ਇੱਕ ਕਹਾਵਤ ਹੈ ਕਿ ਜਾਕੋ ਰਾਖੇ ਸਾਈਆਂ, ਮਾਰ ਸਕੇ ਨ ਕੋਈ। ਅਜਿਹੀ ਘਟਨਾ ਬ੍ਰਿਟੇਨ ਤੋਂ ਸਾਹਮਣੇ ਆਈ ਹੈ ਜਿਥੇ ਕੁਝ ਡਾਕਟਰਾਂ ਨੇ ਇਕ ਅਜਿਹੇ ਬੱਚੇ ਦੀ ਜਾਨ ਬਚਾਈ ਜਿਸ ਦੀ ਪੈਦਾ ਹੁੰਦਿਆਂ ਹੀ 17 ਮਿੰਟ ਲਈ ਧੜਕਣ ਰੁਕ ਗਈ ਸੀ। ਇਹ ਬੱਚਾ ਸਮੇਂ ਤੋਂ ਪਹਿਲਾਂ ਪੈਦਾ ਹੋਇਆ ਸੀ। ਹਾਲਾਂਕਿ ਬੱਚੇ ਨੂੰ ਕਰੀਬ ਤਿੰਨ ਮਹੀਨੇ ਹਸਪਤਾਲ ‘ਚ ਰਹਿਣਾ ਪਿਆ।
ਇਕ ਰਿਪੋਰਟ ਮੁਤਾਬਕ ਬੱਚੇ ਦਾ ਜਨਮ ਗਰਭ ਅਵਸਥਾ ਦੇ 26 ਹਫਤਿਆਂ ਬਾਅਦ ਹੀ ਹੋ ਗਿਆ ਸੀ ਅਤੇ ਜਦੋਂ ਬੱਚੇ ਦਾ ਜਨਮ ਹੋਇਆ ਤਾਂ ਉਸ ਦੀ ਧੜਕਣ ਬੰਦ ਹੋ ਗਈ ਸੀ। ਸਰਜਰੀ ਰਾਹੀਂ ਜਨਮੇ ਇਸ ਸਮੇਂ ਤੋਂ ਪਹਿਲਾਂ ਪੈਦਾ ਹੋਏ ਬੱਚੇ ਦਾ ਸਾਹ 17 ਮਿੰਟ ਲਈ ਬੰਦ ਹੋ ਗਿਆ। ਕੁਝ ਡਾਕਟਰਾਂ ਨੇ ਵੀ ਆਸ ਛੱਡ ਦਿੱਤੀ ਸੀ ਤੇ ਪਰਿਵਾਰਕ ਮੈਂਬਰਾਂ ਦਾ ਬੁਰਾ ਹਾਲ ਸੀ। ਪਰ ਇਸ ਦੌਰਾਨ ਇਸਨੂੰ ਹਸਪਤਾਲ ਦੀ ਲੈਬ ਵਿੱਚ ਲਿਜਾਇਆ ਗਿਆ ਜਿੱਥੇ ਸਿਰਫ ਸਮੇਂ ਤੋਂ ਪਹਿਲਾਂ ਪੈਦਾ ਹੋਏ ਬੱਚਿਆਂ ਨੂੰ ਰੱਖਿਆ ਜਾਂਦਾ ਹੈ। ਜਦੋਂ ਡਾਕਟਰਾਂ ਨੇ ਉਨ੍ਹਾਂ ਨੂੰ ਉੱਥੇ ਲਿਜਾ ਕੇ ਇਲਾਜ ਸ਼ੁਰੂ ਕੀਤਾ ਤਾਂ ਚਮਤਕਾਰ ਹੋ ਗਿਆ। ਇਸ ਬੱਚੇ ਨੇ ਸਾਹ ਲੈਣੇ ਸ਼ੁਰੂ ਕਰ ਦਿੱਤੇ। ਬੱਚੇ ਨੂੰ ਹਸਪਤਾਲ ‘ਚ ਹੀ ਰੱਖਿਆ ਗਿਆ। ਹੁਣ ਇਹ ਬੱਚਾ ਤਿੰਨ ਮਹੀਨੇ ਬਾਅਦ ਠੀਕ ਹੋ ਕੇ ਘਰ ਪਰਤ ਆਇਆ ਹੈ।
ਰਿਪੋਰਟ ਮੁਤਾਬਕ ਜਨਮ ਸਮੇਂ ਬੱਚੇ ਦਾ ਭਾਰ 750 ਗ੍ਰਾਮ ਸੀ। 17 ਮਿੰਟ ਤੱਕ ਉਸ ਦਾ ਸਾਹ ਰੁਕ ਗਿਆ ਸੀ। ਇਸ ਤੋਂ ਬਾਅਦ ਉਸ ਨੇ ਸਾਹ ਲੈਣਾ ਸ਼ੁਰੂ ਕਰ ਦਿੱਤਾ। ਉਸ ਨੂੰ ਜਿਉਂਦਾ ਰੱਖਣ ਲਈ ਖੂਨ ਚੜ੍ਹਾਇਆ ਗਿਆ। ਸਕੈਨ ਤੋਂ ਪਤਾ ਲੱਗਾ ਕਿ ਉਸ ਦੇ ਦਿਮਾਗ ਨੂੰ ਕੋਈ ਨੁਕਸਾਨ ਨਹੀਂ ਹੋਇਆ ਹੈ। ਇਸ ਤੋਂ ਬਾਅਦ 112 ਦਿਨ ਹਸਪਤਾਲ ‘ਚ ਰਹਿਣ ਤੋਂ ਬਾਅਦ ਉਹ ਆਕਸੀਜਨ ‘ਤੇ ਘਰ ਆ ਗਿਆ।
