ਝਾਰਖੰਡ ਦੇ ਧਨਬਾਦ ਦੀ ਮਹਿਲਾ ਨਿਸ਼ਾਨੇਬਾਜ਼ ਕੋਨਿਕਾ ਲਾਇਕ ਨੇ ਖ਼ੁਦਕੁਸ਼ੀ ਕਰ ਲਈ ਹੈ। ਕੋਲਕਾਤਾ ਦੇ ਹੋਸਟਲ ਵਿਚ ਰਹਿ ਕੇ ਰਾਈਫਲ ਸ਼ੂਟਿੰਗ ਦੀ ਟ੍ਰੇਨਿੰਗ ਲੈ ਰਹੀ ਕੋਨਿਕਾ ਨੇ ਹੋਸਟਲ ਵਿਚ ਹੀ ਫਾਂਸੀ ਲਗਾ ਕੇ ਖ਼ੁਦਕੁਸ਼ੀ ਕੀਤੀ । ਕੋਨਿਕਾ ਨੇ ਝਾਰਖੰਡ ਸੂਬਾ ਪੱਧਰ ’ਤੇ ਕਈ ਮੈਡਲ ਵੀ ਜਿੱਤੇ। ਉਹ 10 ਮੀਟਰ ਏਅਰ ਰਾਈਫਲ ਕੈਟੇਗਰੀ ਵਿਚ ਸਟੇਟ ਚੈਂਪੀਅਨ ਰਹਿ ਚੁਕੀ ਹੈ। ਉਸ ਨੇ ਇਹ ਕਦਮ ਕਿਉ ਚੁਕਿਆ ਇਸ ਬਾਰੇ ਅਜੇ ਕੁੱਝ ਨਹੀਂ ਦਸਿਆ ਜਾ ਰਿਹਾ।
ਦਸ ਦਇਏ ਕਿ ਕੋਨਿਕਾ ਦੀ ਚੋਣ ਨੈਸ਼ਨਲ ਟੀਮ ਵਿਚ ਹੋਈ ਸੀ ਪਰ ਉਸ ਕੋਲ ਖ਼ੁਦ ਦੀ ਰਾਈਫਲ ਨਹੀਂ ਸੀ।ਜਿਸ ਤੋਂ ਬਾਅਦ ਉਸ ਨੇ ਅਦਾਕਾਰ ਸੋਨੂੰ ਸੂਦ ਤੋਂ ਰਾਈਫਲ ਲਈ ਮਦਦ ਮੰਗੀ ਸੀ। ਫਿਰ ਸੋਨੂੰ ਸੂਦ ਨੇ 2.70 ਲੱਖ ਰੁਪਏ ਦੀ ਜਰਮਨ ਰਾਈਫਲ ਉਸ ਲਈ ਭੇਜੀ ਸੀ। ਇਸ ਤੋਂ ਕੋਨਿਕਾ ਲਾਇਕ ਨੇ ਟਵੀਟ ਕਰਕੇ ਸੋਨੂੰ ਸੂਦ ਦਾ ਧੰਨਵਾਦ ਕੀਤਾ ਸੀ। ਇਸ ਤੋਂ ਪਹਿਲਾਂ ਤੱਕ ਉਹ ਆਪਣੇ ਕੋਚ ਰਜਿੰਦਰ ਸਿੰਘ ਅਤੇ ਦੋਸਤਾਂ ਦੀ ਰਾਈਫਲ ਜ਼ਰੀਏ ਹੀ ਅਭਿਆਸ ਕਰਦੀ ਸੀ।
ਜ਼ਿਕਰਯੋਗ ਹੈ ਕਿ ਹਫ਼ਤਾ ਪਹਿਲਾਂ ਵੀ ਫ਼ਰੀਦਕੋਟ ਦੀ ਇਕ ਹੋਣਹਾਰ ਸ਼ੂਟਿੰਗ ਖਿਡਾਰਨ ਖੁਸ਼ਸੀਰਤ ਕੌਰ ਨੇ ਨੈਸ਼ਨਲ ਸ਼ੂਟਿੰਗ ਚੈਪੀਅਨਸ਼ਿਪ ਵਿਚ ਮੈਡਲ ਨਾ ਜਿੱਤਣ ਦੇ ਸਦਮੇਂ ਦੇ ਚੱਲਦਿਆਂ ਆਪਣੀ ਹੀ ਸ਼ੂਟਿੰਗ ਗੰਨ ਨਾਲ ਖੁਦ ਨੂੰ ਗੋਲੀ ਮਾਰ ਕੇ ਜੀਵਨ ਲੀਲਾ ਸਮਾਪਤ ਕਰ ਲਈ ਸੀ।
