ਚੰਡੀਗੜ੍ਹ : – ਚੰਡੀਗੜ੍ਹ ਪੀਜੀਆਈ ਨੇ ਮਰੀਜ਼ਾਂ ਨੂੰ ਵੱਡੀ ਰਾਹਤ ਦਿੱਤੀ ਹੈ। ਪੀਜੀਆਈ ਨੇ ਮਰੀਜ਼ਾਂ ਦੇ ਅਨੁਕੂਲ ਮੋਬਾਈਲ SMS ਸੇਵਾ ਸ਼ੁਰੂ ਕੀਤੀ ਹੈ। ਇਸ ਸੇਵਾ ਰਾਹੀਂ ਲੈਬ ਦੀਆਂ ਰਿਪੋਰਟਾਂ ਮਰੀਜ਼ ਦੇ ਮੋਬਾਈਲ ਫੋਨ ‘ਤੇ ਹੀ ਆਉਣਗੀਆਂ। ਇਸ ਨਾਲ ਮਰੀਜ਼ ਨੂੰ ਪੀਜੀਆਈ ਲੈਬ ਵਿੱਚ ਨਹੀਂ ਜਾਣਾ ਪਵੇਗਾ।
ਇਸ ਸੇਵਾ ਤਹਿਤ ਜਿਵੇਂ ਹੀ ਮਰੀਜ਼ ਦੀ ਲੈਬ ਦੀ ਰਿਪੋਰਟ ਤਿਆਰ ਹੋਵੇਗੀ, ਮਰੀਜ਼ ਨੂੰ ਉਸ ਦੇ ਰਜਿਸਟਰਡ ਮੋਬਾਈਲ ਨੰਬਰ ‘ਤੇ ਐਸ.ਐਮ.ਐਸ ਰਾਹੀਂ ਜਾਣਕਾਰੀ ਮਿਲ ਜਾਵੇਗੀ। ਇਸ MMS ਦਾ ਇੱਕ ਲਿੰਕ ਵੀ ਹੋਵੇਗਾ। ਇਸ ਰਾਹੀਂ ਮਰੀਜ਼ ਉਸ ਰਿਪੋਰਟ ਦੀ ਪੀਡੀਐਫ ਵੀ ਡਾਊਨਲੋਡ ਕਰ ਸਕੇਗਾ। ਇਸ ਤੋਂ ਪਹਿਲਾਂ ਮਰੀਜ਼ਾਂ ਨੂੰ ਆਪਣੀਆਂ ਰਿਪੋਰਟਾਂ ਦੀ ਸਥਿਤੀ ਆਨਲਾਈਨ ਚੈੱਕ ਕਰਨੀ ਪੈਂਦੀ ਸੀ ਜਾਂ ਵਾਰ-ਵਾਰ ਸਬੰਧਤ ਵਿੰਡੋ ‘ਤੇ ਜਾਣਾ ਪੈਂਦਾ ਸੀ। ਉਨ੍ਹਾਂ ਨੂੰ ਰਿਪੋਰਟ ਦਾ ਪ੍ਰਿੰਟ ਆਊਟ ਲੈਣ ਲਈ ਲਾਈਨ ‘ਚ ਖੜ੍ਹਾ ਹੋਣਾ ਪੈਂਦਾ ਸੀ।
ਪੀਜੀਆਈ ਦੇ ਕੰਪਿਊਟਰ ਸੈਕਸ਼ਨ ਨੇ ਸੀਡੀਏਸੀ-ਨੋਇਡਾ ਦੇ ਸਹਿਯੋਗ ਨਾਲ ਇਹ ਸਹੂਲਤ ਤਿਆਰ ਕੀਤੀ ਹੈ। ਇਸ ਨਾਲ ਹੁਣ ਮਰੀਜ਼ ਘਰ ਬੈਠੇ ਹੀ ਆਪਣੀ ਰਿਪੋਰਟ ਦੇਖ ਸਕਣਗੇ। ਇਸ ਨਾਲ ਸਮੇਂ ਅਤੇ ਪੈਸੇ ਦੋਵਾਂ ਦੀ ਬੱਚਤ ਹੋਵੇਗੀ। ਪੀਜੀਆਈ ਪ੍ਰਸ਼ਾਸਨ ਅਨੁਸਾਰ ਇਸ ਨਵੀਂ ਸਹੂਲਤ ਨਾਲ ਪੀਜੀਆਈ ਵਿੱਚ ਮਰੀਜ਼ਾਂ ਦੀ ਭੀੜ ਵੀ ਘਟੇਗੀ। ਇਸ ਦੇ ਨਾਲ ਹੀ ਪੀ.ਜੀ.ਆਈ ਦਾ ਸਟਾਫ਼ ਵੀ ਬਿਹਤਰ ਢੰਗ ਨਾਲ ਕੰਮ ਕਰ ਸਕੇਗਾ। ਇਹ ਜਾਣਕਾਰੀ ਪੀਜੀਆਈ ਦੇ ਹੇਮਾਟੋਲੋਜੀ ਵਿਭਾਗ ਦੀ ਮੁਖੀ ਅਤੇ ਨਿਊ ਓਪੀਡੀ ਸੈਂਪਲ ਕੁਲੈਕਸ਼ਨ ਸੈਂਟਰ ਦੀ ਇੰਚਾਰਜ ਪ੍ਰੋਫੈਸਰ ਰੀਨਾ ਦਾਸ ਨੇ ਦਿੱਤੀ ਹੈ।