ਨਵੀਂ ਦਿੱਲੀ : – ਚੰਦਰਯਾਨ-2 ਮਿਸ਼ਨ ਦੇ ਲਗਭਗ ਦੋ ਸਾਲ ਬਾਅਦ, ਭਾਰਤੀ ਪੁਲਾੜ ਖੋਜ ਸੰਗਠਨ (ਇਸਰੋ) ਇਸ ਸਾਲ ਅਗਸਤ ਵਿੱਚ ਚੰਦਰਯਾਨ-3 ਮਿਸ਼ਨ ਲਾਂਚ ਕਰੇਗਾ। ਇਹ ਜਾਣਕਾਰੀ ਭਾਰਤੀ ਪੁਲਾੜ ਵਿਭਾਗ ਨੇ ਲੋਕ ਸਭਾ ਵਿੱਚ ਇੱਕ ਸਵਾਲ ਦੇ ਜਵਾਬ ਵਿੱਚ ਦਿੱਤੀ ਹੈ। ਚੰਦਰਮਾ ਮਿਸ਼ਨ ‘ਚ ਦੇਰੀ ਨੂੰ ਲੈ ਕੇ ਸਦਨ ‘ਚ ਸਵਾਲ ਉਠਾਇਆ ਗਿਆ।
ਚੰਦਰਯਾਨ-3 ਵਿੱਚ ਦੇਰੀ ਦੇ ਸਵਾਲ ਦੇ ਜਵਾਬ ਵਿੱਚ ਕੇਂਦਰੀ ਵਿਗਿਆਨ ਅਤੇ ਤਕਨਾਲੋਜੀ ਮੰਤਰੀ ਡਾ. ਜਤਿੰਦਰ ਸਿੰਘ ਨੇ ਕਿਹਾ ਕਿ ਕੋਰੋਨਾ ਮਹਾਮਾਰੀ ਕਾਰਨ ਕਈ ਮਿਸ਼ਨਾਂ ਵਿੱਚ ਦੇਰੀ ਹੋਈ ਹੈ। ਪੁਲਾੜ ਖੇਤਰ ਵਿੱਚ ਸੁਧਾਰਾਂ ਅਤੇ ਮੰਗ-ਅਧਾਰਿਤ ਮਾਡਲ ਦੇ ਮੱਦੇਨਜ਼ਰ ਇਹ ਪ੍ਰੋਜੈਕਟ ਅਜੇ ਵੀ ਤਰਜੀਹੀ ਹਨ।
ਚੰਦਰਯਾਨ-3 ਮਿਸ਼ਨ ਅਕਤੂਬਰ 2008 ਵਿੱਚ ਲਾਂਚ ਕੀਤੇ ਗਏ ਚੰਦਰਯਾਨ-1 ਮਿਸ਼ਨ ਤੋਂ ਪ੍ਰੇਰਨਾ ਲਵੇਗਾ। ਇਸ ਨੇ ਚੰਦਰਮਾ ਦੀ ਸਤ੍ਹਾ ‘ਤੇ ਪਾਣੀ ਦੀ ਖੋਜ ਵਰਗੇ ਮਹਾਨ ਕੰਮ ਕੀਤੇ। ਚੰਦਰਯਾਨ-3 ਨੂੰ ਸਾਲ 2021 ‘ਚ ਹੀ ਲਾਂਚ ਕੀਤਾ ਜਾਣਾ ਸੀ, ਪਰ ਕੋਰੋਨਾ ਮਹਾਮਾਰੀ ਕਾਰਨ ਇਸ ‘ਚ ਦੇਰੀ ਹੋ ਗਈ।
ਚੰਦਰਯਾਨ-3 ਨੂੰ ਪਿਛਲੇ ਚੰਦਰਯਾਨ-2 ਮਿਸ਼ਨ ਦੇ ਲਗਭਗ ਦੋ ਸਾਲ ਬਾਅਦ ਲਾਂਚ ਕੀਤਾ ਜਾ ਰਿਹਾ ਹੈ। ਇਹ ਮਿਸ਼ਨ ਪੂਰੀ ਤਰ੍ਹਾਂ ਕਾਮਯਾਬ ਨਹੀਂ ਸੀ। ਲੈਂਡਰ ਅਤੇ ਰੋਵਰ ਆਪਣੀ ਮੰਜ਼ਿਲ ਤੋਂ ਕੁਝ ਦੂਰੀ ‘ਤੇ ਹਾਦਸਾਗ੍ਰਸਤ ਹੋ ਗਿਆ ਸੀ। ਹਾਲਾਂਕਿ, ਇਸ ਵਾਹਨ ਦਾ ਆਰਬਿਟਰ ਅਜੇ ਵੀ ਚੰਦਰਮਾ ਦੀ ਸਤ੍ਹਾ ਦੇ ਉੱਪਰ ਮੌਜੂਦ ਹੈ। ਇਸਰੋ ਵੱਲੋਂ ਚੰਦਰਯਾਨ-3 ਮਿਸ਼ਨ ਵਿੱਚ ਵੀ ਇਸ ਦੀ ਵਰਤੋਂ ਕੀਤੀ ਜਾਵੇਗੀ।