ਨਵੀਂ ਦਿੱਲੀ : – ਸਾਬਕਾ ਭਾਰਤੀ ਕਪਤਾਨ ਵਿਰਾਟ ਕੋਹਲੀ ਵੈਸਟਇੰਡੀਜ਼ ਖਿਲਾਫ ਐਤਵਾਰ ਤੋਂ ਸ਼ੁਰੂ ਹੋ ਰਹੇ ਪਹਿਲੇ ਵਨਡੇ ‘ਚ 6 ਦੌੜਾਂ ਬਣਾ ਕੇ ਵੱਡਾ ਰਿਕਾਰਡ ਆਪਣੇ ਨਾਂ ਕਰ ਲੈਣਗੇ। 33 ਸਾਲਾ ਵਿਰਾਟ ਕੋਹਲੀ ਭਾਰਤੀ ਧਰਤੀ ‘ਤੇ 5000 ਦੌੜਾਂ ਬਣਾਉਣ ਵਾਲਾ ਦੂਜਾ ਬੱਲੇਬਾਜ਼ ਬਣ ਜਾਵੇਗਾ। ਉਸ ਤੋਂ ਪਹਿਲਾਂ ਭਾਰਤ ਲਈ ਇਹ ਕਾਰਨਾਮਾ ਸਿਰਫ਼ ਸਚਿਨ ਤੇਂਦੁਲਕਰ ਹੀ ਕਰ ਸਕੇ ਹਨ। ਸਚਿਨ ਤੇਂਦੁਲਕਰ ਨੇ ਭਾਰਤੀ ਧਰਤੀ ‘ਤੇ 164 ਮੈਚਾਂ ਦੀਆਂ 160 ਪਾਰੀਆਂ ‘ਚ 6,976 ਦੌੜਾਂ ਬਣਾਈਆਂ ਹਨ।
ਸਚਿਨ ਤੇਂਦੁਲਕਰ ਨੇ ਭਾਰਤੀ ਧਰਤੀ ‘ਤੇ 5000 ਦੌੜਾਂ ਬਣਾਉਣ ਲਈ 121 ਪਾਰੀਆਂ ਖੇਡੀਆਂ। ਇਸ ਦੇ ਨਾਲ ਹੀ ਜੇਕਰ ਵਿਰਾਟ ਕੋਹਲੀ ਵੈਸਟਇੰਡੀਜ਼ ਖਿਲਾਫ ਪਹਿਲੇ ਵਨਡੇ ‘ਚ ਇਹ ਉਪਲੱਬਧੀ ਹਾਸਲ ਕਰ ਲੈਂਦੇ ਹਨ ਤਾਂ ਉਹ ਸਿਰਫ 96 ਪਾਰੀਆਂ ‘ਚ 5000 ਦੌੜਾਂ ਪੂਰੀਆਂ ਕਰ ਲੈਣਗੇ ਅਤੇ ਸਚਿਨ ਤੇਂਦੁਲਕਰ ਦਾ ਰਿਕਾਰਡ ਤੋੜ ਦੇਣਗੇ। ਵਿਰਾਟ ਕੋਹਲੀ ਨੇ ਹੁਣ ਤੱਕ ਭਾਰਤੀ ਧਰਤੀ ‘ਤੇ 98 ਮੈਚ ਖੇਡੇ ਹਨ ਅਤੇ ਆਪਣੀਆਂ 95 ਪਾਰੀਆਂ ‘ਚ 4,994 ਦੌੜਾਂ ਬਣਾਈਆਂ ਹਨ।