ਬਿਹਾਰ ਦੇ ਕੁੱਝ ਵਿਦਿਆਰਥੀ ਯੂਕਰੇਨ ਵਿੱਚ ਫਸੇ ਹੋਏ ਹਨ। ਇਕ ਵਿਦਿਆਰਥੀ ਨੇ ਇੱਕ ਵੀਡੀਓ ਜਾਰੀ ਕਰਕੇ ਭਾਰਤ ਸਰਕਾਰ ਤੋਂ ਮਦਦ ਦੀ ਅਪੀਲ ਕੀਤੀ ਹੈ। ਕਰੀਬ 2 ਮਿੰਟ ਦੀ ਵੀਡੀਓ ‘ਚ ਇਕ ਸ਼ੁਭਮ ਨਾਮ ਦੇ ਵਿਦਿਆਰਥੀ ਨੇ ਉੱਥੇ ਦੀ ਸਾਰੀ ਸਥਿਤੀ ਦੱਸੀ।
ਅਸੀਂ ਇੱਥੇ ਪੜ੍ਹ ਰਹੇ ਸੀ ਕਿਉਂਕਿ ਕਲਾਸਾਂ ਆਫ਼ਲਾਈਨ ਸਨ। ਜੰਗ ਦੇ ਡਰ ਨੂੰ ਦੇਖਦਿਆਂ ਅਸੀਂ ਭਾਰਤੀ ਦੂਤਾਵਾਸ ਨੂੰ ਆਨਲਾਈਨ ਕਲਾਸ ਕਰਵਾਉਣ ਲਈ ਕਈ ਮੇਲ ਭੇਜੇ। ਬਹੁਤ ਕੋਸ਼ਿਸ਼ਾਂ ਤੋਂ ਬਾਅਦ ਵੀ ਉਹ ਲੋਕ ਆਨਲਾਈਨ ਕਲਾਸ ਲਈ ਰਾਜ਼ੀ ਨਹੀਂ ਹੋਏ, ਜਿਸ ਕਰਕੇ ਸਾਨੂੰ ਇੱਥੇ ਰਹਿ ਕੇ ਪੜ੍ਹਾਈ ਜਾਰੀ ਰੱਖਣੀ ਪਈ। ਜੇਕਰ ਕਲਾਸਾਂ ਆਨਲਾਈਨ ਕਰ ਦਿੱਤੀਆਂ ਜਾਂਦੀਆਂ ਤਾਂ ਅਸੀਂ ਘਰ ਜਾ ਕੇ ਵੀ ਆਪਣੀ ਪੜ੍ਹਾਈ ਜਾਰੀ ਰੱਖ ਸਕਦੇ ਸੀ ਪਰ ਅਜਿਹਾ ਕੁਝ ਨਹੀਂ ਹੋਇਆ। ਕਲਾਸਾਂ ਆਫਲਾਈਨ ਹੀ ਚੱਲ ਰਹੀਆਂ ਸਨ। ਅਸੀਂ ਇੱਥੇ ਕਾਲਜ ਦੇ ਹੋਸਟਲ ਵਿੱਚ ਫਸੇ ਹੋਏ ਹਾਂ।
ਸ਼ੁਭਮ ਨੇ ਦੱਸਿਆ ਕਿ ਜੰਗ ਦੇ ਡਰ ਕਾਰਨ ਫਲਾਈਟ ਟਿਕਟਾਂ ਦੀ ਕੀਮਤ ਕਾਫੀ ਵਧ ਗਈ ਸੀ। ਇਸ ਕਾਰਨ ਅਸੀਂ ਟਿਕਟ ਵੀ ਨਹੀਂ ਲੈ ਸਕੇ। ਇਸ ਵੇਲੇ ਅਜਿਹੀ ਸਥਿਤੀ ਬਣ ਗਈ ਹੈ ਕਿ ਰੂਸ ਨੇ ਜੰਗ ਸ਼ੁਰੂ ਕਰ ਦਿੱਤੀ ਹੈ। ਇਥੇ 6 ਥਾਵਾਂ ‘ਤੇ ਬੰਬ ਡਿੱਗੇ ਹਨ। ਸਾਰੀਆਂ ਉਡਾਣਾਂ ਰੱਦ ਕਰ ਦਿੱਤੀਆਂ ਗਈਆਂ ਹਨ।
ਸ਼ੁਭਮ ਨੇ ਦੱਸਿਆ ਕਿ ਅਸੀਂ ਫਸ ਗਏ ਹਾਂ। ਇੱਥੋਂ ਕੋਈ ਫਲਾਈਟ ਨਹੀਂ ਹੈ। ਕੁਝ ਦੋਸਤ ਏਅਰਪੋਰਟ ਜਾ ਰਹੇ ਸਨ, ਰਸਤੇ ਵਿੱਚ ਉਨ੍ਹਾਂ ਨੂੰ ਬੰਬ ਦੀ ਆਵਾਜ਼ ਸੁਣਾਈ ਦਿੱਤੀ, ਉਹ ਉੱਥੇ ਹੀ ਫਸ ਗਏ। ਯੂਨੀਵਰਸਿਟੀ ਉਨ੍ਹਾਂ ਲੋਕਾਂ ਨੂੰ ਕੱਢਣ ਲਈ ਕੁਝ ਪ੍ਰਬੰਧ ਕਰ ਰਹੀ ਹੈ। ਇਸ ਸਮੇਂ ਅਸੀਂ ਮੈਡੀਕਲ ਕਾਲਜ ਦੇ ਹੋਸਟਲ ਵਿੱਚ ਹੀ ਹਾਂ। ਭਾਰਤ ਸਰਕਾਰ ਨੂੰ ਬੇਨਤੀ ਹੈ ਕਿ ਉਹ ਲੋਕਾਂ ਦੀ ਮਦਦ ਕਰੇ, ਤਾਂ ਜੋ ਅਸੀਂ ਆਸਾਨੀ ਨਾਲ ਭਾਰਤ ਵਿੱਚ ਆਪਣੇ ਘਰਾਂ ਤੱਕ ਪਹੁੰਚ ਸਕੀਏ।