ਚੋਣ ਕਮਿਸ਼ਨ ਵੱਲੋਂ ਅੱਜ 5 ਰਾਜਾਂ ਵਿੱਚ ਚੋਣਾਂ ਦੀ ਤਰੀਕ ਦਾ ਐਲਾਨ ਕੀਤਾ ਗਿਆ ਹੈ। ਚੋਣ ਤਾਰੀਕ ਐਲਾਨੇ ਜਾਣ ਦਾ ਸ਼੍ਰੋਮਣੀ ਅਕਾਲੀ ਦਲ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਵੱਲੋਂ ਸਵਾਗਤ ਕੀਤਾ ਗਿਆ। ਪਾਰਟੀ ਪ੍ਰਧਾਨ ਨੇ ਟਵੀਟ ਸਾਂਝਾ ਕਰ ਕਿਹਾ ਕਿ ਇਹ ਰਾਜ ਵਿੱਚ ਅਰਾਜਕਤਾ, ਭੰਬਲਭੂਸੇ ਅਤੇ ਕੁਸ਼ਾਸਨ ਦੇ ਅੰਤ ਦਾ ਸੰਕੇਤ ਹੈ। ਪੰਜਾਬੀ ਸ਼ਾਂਤੀ ਤੇ ਭਾਈਚਾਰਕ ਸਾਂਝ ਲਈ ਵਚਨਬੱਧ, ਮਜ਼ਬੂਤ, ਸਥਿਰ ਅਤੇ ‘ਵਿਕਾਸ-ਮੁਖੀ’ ਅਕਾਲੀ-ਬਸਪਾ ਸਰਕਾਰ ਦੀ ਉਤਸੁਕਤਾ ਨਾਲ ਉਡੀਕ ਕਰ ਰਹੇ ਹਨ।
ਅਕਾਲੀ ਦਲ ਪ੍ਰਧਾਨ ਨੇ ਅੱਗੇ ਕਿਹਾ ਕਿ ਅਕਾਲੀ-ਬਸਪਾ ਗਠਜੋੜ ਨਾਲ ਮੁੜ ਸੂਬੇ ਵਿੱਚ ਇੱਕ ਗੰਭੀਰ ਤੇ ਸੰਜੀਦਾ ਸਰਕਾਰ ਆਏਗੀ। ਹੁਣ ਵਾਲੇ ਸੱਤਾਧਾਰੀਆਂ ਨੇ ਸੱਤਾ ਨੂੰ ਸਰਕਸ ਦਾ ਮਜ਼ਾਕ ਬਣਾ ਕੇ ਰੱਖ ਦਿੱਤਾ ਹੈ। ਇਸ ਸੱਤਾ ਦੇ ਖਤਮ ਹੋਣ ਨਾਲ ਲੋਕ ਸੁੱਖ ਦਾ ਸਾਹ ਲੈਣਗੇ। ਚੋਣਾਂ ਦੀ ਸਮਾਂਸੂਚੀ ਪੰਜਾਬ ਵਿੱਚ ਬਰਬਾਦ ਹੋਏ ਪਿਛਲੇ ਪੰਜ ਸਾਲਾਂ ਦੇ ਅੰਤ ਹੋਣ ਵੱਲ ਵੀ ਇਸ਼ਾਰਾ ਹੈ। ਦਸ ਦਈਏ ਕਿ ਇਸ ਵਾਰ ਸ਼੍ਰੋਮਣੀ ਅਕਾਲੀ ਦਲ ਪਹਿਲੀ ਵਾਰ ਬਸਪਾ ਗਠਜੋੜ ਨਾਲ ਚੋਣਾਂ ਲੜੇਗਾ।
