ਗੁਰੂਆਂ ਪੀਰਾਂ ਦੀ ਧਰਤੀ ਪੰਜਾਬ ‘ਚ ਵਸਦੇ ਲੋਕਾਂ ਨੇ ਧਾਰਮਿਕ ਵਖਰੇਵਿਆਂ ਦੇ ਬਾਵਜੂਦ ਪੁਰਾਤਨ ਸਮੇਂ ਤੋਂ ਚੱਲਦੀ ਆ ਰਹੀ ਆਪਸੀ ਭਾਈਚਾਰਕ ਸਾਂਝ ਨੂੰ ਮੌਜੂਦਾ ਸਮੇਂ ਵਿੱਚ ਵੀ ਮੱਧਮ ਨਹੀਂ ਪੈਣ ਦਿੱਤਾ ਹੈ। ਇਸ ਆਪਸੀ ਭਾਈਚਾਰਕ ਦਾ ਰਾਏਕੋਟ ਦੇ ਪਿੰਡ ਸਾਹਜਹਾਨਪੁਰ ਤੇ ਪਿੰਡ ਨੱਥੋਵਾਲ ਵਿਖੇ ਵਸਦੇ ਸਿੱਖਾਂ, ਹਿੰਦੂਆਂ ਅਤੇ ਮੁਸਲਮਾਨਾਂ ਵੱਲੋਂ ਅਨੋਖਾ ਪ੍ਰਦਰਸ਼ਨ ਕੀਤਾ ਗਿਆ। ਜਿਨ੍ਹਾਂ ਰਲ ਮਿਲ ਕੇ ਪਿੰਡ ਸ਼ਾਹਜਹਾਨਪੁਰ ਵਿਖੇ ਆਜ਼ਾਦੀ ਤੋਂ ਪਹਿਲਾਂ 1941 ਵਿੱਚ ਬਣੀ ਖਸਤਾ ਹਾਲਤ ਪੁਰਾਤਨ ਮਸਜਿਦ ਦੀ ਮੁਰੰਮਤ ਕਰਕੇ ਮਸਜਿਦ ਨੂੰ ਮੁੜ ਅਬਾਦ ਕੀਤਾ।
ਦਰਅਸਲ ਪਿੰਡ ਸਾਹਜਹਾਨਪੁਰ ਵਿਖੇ 1941 ਵਿੱਚ ਬਣੀ ਪੁਰਾਤਨ ਮਸਜਿਦ ਭਾਰਤ ਵੰਡ ਤੋਂ ਬਾਅਦਹੌਲੀ ਹੌਲੀ ਇੱਕ ਖੰਡਰ ਦਾ ਰੂਪ ਧਾਰਨ ਕਰ ਗਈ। ਪਿਛਲੇ ਦਿਨੀਂ ਪਿੰਡ ਵਿੱਚ ਰਹਿੰਦੇ ਇਕਲੌਤੇ ਮੁਸਲਮਾਨ ਪਰਿਵਾਰ ਵੱਲੋਂ ਮਸਜਿਦ ਦੀ ਦਸ਼ਾ ਸੁਧਾਰਨ ਸਬੰਧੀ ਗ੍ਰਾਮ ਪੰਚਾਇਤ ਅਤੇ ਪਿੰਡ ਵਾਸੀਆਂ ਨਾਲ ਗੱਲਬਾਤ ਕੀਤੀ ਗਈ। ਜਿਸ ਤੋ ਬਾਅਦ ਗ੍ਰਾਮ ਪੰਚਾਇਤ ਤੇ ਨਗਰ ਨਿਵਾਸੀ ਸਿੱਖਾਂ ਤੇ ਹਿੰਦ ਭਰਾਵਾਂ ਨੇ ਮੋਹਰੀ ਹੋ ਕੇ ਇਹ ਪੁਰਾਤਨ ਤੇ ਇਤਿਹਾਸਕ ਵਿਰਾਸਤ ਨੂੰ ਸੰਭਾਲਣ ਦਾ ਬੀੜਾ ਚੁੱਕ ਲਿਆ।
ਇਸ ਕੰਮ ਵਿੱਚ ਪਿੰਡ ਨੱਥੋਵਾਲ ਦੇ ਮੁਸਲਮਾਨ ਅਤੇ ਹਿੰਦ-ਸਿੱਖ ਭਰਾਵਾਂ ਵੀ ਵੱਧ ਚੜ੍ਹ ਕੇ ਯੋਗਦਾਨ ਪਾਇਆ। ਉਥੇ ਹੀ ਪੰਜਾਬ ਵਕਫ਼ ਬੋਰਡ ਨੇ ਮੁਰੰਮਤ ਦੇ ਲਈ ਪੰਜ ਲੱਖ ਰੁਪਏ ਦਾ ਆਰਥਿਕ ਸਹਾਇਤਾ ਦਿੱਤੀ। ਜਿਸ ‘ਤੇ ਸਮੂਹ ਪਿੰਡ ਵਾਸੀਆਂ ਨੇ ਆਪਸ ਵਿੱਚ ਰਲ ਮਿਲ ਕੇ ਇਸ ਮਸਜਿਦ ਦੀ ਮੁਰੰਮਤ ਕੀਤੀ ਅਤੇ ਇਮਾਰਤ ਦਾ ਲੈਂਟਰ ਪਾਇਆ। ਇਸ ਮੌਕੇ ਪਿੰਡ ਸ਼ਾਹਜਹਾਂਪੁਰ ਅਤੇ ਨੱਥੋਵਾਲ ਦੇ ਮੁਸਲਿਮ ਭਾਈਚਾਰੇ ਵੱਲੋਂ ਮਸਜਿਦ ਉਸਾਰੀ ਦੇ ਉੱਦਮ ਵਿੱਚ ਸਹਿਯੋਗ ਦੇਣ ਲਈ ਗ੍ਰਾਮ ਪੰਚਾਇਤ, ਮੋਹਤਵਰਾਂ ਸਮੇਤ ਸਿੱਖ ਤੇ ਹਿੰਦੂ ਭਾਈਚਾਰੇ ਦੇ ਲੋਕਾਂ ਤੋਂ ਇਲਾਵਾ ਪੰਜਾਬ ਵਕਫ ਬੋਰਡ ਦੇ ਅਧਿਕਾਰੀਆਂ ਨੂੰ ਸਿਰੋਪਾਓ ਦੇ ਕੇ ਸਨਮਾਨਿਤ ਕੀਤਾ ਗਿਆ।
