਹਿਰੀਨ ‘ਚ ਆਯੋਜਿਤ ਏਸ਼ੀਆਈ ਪੈਰਾ ਯੁਵਾ ਖੇਡਾਂ ‘ਚ 90 ਤੋਂ ਵੱਧ ਭਾਰਤੀ ਖਿਡਾਰੀ ਹਿੱਸਾ ਲੈ ਰਹੇ ਹਨ। ਭਾਰਤੀ ਮਿਸ਼ਨ ਦੇ ਵਰਿੰਦਰ ਕੁਮਾਰ ਡਬਾਸ ਨੇ ਦੱਸਿਆ ਕਿ ਖੇਡਾਂ ਦੇ ਪਹਿਲੇ ਤੇ ਦੂਜੇ ਦਿਨ ਭਾਰਤ ਦੇ 19 ਐਥਲੀਟਾਂ ਨੇ 5 ਸੋਨ, 6 ਚਾਂਦੀ ਤੇ 8 ਕਾਂਸੀ ਤਮਗ਼ੇ ਜਿੱਤੇ ਹਨ। ਪੰਜਾਬ ਦੀ ਅਨਨਿਆ ਬੰਸਲ ਨੇ ਸ਼ਾਟ ਪੁੱਟ ਥ੍ਰੋਅ ‘ਚ ਚਾਂਦੀ ਦਾ ਤਮਗ਼ਾ ਜਿੱਤ ਕੇ ਭਾਰਤ ਲਈ ਮੈਡਲ ਅਕਾਊਂਟ ਖੋਲਿਆ। ਜਦਕਿ ਪ੍ਰਵੀਨ ਕੁਮਾਰ ਨੇ ਹਾਈ ਜੰਪ ‘ਚ ਸੋਨ, ਦਰਸ਼ ਨੇ 100 ਮੀਟਰ ‘ਚ ਕਾਂਸੀ ਤੇ ਲਕਸ਼ਿਤ ਨੇ ਸ਼ਾਟਪੁੱਟ ‘ਚ ਕਾਂਸੀ ਤਮਗ਼ੇ ਜਿੱਤੇ। ਅਜੇ ਤਕ ਖਿਡਾਰੀ ਸਵਿਮਿੰਗ ਤੇ ਪੈਰਾ ਬੈਡਮਿੰਟਨ ‘ਚ ਮੈਡਲ ਜਿੱਤ ਚੁੱਕੇ ਹਨ।
ਇਸ ਤੋਂ ਪਹਿਲਾਂ ਪ੍ਰਤੀਯੋਗਿਤਾ ਦੇ ਪਹਿਲੇ ਦਿਨ ਸ਼ਨੀਵਾਰ ਨੂੰ ਭਾਰਤ ਨੇ 6 ਤਮਗ਼ੇ ਜਿੱਤੇ ਹਨ। ਖੇਲੋ ਇੰਡੀਆ ਐਥਲੀਟ ਅਨਨਿਆ ਬੰਸਲ ਨੇ ਅੰਡਰ-20 ਮਹਿਲਾ ਸ਼ਾਟ ਪੁਟ ‘ਚ 7.05 ਮੀਟਰ ਦੇ ਸਰਵਸ੍ਰੇਸ਼ਠ ਥ੍ਰੋਅ ਦੇ ਨਾਲ ਚਾਂਦੀ ਦੇ ਤਮਗ਼ੇ ਨਾਲ ਤਮਗ਼ਾ ਸੂਚੀ ‘ਚ ਭਾਰਤ ਨੂੰ ਪਹਿਲਾ ਤਮਗ਼ਾ ਦਿਵਾਇਆ ਜਦਕਿ ਕਸ਼ਿਸ਼ ਲਾਕੜਾ ਨੇ ਮਹਿਲਾ ਕਲੱਬ ਥੋਅ ਐੱਫ.-51 ਸ਼੍ਰੇਣੀ ‘ਚ ਚਲ ਰਹੀ ਪ੍ਰਤੀਯੋਗਿਤਾ ‘ਚ ਪਹਿਲਾ ਸੋਨ ਤਮਗ਼ਾ ਜਿੱਤਿਆ।
ਦੂਜੇ ਪਾਸੇ ਪੁਰਸ਼ਾਂ ਦੇ ਜੈਵਲਿਨ ਥ੍ਰੋਅ ਮੁਕਾਬਲੇ ‘ਚ ਲਕਸ਼ਿਤ ਤੇ ਪੁਰਸ਼ਾਂ ਦੇ ਸ਼ਾਟ ਪੁੱਟ ਮੁਕਾਬਲੇ ‘ਚ ਸੰਜੇ ਰੈੱਡੀ ਨੀਲਮ ਨੇ ਕਾਂਸੀ ਤਮਗ਼ੇ ਜਿੱਤੇ। ਦਿਨ ਦੇ ਅਖ਼ੀਰ ਤਕ ਭਾਰਤ ਨੇ ਦੋ ਹੋਰ ਤਮਗ਼ੇ ਆਪਣੇ ਖਾਤੇ ‘ਚ ਜੋੜੇ। ਪੁਰਸ਼ਾਂ ਦੀ ਸ਼ਾਟ ਪੁੱਟ ਐੱਫ-46 ਵਰਗ ‘ਚ ਵਿਕਾਸ ਭਾਟੀਵਾਲ ਨੇ ਚਾਂਦੀ, ਜਦਕਿ 400 ਮੀਟਰ ਦੀ ਟੀ-46 ਵਰਗ ‘ਚ ਬੇਨੇਟ ਬੀਜੂ ਜਾਰਜ ਨੇ ਕਾਂਸੀ ਤਮਗਾ ਜਿੱਤਿਆ।
